౬. జరావగ్గో

౧. జరాసుత్తం

౫౧. ‘‘కింసు యావ జరా సాధు, కింసు సాధు పతిట్ఠితం;

కింసు నరానం రతనం, కింసు చోరేహి దూహర’’న్తి.

‘‘సీలం యావ జరా సాధు, సద్ధా సాధు పతిట్ఠితా;

పఞ్ఞా నరానం రతనం, పుఞ్ఞం చోరేహి దూహర’’న్తి.

౨. అజరసాసుత్తం

౫౨. ‘‘కింసు అజరసా సాధు, కింసు సాధు అధిట్ఠితం;

కింసు నరానం రతనం, కింసు చోరేహ్యహారియ’’న్తి.

‘‘సీలం అజరసా సాధు, సద్ధా సాధు అధిట్ఠితా;

పఞ్ఞా నరానం రతనం, పుఞ్ఞం చోరేహ్యహారియ’’న్తి.

౩. మిత్తసుత్తం

౫౩. ‘‘కింసు పవసతో [పథవతో (పీ. క.)] మిత్తం, కింసు మిత్తం సకే ఘరే;

కిం మిత్తం అత్థజాతస్స, కిం మిత్తం సమ్పరాయిక’’న్తి.

‘‘సత్థో పవసతో మిత్తం, మాతా మిత్తం సకే ఘరే;

సహాయో అత్థజాతస్స, హోతి మిత్తం పునప్పునం;

సయంకతాని పుఞ్ఞాని, తం మిత్తం సమ్పరాయిక’’న్తి.

౪. వత్థుసుత్తం

౫౪. ‘‘కింసు వత్థు మనుస్సానం, కింసూధ పరమో సఖా;

కింసు భూతా ఉపజీవన్తి, యే పాణా పథవిస్సితా’’తి [పథవిం సితాతి (సీ. స్యా. కం. పీ.)].

‘‘పుత్తా వత్థు మనుస్సానం, భరియా చ [భరియావ (సీ.), భరియా (స్యా. కం.)] పరమో సఖా;

వుట్ఠిం భూతా ఉపజీవన్తి, యే పాణా పథవిస్సితా’’తి.

౫. పఠమజనసుత్తం

౫౫. ‘‘కింసు జనేతి పురిసం, కింసు తస్స విధావతి;

కింసు సంసారమాపాది, కింసు తస్స మహబ్భయ’’న్తి.

‘‘తణ్హా జనేతి పురిసం, చిత్తమస్స విధావతి;

సత్తో సంసారమాపాది, దుక్ఖమస్స మహబ్భయ’’న్తి.

౬. దుతియజనసుత్తం

౫౬. ‘‘కింసు జనేతి పురిసం, కింసు తస్స విధావతి;

కింసు సంసారమాపాది, కిస్మా న పరిముచ్చతీ’’తి.

‘‘తణ్హా జనేతి పురిసం, చిత్తమస్స విధావతి;

సత్తో సంసారమాపాది, దుక్ఖా న పరిముచ్చతీ’’తి.

౭. తతియజనసుత్తం

౫౭. ‘‘కింసు జనేతి పురిసం, కింసు తస్స విధావతి;

కింసు సంసారమాపాది, కింసు తస్స పరాయన’’న్తి.

‘‘తణ్హా జనేతి పురిసం, చిత్తమస్స విధావతి;

సత్తో సంసారమాపాది, కమ్మం తస్స పరాయన’’న్తి.

౮. ఉప్పథసుత్తం

౫౮. ‘‘కింసు ఉప్పథో అక్ఖాతో, కింసు రత్తిన్దివక్ఖయో;

కిం మలం బ్రహ్మచరియస్స, కిం సినానమనోదక’’న్తి.

‘‘రాగో ఉప్పథో అక్ఖాతో, వయో రత్తిన్దివక్ఖయో;

ఇత్థీ మలం బ్రహ్మచరియస్స, ఏత్థాయం సజ్జతే పజా;

తపో చ బ్రహ్మచరియఞ్చ, తం సినానమనోదక’’న్తి.

౯. దుతియసుత్తం

౫౯. ‘‘కింసు దుతియా [దుతియం (స్యా. కం. పీ.)] పురిసస్స హోతి, కింసు చేనం పసాసతి;

కిస్స చాభిరతో మచ్చో, సబ్బదుక్ఖా పముచ్చతీ’’తి.

‘‘సద్ధా దుతియా పురిసస్స హోతి, పఞ్ఞా చేనం పసాసతి;

నిబ్బానాభిరతో మచ్చో, సబ్బదుక్ఖా పముచ్చతీ’’తి.

౧౦. కవిసుత్తం

౬౦. ‘‘కింసు నిదానం గాథానం, కింసు తాసం వియఞ్జనం;

కింసు సన్నిస్సితా గాథా, కింసు గాథానమాసయో’’తి.

‘‘ఛన్దో నిదానం గాథానం, అక్ఖరా తాసం వియఞ్జనం;

నామసన్నిస్సితా గాథా, కవి గాథానమాసయో’’తి.

జరావగ్గో ఛట్ఠో.

తస్సుద్దానం –

జరా అజరసా మిత్తం, వత్థు తీణి జనాని చ;

ఉప్పథో చ దుతియో చ, కవినా పూరితో వగ్గోతి.