౫. అరహన్తసుత్తం

౨౫. ‘‘యో హోతి భిక్ఖు అరహం కతావీ,

ఖీణాసవో అన్తిమదేహధారీ;

అహం వదామీతిపి సో వదేయ్య,

మమం వదన్తీతిపి సో వదేయ్యా’’తి.

‘‘యో హోతి భిక్ఖు అరహం కతావీ,

ఖీణాసవో అన్తిమదేహధారీ;

అహం వదామీతిపి సో వదేయ్య,

మమం వదన్తీతిపి సో వదేయ్య;

లోకే సమఞ్ఞం కుసలో విదిత్వా,

వోహారమత్తేన సో [స (?)] వోహరేయ్యా’’తి.

‘‘యో హోతి భిక్ఖు అరహం కతావీ,

ఖీణాసవో అన్తిమదేహధారీ;

మానం ను ఖో సో ఉపగమ్మ భిక్ఖు,

అహం వదామీతిపి సో వదేయ్య;

మమం వదన్తీతిపి సో వదేయ్యా’’తి.

‘‘పహీనమానస్స న సన్తి గన్థా,

విధూపితా మానగన్థస్స సబ్బే;

స వీతివత్తో మఞ్ఞతం [మాననం (సీ.), మఞ్ఞీతం (?)] సుమేధో,

అహం వదామీతిపి సో వదేయ్య.

‘‘మమం వదన్తీతిపి సో వదేయ్య;

లోకే సమఞ్ఞం కుసలో విదిత్వా;

వోహారమత్తేన సో వోహరేయ్యా’’తి.