౪. వేపచిత్తిసుత్తం

౨౫౦. సావత్థినిదానం. ‘‘భూతపుబ్బం, భిక్ఖవే, దేవాసురసఙ్గామో సముపబ్యూళ్హో అహోసి. అథ ఖో, భిక్ఖవే, వేపచిత్తి అసురిన్దో అసురే ఆమన్తేసి – ‘సచే, మారిసా, దేవానం అసురసఙ్గామే సముపబ్యూళ్హే అసురా జినేయ్యుం దేవా పరాజినేయ్యుం [పరాజేయ్యుం (సీ. పీ.)], యేన నం సక్కం దేవానమిన్దం కణ్ఠపఞ్చమేహి బన్ధనేహి బన్ధిత్వా మమ సన్తికే ఆనేయ్యాథ అసురపుర’న్తి. సక్కోపి ఖో, భిక్ఖవే, దేవానమిన్దో దేవే తావతింసే ఆమన్తేసి – ‘సచే, మారిసా, దేవానం అసురసఙ్గామే సముపబ్యూళ్హే దేవా జినేయ్యుం అసురా పరాజినేయ్యుం, యేన నం వేపచిత్తిం అసురిన్దం కణ్ఠపఞ్చమేహి బన్ధనేహి బన్ధిత్వా మమ సన్తికే ఆనేయ్యాథ సుధమ్మసభ’’’న్తి. తస్మిం ఖో పన, భిక్ఖవే, సఙ్గామే దేవా జినింసు, అసురా పరాజినింసు [పరాజింసు (సీ. పీ.)]. అథ ఖో, భిక్ఖవే, దేవా తావతింసా వేపచిత్తిం అసురిన్దం కణ్ఠపఞ్చమేహి బన్ధనేహి బన్ధిత్వా సక్కస్స దేవానమిన్దస్స సన్తికే ఆనేసుం సుధమ్మసభం. తత్ర సుదం, భిక్ఖవే, వేపచిత్తి అసురిన్దో కణ్ఠపఞ్చమేహి బన్ధనేహి బద్ధో సక్కం దేవానమిన్దం సుధమ్మసభం పవిసన్తఞ్చ నిక్ఖమన్తఞ్చ అసబ్భాహి ఫరుసాహి వాచాహి అక్కోసతి పరిభాసతి. అథ ఖో, భిక్ఖవే, మాతలి సఙ్గాహకో సక్కం దేవానమిన్దం గాథాహి అజ్ఝభాసి –

‘‘భయా ను మఘవా సక్క, దుబ్బల్యా నో తితిక్ఖసి;

సుణన్తో ఫరుసం వాచం, సమ్ముఖా వేపచిత్తినో’’తి.

‘‘నాహం భయా న దుబ్బల్యా, ఖమామి వేపచిత్తినో;

కథఞ్హి మాదిసో విఞ్ఞూ, బాలేన పటిసంయుజే’’తి.

‘‘భియ్యో బాలా పభిజ్జేయ్యుం, నో చస్స పటిసేధకో;

తస్మా భుసేన దణ్డేన, ధీరో బాలం నిసేధయే’’తి.

‘‘ఏతదేవ అహం మఞ్ఞే, బాలస్స పటిసేధనం;

పరం సఙ్కుపితం ఞత్వా, యో సతో ఉపసమ్మతీ’’తి.

‘‘ఏతదేవ తితిక్ఖాయ, వజ్జం పస్సామి వాసవ;

యదా నం మఞ్ఞతి బాలో, భయా మ్యాయం తితిక్ఖతి;

అజ్ఝారుహతి దుమ్మేధో, గోవ భియ్యో పలాయిన’’న్తి.

‘‘కామం మఞ్ఞతు వా మా వా, భయా మ్యాయం తితిక్ఖతి;

సదత్థపరమా అత్థా, ఖన్త్యా భియ్యో న విజ్జతి.

‘‘యో హవే బలవా సన్తో, దుబ్బలస్స తితిక్ఖతి;

తమాహు పరమం ఖన్తిం, నిచ్చం ఖమతి దుబ్బలో.

‘‘అబలం తం బలం ఆహు, యస్స బాలబలం బలం;

బలస్స ధమ్మగుత్తస్స, పటివత్తా న విజ్జతి.

‘‘తస్సేవ తేన పాపియో, యో కుద్ధం పటికుజ్ఝతి;

కుద్ధం అప్పటికుజ్ఝన్తో, సఙ్గామం జేతి దుజ్జయం.

‘‘ఉభిన్నమత్థం చరతి, అత్తనో చ పరస్స చ;

పరం సఙ్కుపితం ఞత్వా, యో సతో ఉపసమ్మతి.

‘‘ఉభిన్నం తికిచ్ఛన్తానం, అత్తనో చ పరస్స చ;

జనా మఞ్ఞన్తి బాలోతి, యే ధమ్మస్స అకోవిదా’’తి.

‘‘సో హి నామ, భిక్ఖవే, సక్కో దేవానమిన్దో సకం పుఞ్ఞఫలం ఉపజీవమానో దేవానం తావతింసానం ఇస్సరియాధిపచ్చం రజ్జం కారేన్తో ఖన్తిసోరచ్చస్స వణ్ణవాదీ భవిస్సతి. ఇధ ఖో తం, భిక్ఖవే, సోభేథ యం తుమ్హే ఏవం స్వాక్ఖాతే ధమ్మవినయే పబ్బజితా సమానా ఖమా చ భవేయ్యాథ సోరతా చా’’తి.