౭. అద్ధవగ్గో

౧. నామసుత్తం

౬౧. ‘‘కింసు సబ్బం అద్ధభవి [అన్వభవి (సీ.)], కిస్మా భియ్యో న విజ్జతి;

కిస్సస్సు ఏకధమ్మస్స, సబ్బేవ వసమన్వగూ’’తి [వసమద్ధగూ (క.)].

‘‘నామం సబ్బం అద్ధభవి, నామా భియ్యో న విజ్జతి;

నామస్స ఏకధమ్మస్స, సబ్బేవ వసమన్వగూ’’తి.

౨. చిత్తసుత్తం

౬౨. ‘‘కేనస్సు నీయతి లోకో, కేనస్సు పరికస్సతి;

కిస్సస్సు ఏకధమ్మస్స, సబ్బేవ వసమన్వగూ’’తి.

‘‘చిత్తేన నీయతి లోకో, చిత్తేన పరికస్సతి;

చిత్తస్స ఏకధమ్మస్స, సబ్బేవ వసమన్వగూ’’తి.

౩. తణ్హాసుత్తం

౬౩. ‘‘కేనస్సు నీయతి లోకో, కేనస్సు పరికస్సతి;

కిస్సస్సు ఏకధమ్మస్స, సబ్బేవ వసమన్వగూ’’తి.

‘‘తణ్హాయ నీయతి లోకో, తణ్హాయ పరికస్సతి;

తణ్హాయ ఏకధమ్మస్స, సబ్బేవ వసమన్వగూ’’తి.

౪. సంయోజనసుత్తం

౬౪. ‘‘కింసు సంయోజనో లోకో, కింసు తస్స విచారణం;

కిస్సస్సు విప్పహానేన, నిబ్బానం ఇతి వుచ్చతీ’’తి.

‘‘నన్దీసంయోజనో [నన్దిసంయోజనో (సీ. స్యా. కం.)] లోకో, వితక్కస్స విచారణం;

తణ్హాయ విప్పహానేన, నిబ్బానం ఇతి వుచ్చతీ’’తి.

౫. బన్ధనసుత్తం

౬౫. ‘‘కింసు సమ్బన్ధనో లోకో, కింసు తస్స విచారణం;

కిస్సస్సు విప్పహానేన, సబ్బం ఛిన్దతి బన్ధన’’న్తి.

‘‘నన్దీసమ్బన్ధనో లోకో, వితక్కస్స విచారణం;

తణ్హాయ విప్పహానేన, సబ్బం ఛిన్దతి బన్ధన’’న్తి.

౬. అత్తహతసుత్తం

౬౬. ‘‘కేనస్సుబ్భాహతో లోకో, కేనస్సు పరివారితో;

కేన సల్లేన ఓతిణ్ణో, కిస్స ధూపాయితో సదా’’తి.

‘‘మచ్చునాబ్భాహతో లోకో, జరాయ పరివారితో;

తణ్హాసల్లేన ఓతిణ్ణో, ఇచ్ఛాధూపాయితో సదా’’తి.

౭. ఉడ్డితసుత్తం

౬౭. ‘‘కేనస్సు ఉడ్డితో లోకో, కేనస్సు పరివారితో;

కేనస్సు పిహితో లోకో, కిస్మిం లోకో పతిట్ఠితో’’తి.

‘‘తణ్హాయ ఉడ్డితో లోకో, జరాయ పరివారితో;

మచ్చునా పిహితో లోకో, దుక్ఖే లోకో పతిట్ఠితో’’తి.

౮. పిహితసుత్తం

౬౮. ‘‘కేనస్సు పిహితో లోకో, కిస్మిం లోకో పతిట్ఠితో;

కేనస్సు ఉడ్డితో లోకో, కేనస్సు పరివారితో’’తి.

‘‘మచ్చునా పిహితో లోకో, దుక్ఖే లోకో పతిట్ఠితో;

తణ్హాయ ఉడ్డితో లోకో, జరాయ పరివారితో’’తి.

౯. ఇచ్ఛాసుత్తం

౬౯. ‘‘కేనస్సు బజ్ఝతీ లోకో, కిస్స వినయాయ ముచ్చతి;

కిస్సస్సు విప్పహానేన, సబ్బం ఛిన్దతి బన్ధన’’న్తి.

‘‘ఇచ్ఛాయ బజ్ఝతీ లోకో, ఇచ్ఛావినయాయ ముచ్చతి;

ఇచ్ఛాయ విప్పహానేన, సబ్బం ఛిన్దతి బన్ధన’’న్తి.

౧౦. లోకసుత్తం

౭౦. ‘‘కిస్మిం లోకో సముప్పన్నో, కిస్మిం కుబ్బతి సన్థవం;

కిస్స లోకో ఉపాదాయ, కిస్మిం లోకో విహఞ్ఞతీ’’తి.

‘‘ఛసు లోకో సముప్పన్నో, ఛసు కుబ్బతి సన్థవం;

ఛన్నమేవ ఉపాదాయ, ఛసు లోకో విహఞ్ఞతీ’’తి.

అద్ధవగ్గో [అన్వవగ్గో (సీ.)] సత్తమో.

తస్సుద్దానం –

నామం చిత్తఞ్చ తణ్హా చ, సంయోజనఞ్చ బన్ధనా;

అబ్భాహతుడ్డితో పిహితో, ఇచ్ఛా లోకేన తే దసాతి.