౧౦. సముద్దకసుత్తం

౨౫౬. సావత్థియం. ‘‘భూతపుబ్బం, భిక్ఖవే, సమ్బహులా ఇసయో సీలవన్తో కల్యాణధమ్మా సముద్దతీరే పణ్ణకుటీసు సమ్మన్తి. తేన ఖో పన సమయేన దేవాసురసఙ్గామో సముపబ్యూళ్హో అహోసి. అథ ఖో, భిక్ఖవే, తేసం ఇసీనం సీలవన్తానం కల్యాణధమ్మానం ఏతదహోసి – ‘ధమ్మికా ఖో దేవా, అధమ్మికా అసురా. సియాపి నో అసురతో భయం. యంనూన మయం సమ్బరం అసురిన్దం ఉపసఙ్కమిత్వా అభయదక్ఖిణం యాచేయ్యామా’’’తి. ‘‘అథ ఖో, భిక్ఖవే, తే ఇసయో సీలవన్తో కల్యాణధమ్మా – సేయ్యథాపి నామ బలవా పురిసో సమిఞ్జితం వా బాహం పసారేయ్య, పసారితం వా బాహం సమిఞ్జేయ్య ఏవమేవ – సముద్దతీరే పణ్ణకుటీసు అన్తరహితా సమ్బరస్స అసురిన్దస్స సమ్ముఖే పాతురహేసుం. అథ ఖో, భిక్ఖవే, తే ఇసయో సీలవన్తో కల్యాణధమ్మా సమ్బరం అసురిన్దం గాథాయ అజ్ఝభాసింసు –

‘‘ఇసయో సమ్బరం పత్తా, యాచన్తి అభయదక్ఖిణం;

కామంకరో హి తే దాతుం, భయస్స అభయస్స వా’’తి.

‘‘ఇసీనం అభయం నత్థి, దుట్ఠానం సక్కసేవినం;

అభయం యాచమానానం, భయమేవ దదామి వో’’తి.

‘‘అభయం యాచమానానం, భయమేవ దదాసి నో;

పటిగ్గణ్హామ తే ఏతం, అక్ఖయం హోతు తే భయం.

‘‘యాదిసం వపతే బీజం, తాదిసం హరతే ఫలం;

కల్యాణకారీ కల్యాణం, పాపకారీ చ పాపకం;

పవుత్తం తాత తే బీజం, ఫలం పచ్చనుభోస్ససీ’’తి.

‘‘అథ ఖో, భిక్ఖవే, తే ఇసయో సీలవన్తో కల్యాణధమ్మా సమ్బరం అసురిన్దం అభిసపిత్వా – సేయ్యథాపి నామ బలవా పురిసో సమిఞ్జితం వా బాహం పసారేయ్య, పసారితం వా బాహం సమిఞ్జేయ్య ఏవమేవ – సమ్బరస్స అసురిన్దస్స సమ్ముఖే అన్తరహితా సముద్దతీరే పణ్ణకుటీసు పాతురహేసుం. అథ ఖో, భిక్ఖవే, సమ్బరో అసురిన్దో తేహి ఇసీహి సీలవన్తేహి కల్యాణధమ్మేహి అభిసపితో రత్తియా సుదం తిక్ఖత్తుం ఉబ్బిజ్జీ’’తి.

పఠమో వగ్గో.

తస్సుద్దానం –

సువీరం సుసీమఞ్చేవ, ధజగ్గం వేపచిత్తినో;

సుభాసితం జయఞ్చేవ, కులావకం నదుబ్భియం;

వేరోచన అసురిన్దో, ఇసయో అరఞ్ఞకఞ్చేవ;

ఇసయో చ సముద్దకాతి.