౪. మణిభద్దసుత్తం

౨౩౮. ఏకం సమయం భగవా మగధేసు విహరతి మణిమాలికే చేతియే మణిభద్దస్స యక్ఖస్స భవనే. అథ ఖో మణిభద్దో యక్ఖో యేన భగవా తేనుపసఙ్కమి; ఉపసఙ్కమిత్వా భగవతో సన్తికే ఇమం గాథం అభాసి –

‘‘సతీమతో సదా భద్దం, సతిమా సుఖమేధతి;

సతీమతో సువే సేయ్యో, వేరా చ పరిముచ్చతీ’’తి.

‘‘సతీమతో సదా భద్దం, సతిమా సుఖమేధతి;

సతీమతో సువే సేయ్యో, వేరా న పరిముచ్చతి.

‘‘యస్స సబ్బమహోరత్తం [రత్తిం (స్యా. కం. క.)], అహింసాయ రతో మనో;

మేత్తం సో సబ్బభూతేసు, వేరం తస్స న కేనచీ’’తి.