౬. అఙ్గులిమాలసుత్తం

౩౪౭. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన రఞ్ఞో పసేనదిస్స కోసలస్స విజితే చోరో అఙ్గులిమాలో నామ హోతి లుద్దో లోహితపాణి హతపహతే నివిట్ఠో అదయాపన్నో పాణభూతేసు. తేన గామాపి అగామా కతా, నిగమాపి అనిగమా కతా, జనపదాపి అజనపదా కతా. సో మనుస్సే వధిత్వా వధిత్వా అఙ్గులీనం మాలం ధారేతి. అథ ఖో భగవా పుబ్బణ్హసమయం నివాసేత్వా పత్తచీవరమాదాయ సావత్థిం పిణ్డాయ పావిసి. సావత్థియం పిణ్డాయ చరిత్వా పచ్ఛాభత్తం పిణ్డపాతపటిక్కన్తో సేనాసనం సంసామేత్వా పత్తచీవరమాదాయ యేన చోరో అఙ్గులిమాలో తేనద్ధానమగ్గం పటిపజ్జి. అద్దసాసుం ఖో గోపాలకా పసుపాలకా కస్సకా పథావినో భగవన్తం యేన చోరో అఙ్గులిమాలో తేనద్ధానమగ్గపటిపన్నం. దిస్వాన భగవన్తం ఏతదవోచుం – ‘‘మా, సమణ, ఏతం మగ్గం పటిపజ్జి. ఏతస్మిం, సమణ, మగ్గే చోరో అఙ్గులిమాలో నామ లుద్దో లోహితపాణి హతపహతే నివిట్ఠో అదయాపన్నో పాణభూతేసు. తేన గామాపి అగామా కతా, నిగమాపి అనిగమా కతా, జనపదాపి అజనపదా కతా. సో మనుస్సే వధిత్వా వధిత్వా అఙ్గులీనం మాలం ధారేతి. ఏతఞ్హి, సమణ, మగ్గం దసపి పురిసా వీసమ్పి పురిసా తింసమ్పి పురిసా చత్తారీసమ్పి పురిసా పఞ్ఞాసమ్పి పురిసా సఙ్కరిత్వా సఙ్కరిత్వా [సంహరిత్వా సంహరిత్వా (సీ. పీ.), సఙ్గరిత్వా (స్యా. కం.)] పటిపజ్జన్తి. తేపి చోరస్స అఙ్గులిమాలస్స హత్థత్థం గచ్ఛన్తీ’’తి. ఏవం వుత్తే, భగవా తుణ్హీభూతో అగమాసి. దుతియమ్పి ఖో గోపాలకా…పే… తతియమ్పి ఖో గోపాలకా పసుపాలకా కస్సకా పథావినో భగవన్తం ఏతదవోచుం – ‘‘మా, సమణ, ఏతం మగ్గం పటిపజ్జి, ఏతస్మిం సమణ మగ్గే చోరో అఙ్గులిమాలో నామ లుద్దో లోహితపాణి హతపహతే నివిట్ఠో అదయాపన్నో పాణభూతేసు, తేన గామాపి అగామా కతా, నిగమాపి అనిగమా కతా, జనపదాపి అజనపదా కతా. సో మనుస్సే వధిత్వా వధిత్వా అఙ్గులీనం మాలం ధారేతి. ఏతఞ్హి సమణ మగ్గం దసపి పురిసా వీసమ్పి పురిసా తింసమ్పి పురిసా చత్తారీసమ్పి పురిసా పఞ్ఞాసమ్పి పురిసా సఙ్కరిత్వా సఙ్కరిత్వా పటిపజ్జన్తి. తేపి చోరస్స అఙ్గులిమాలస్స హత్థత్థం గచ్ఛన్తీ’’తి.

౩౪౮. అథ ఖో భగవా తుణ్హీభూతో అగమాసి. అద్దసా ఖో చోరో అఙ్గులిమాలో భగవన్తం దూరతోవ ఆగచ్ఛన్తం. దిస్వానస్స ఏతదహోసి – ‘‘అచ్ఛరియం వత, భో, అబ్భుతం వత, భో! ఇమఞ్హి మగ్గం దసపి పురిసా వీసమ్పి పురిసా తింసమ్పి పురిసా చత్తారీసమ్పి పురిసా పఞ్ఞాసమ్పి పురిసా సఙ్కరిత్వా సఙ్కరిత్వా పటిపజ్జన్తి. తేపి మమ హత్థత్థం గచ్ఛన్తి. అథ చ పనాయం సమణో ఏకో అదుతియో పసయ్హ మఞ్ఞే ఆగచ్ఛతి. యంనూనాహం ఇమం సమణం జీవితా వోరోపేయ్య’’న్తి. అథ ఖో చోరో అఙ్గులిమాలో అసిచమ్మం గహేత్వా ధనుకలాపం సన్నయ్హిత్వా భగవన్తం పిట్ఠితో పిట్ఠితో అనుబన్ధి. అథ ఖో భగవా తథారూపం ఇద్ధాభిసఙ్ఖారం అభిసఙ్ఖాసి [అభిసఙ్ఖారేసి (స్యా. కం. క.)] యథా చోరో అఙ్గులిమాలో భగవన్తం పకతియా గచ్ఛన్తం సబ్బథామేన గచ్ఛన్తో న సక్కోతి సమ్పాపుణితుం. అథ ఖో చోరస్స అఙ్గులిమాలస్స ఏతదహోసి – ‘‘అచ్ఛరియం వత, భో, అబ్భుతం వత, భో! అహఞ్హి పుబ్బే హత్థిమ్పి ధావన్తం అనుపతిత్వా గణ్హామి, అస్సమ్పి ధావన్తం అనుపతిత్వా గణ్హామి, రథమ్పి ధావన్తం అనుపతిత్వా గణ్హామి, మిగమ్పి ధావన్తం అనుపతిత్వా గణ్హామి; అథ చ పనాహం ఇమం సమణం పకతియా గచ్ఛన్తం సబ్బథామేన గచ్ఛన్తో న సక్కోమి సమ్పాపుణితు’’న్తి! ఠితోవ భగవన్తం ఏతదవోచ – ‘‘తిట్ఠ, తిట్ఠ, సమణా’’తి. ‘‘ఠితో అహం, అఙ్గులిమాల, త్వఞ్చ తిట్ఠా’’తి. అథ ఖో చోరస్స అఙ్గులిమాలస్స ఏతదహోసి – ‘‘ఇమే ఖో సమణా సక్యపుత్తియా సచ్చవాదినో సచ్చపటిఞ్ఞా. అథ పనాయం సమణో గచ్ఛం యేవాహ – ‘ఠితో అహం, అఙ్గులిమాల, త్వఞ్చ తిట్ఠా’తి. యంనూనాహం ఇమం సమణం పుచ్ఛేయ్య’’న్తి.

౩౪౯. అథ ఖో చోరో అఙ్గులిమాలో భగవన్తం గాథాయ అజ్ఝభాసి –

‘‘గచ్ఛం వదేసి సమణ ఠితోమ్హి,

మమఞ్చ బ్రూసి ఠితమట్ఠితోతి;

పుచ్ఛామి తం సమణ ఏతమత్థం,

కథం ఠితో త్వం అహమట్ఠితోమ్హీ’’తి.

‘‘ఠితో అహం అఙ్గులిమాల సబ్బదా,

సబ్బేసు భూతేసు నిధాయ దణ్డం;

తువఞ్చ పాణేసు అసఞ్ఞతోసి,

తస్మా ఠితోహం తువమట్ఠితోసీ’’తి.

‘‘చిరస్సం వత మే మహితో మహేసీ,

మహావనం పాపుణి సచ్చవాదీ [మహావనం సమణోయం పచ్చుపాది (సీ.), మహావనం సమణ పచ్చుపాది (స్యా. కం.)];

సోహం చరిస్సామి పహాయ పాపం [సోహం చిరస్సాపి పహాస్సం పాపం (సీ.), సోహం చరిస్సామి పజహిస్సం పాపం (స్యా. కం.)],

సుత్వాన గాథం తవ ధమ్మయుత్తం’’.

ఇత్వేవ చోరో అసిమావుధఞ్చ,

సోబ్భే పపాతే నరకే అకిరి;

అవన్ది చోరో సుగతస్స పాదే,

తత్థేవ నం పబ్బజ్జం అయాచి.

బుద్ధో చ ఖో కారుణికో మహేసి,

యో సత్థా లోకస్స సదేవకస్స;

‘తమేహి భిక్ఖూ’తి తదా అవోచ,

ఏసేవ తస్స అహు భిక్ఖుభావోతి.

౩౫౦. అథ ఖో భగవా ఆయస్మతా అఙ్గులిమాలేన పచ్ఛాసమణేన యేన సావత్థి తేన చారికం పక్కామి. అనుపుబ్బేన చారికం చరమానో యేన సావత్థి తదవసరి. తత్ర సుదం భగవా సావత్థియం విహరతి జేతవనే అనాథపిణ్డికస్స ఆరామే. తేన ఖో పన సమయేన రఞ్ఞో పసేనదిస్స కోసలస్స అన్తేపురద్వారే మహాజనకాయో సన్నిపతిత్వా ఉచ్చాసద్దో మహాసద్దో హోతి – ‘‘చోరో తే, దేవ, విజితే అఙ్గులిమాలో నామ లుద్దో లోహితపాణి హతపహతే నివిట్ఠో అదయాపన్నో పాణభూతేసు. తేన గామాపి అగామా కతా, నిగమాపి అనిగమా కతా, జనపదాపి అజనపదా కతా. సో మనుస్సే వధిత్వా వధిత్వా అఙ్గులీనం మాలం ధారేతి. తం దేవో పటిసేధేతూ’’తి.

అథ ఖో రాజా పసేనది కోసలో పఞ్చమత్తేహి అస్ససతేహి సావత్థియా నిక్ఖమి దివా దివస్స. యేన ఆరామో తేన పావిసి. యావతికా యానస్స భూమి యానేన గన్త్వా యానా పచ్చోరోహిత్వా పత్తికోవ యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నం ఖో రాజానం పసేనదిం కోసలం భగవా ఏతదవోచ – ‘‘కిం ను తే, మహారాజ, రాజా వా మాగధో సేనియో బిమ్బిసారో కుపితో వేసాలికా వా లిచ్ఛవీ అఞ్ఞే వా పటిరాజానో’’తి? ‘‘న ఖో మే, భన్తే, రాజా మాగధో సేనియో బిమ్బిసారో కుపితో, నాపి వేసాలికా లిచ్ఛవీ, నాపి అఞ్ఞే పటిరాజానో. చోరో మే, భన్తే, విజితే అఙ్గులిమాలో నామ లుద్దో లోహితపాణి హతపహతే నివిట్ఠో అదయాపన్నో పాణభూతేసు. తేన గామాపి అగామా కతా, నిగమాపి అనిగమా కతా, జనపదాపి అజనపదా కతా. సో మనుస్సే వధిత్వా వధిత్వా అఙ్గులీనం మాలం ధారేతి. తాహం, భన్తే, పటిసేధిస్సామీ’’తి. ‘‘సచే పన త్వం, మహారాజ, అఙ్గులిమాలం పస్సేయ్యాసి కేసమస్సుం ఓహారేత్వా కాసాయాని వత్థాని అచ్ఛాదేత్వా అగారస్మా అనగారియం పబ్బజితం, విరతం పాణాతిపాతా, విరతం అదిన్నాదానా, విరతం ముసావాదా, ఏకభత్తికం, బ్రహ్మచారిం, సీలవన్తం, కల్యాణధమ్మం, కిన్తి నం కరేయ్యాసీ’’తి? ‘‘అభివాదేయ్యామ వా, భన్తే, పచ్చుట్ఠేయ్యామ వా ఆసనేన వా నిమన్తేయ్యామ, అభినిమన్తేయ్యామ వా నం చీవరపిణ్డపాతసేనాసనగిలానప్పచ్చయభేసజ్జపరిక్ఖారేహి, ధమ్మికం వా అస్స రక్ఖావరణగుత్తిం సంవిదహేయ్యామ. కుతో పనస్స, భన్తే, దుస్సీలస్స పాపధమ్మస్స ఏవరూపో సీలసంయమో భవిస్సతీ’’తి?

తేన ఖో పన సమయేన ఆయస్మా అఙ్గులిమాలో భగవతో అవిదూరే నిసిన్నో హోతి. అథ ఖో భగవా దక్ఖిణం బాహుం పగ్గహేత్వా రాజానం పసేనదిం కోసలం ఏతదవోచ – ‘‘ఏసో, మహారాజ, అఙ్గులిమాలో’’తి. అథ ఖో రఞ్ఞో పసేనదిస్స కోసలస్స అహుదేవ భయం, అహు ఛమ్భితత్తం, అహు లోమహంసో. అథ ఖో భగవా రాజానం పసేనదిం కోసలం భీతం సంవిగ్గం లోమహట్ఠజాతం విదిత్వా రాజానం పసేనదిం కోసలం ఏతదవోచ – ‘‘మా భాయి, మహారాజ, నత్థి తే ఇతో భయ’’న్తి. అథ ఖో రఞ్ఞో పసేనదిస్స కోసలస్స యం అహోసి భయం వా ఛమ్భితత్తం వా లోమహంసో వా సో పటిప్పస్సమ్భి. అథ ఖో రాజా పసేనది కోసలో యేనాయస్మా అఙ్గులిమాలో తేనుపసఙ్కమి; ఉపసఙ్కమిత్వా ఆయస్మన్తం అఙ్గులిమాలం ఏతదవోచ – ‘‘అయ్యో నో, భన్తే, అఙ్గులిమాలో’’తి? ‘‘ఏవం, మహారాజా’’తి. ‘‘కథంగోత్తో అయ్యస్స పితా, కథంగోత్తా మాతా’’తి? ‘‘గగ్గో ఖో, మహారాజ, పితా, మన్తాణీ మాతా’’తి. ‘‘అభిరమతు, భన్తే, అయ్యో గగ్గో మన్తాణిపుత్తో. అహమయ్యస్స గగ్గస్స మన్తాణిపుత్తస్స ఉస్సుక్కం కరిస్సామి చీవరపిణ్డపాతసేనాసనగిలానప్పచ్చయభేసజ్జపరిక్ఖారాన’’న్తి.

౩౫౧. తేన ఖో పన సమయేన ఆయస్మా అఙ్గులిమాలో ఆరఞ్ఞికో హోతి పిణ్డపాతికో పంసుకూలికో తేచీవరికో. అథ ఖో ఆయస్మా అఙ్గులిమాలో రాజానం పసేనదిం కోసలం ఏతదవోచ – ‘‘అలం, మహారాజ, పరిపుణ్ణం మే చీవర’’న్తి. అథ ఖో రాజా పసేనది కోసలో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో రాజా పసేనది కోసలో భగవన్తం ఏతదవోచ – ‘‘అచ్ఛరియం, భన్తే, అబ్భుతం, భన్తే! యావఞ్చిదం, భన్తే, భగవా అదన్తానం దమేతా, అసన్తానం సమేతా, అపరినిబ్బుతానం పరినిబ్బాపేతా. యఞ్హి మయం, భన్తే, నాసక్ఖిమ్హా దణ్డేనపి సత్థేనపి దమేతుం సో భగవతా అదణ్డేన అసత్థేనేవ [అసత్థేన (స్యా. కం.)] దన్తో. హన్ద చ దాని [హన్ద దాని (స్యా. కం. పీ.)] మయం, భన్తే, గచ్ఛామ; బహుకిచ్చా మయం బహుకరణీయా’’తి. ‘‘యస్సదాని, మహారాజ, కాలం మఞ్ఞసీ’’తి. అథ ఖో రాజా పసేనది కోసలో ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కామి.

అథ ఖో ఆయస్మా అఙ్గులిమాలో పుబ్బణ్హసమయం నివాసేత్వా పత్తచీవరమాదాయ సావత్థియం పిణ్డాయ పావిసి. అద్దసా ఖో ఆయస్మా అఙ్గులిమాలో సావత్థియం సపదానం పిణ్డాయ చరమానో అఞ్ఞతరం ఇత్థిం మూళ్హగబ్భం విఘాతగబ్భం [విసాతగబ్భం (స్యా. కం. పీ. క.)]. దిస్వానస్స ఏతదహోసి – ‘‘కిలిస్సన్తి వత, భో, సత్తా; కిలిస్సన్తి వత, భో, సత్తా’’తి! అథ ఖో ఆయస్మా అఙ్గులిమాలో సావత్థియం పిణ్డాయ చరిత్వా పచ్ఛాభత్తం పిణ్డపాతపటిక్కన్తో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా అఙ్గులిమాలో భగవన్తం ఏతదవోచ – ‘‘ఇధాహం, భన్తే, పుబ్బణ్హసమయం నివాసేత్వా పత్తచీవరమాదాయ సావత్థిం పిణ్డాయ పావిసిం. అద్దసం ఖో అహం, భన్తే, సావత్థియం సపదానం పిణ్డాయ చరమానో అఞ్ఞతరం ఇత్థిం మూళ్హగబ్భం విఘాతగబ్భం’’. దిస్వాన మయ్హం ఏతదహోసి – ‘‘కిలిస్సన్తి వత, భో, సత్తా; కిలిస్సన్తి వత, భో, సత్తా’’తి!

‘‘తేన హి త్వం, అఙ్గులిమాల, యేన సా ఇత్థీ తేనుపసఙ్కమ; ఉపసఙ్కమిత్వా తం ఇత్థిం ఏవం వదేహి – ‘యతోహం, భగిని, జాతో [భగిని జాతియా జాతో (సీ.)] నాభిజానామి సఞ్చిచ్చ పాణం జీవితా వోరోపేతా, తేన సచ్చేన సోత్థి తే హోతు, సోత్థి గబ్భస్సా’’’తి.

‘‘సో హి నూన మే, భన్తే, సమ్పజానముసావాదో భవిస్సతి. మయా హి, భన్తే, బహూ సఞ్చిచ్చ పాణా జీవితా వోరోపితా’’తి. ‘‘తేన హి త్వం, అఙ్గులిమాల, యేన సా ఇత్థీ తేనుపసఙ్కమ; ఉపసఙ్కమిత్వా తం ఇత్థిం ఏవం వదేహి – ‘యతోహం, భగిని, అరియాయ జాతియా జాతో, నాభిజానామి సఞ్చిచ్చ పాణం జీవితా వోరోపేతా, తేన సచ్చేన సోత్థి తే హోతు, సోత్థి గబ్భస్సా’’’తి.

‘‘ఏవం, భన్తే’’తి ఖో ఆయస్మా అఙ్గులిమాలో భగవతో పటిస్సుత్వా యేన సా ఇత్థీ తేనుపసఙ్కమి; ఉపసఙ్కమిత్వా తం ఇత్థిం ఏతదవోచ – ‘‘యతోహం, భగిని, అరియాయ జాతియా జాతో, నాభిజానామి సఞ్చిచ్చ పాణం జీవితా వోరోపేతా, తేన సచ్చేన సోత్థి తే హోతు, సోత్థి గబ్భస్సా’’తి. అథ ఖ్వాస్సా ఇత్థియా సోత్థి అహోసి, సోత్థి గబ్భస్స.

అథ ఖో ఆయస్మా అఙ్గులిమాలో ఏకో వూపకట్ఠో అప్పమత్తో ఆతాపీ పహితత్తో విహరన్తో నచిరస్సేవ – యస్సత్థాయ కులపుత్తా సమ్మదేవ అగారస్మా అనగారియం పబ్బజన్తి తదనుత్తరం – బ్రహ్మచరియపరియోసానం దిట్ఠేవ ధమ్మే సయం అభిఞ్ఞా సచ్ఛికత్వా ఉపసమ్పజ్జ విహాసి. ‘ఖీణా జాతి వుసితం బ్రహ్మచరియం, కతం కరణీయం, నాపరం ఇత్థత్తాయా’తి అబ్భఞ్ఞాసి. అఞ్ఞతరో ఖో పనాయస్మా అఙ్గులిమాలో అరహతం అహోసి.

౩౫౨. అథ ఖో ఆయస్మా అఙ్గులిమాలో పుబ్బణ్హసమయం నివాసేత్వా పత్తచీవరమాదాయ సావత్థిం పిణ్డాయ పావిసి. తేన ఖో పన సమయేన అఞ్ఞేనపి లేడ్డు ఖిత్తో ఆయస్మతో అఙ్గులిమాలస్స కాయే నిపతతి, అఞ్ఞేనపి దణ్డో ఖిత్తో ఆయస్మతో అఙ్గులిమాలస్స కాయే నిపతతి, అఞ్ఞేనపి సక్ఖరా ఖిత్తా ఆయస్మతో అఙ్గులిమాలస్స కాయే నిపతతి. అథ ఖో ఆయస్మా అఙ్గులిమాలో భిన్నేన సీసేన, లోహితేన గళన్తేన, భిన్నేన పత్తేన, విప్ఫాలితాయ సఙ్ఘాటియా యేన భగవా తేనుపసఙ్కమి. అద్దసా ఖో భగవా ఆయస్మన్తం అఙ్గులిమాలం దూరతోవ ఆగచ్ఛన్తం. దిస్వాన ఆయస్మన్తం అఙ్గులిమాలం ఏతదవోచ – ‘‘అధివాసేహి త్వం, బ్రాహ్మణ, అధివాసేహి త్వం, బ్రాహ్మణ. యస్స ఖో త్వం, బ్రాహ్మణ, కమ్మస్స విపాకేన బహూని వస్సాని బహూని వస్ససతాని బహూని వస్ససహస్సాని నిరయే పచ్చేయ్యాసి తస్స త్వం, బ్రాహ్మణ, కమ్మస్స విపాకం దిట్ఠేవ ధమ్మే పటిసంవేదేసీ’’తి. అథ ఖో ఆయస్మా అఙ్గులిమాలో రహోగతో పటిసల్లీనో విముత్తిసుఖం పటిసంవేది; తాయం వేలాయం ఇమం ఉదానం ఉదానేసి –

‘‘యో పుబ్బేవ [యో చ పుబ్బే (సీ. స్యా. కం. పీ.)] పమజ్జిత్వా, పచ్ఛా సో నప్పమజ్జతి;

సోమం [సో ఇమం (సీ.)] లోకం పభాసేతి, అబ్భా ముత్తోవ చన్దిమా.

‘‘యస్స పాపం కతం కమ్మం, కుసలేన పిధీయతి [పిథీయతి (సీ. స్యా. కం. పీ.)];

సోమం లోకం పభాసేతి, అబ్భా ముత్తోవ చన్దిమా.

‘‘యో హవే దహరో భిక్ఖు, యుఞ్జతి బుద్ధసాసనే;

సోమం లోకం పభాసేతి, అబ్భా ముత్తోవ చన్దిమా.

‘‘దిసా హి మే ధమ్మకథం సుణన్తు,

దిసా హి మే యుఞ్జన్తు బుద్ధసాసనే;

దిసా హి మే తే మనుజా భజన్తు,

యే ధమ్మమేవాదపయన్తి సన్తో.

‘‘దిసా హి మే ఖన్తివాదానం, అవిరోధప్పసంసీనం;

సుణన్తు ధమ్మం కాలేన, తఞ్చ అనువిధీయన్తు.

‘‘న హి జాతు సో మమం హింసే, అఞ్ఞం వా పన కిఞ్చి నం [కఞ్చి నం (సీ. స్యా. కం. పీ.), కఞ్చనం (?)];

పప్పుయ్య పరమం సన్తిం, రక్ఖేయ్య తసథావరే.

‘‘ఉదకఞ్హి నయన్తి నేత్తికా, ఉసుకారా నమయన్తి [దమయన్తి (క.)] తేజనం;

దారుం నమయన్తి తచ్ఛకా, అత్తానం దమయన్తి పణ్డితా.

‘‘దణ్డేనేకే దమయన్తి, అఙ్కుసేహి కసాహి చ;

అదణ్డేన అసత్థేన, అహం దన్తోమ్హి తాదినా.

‘‘అహింసకోతి మే నామం, హింసకస్స పురే సతో;

అజ్జాహం సచ్చనామోమ్హి, న నం హింసామి కిఞ్చి నం [కఞ్చి నం (సీ. స్యా. కం. పీ.), కఞ్చనం (?)].

‘‘చోరో అహం పురే ఆసిం, అఙ్గులిమాలోతి విస్సుతో;

వుయ్హమానో మహోఘేన, బుద్ధం సరణమాగమం.

‘‘లోహితపాణి పురే ఆసిం, అఙ్గులిమాలోతి విస్సుతో;

సరణగమనం పస్స, భవనేత్తి సమూహతా.

‘‘తాదిసం కమ్మం కత్వాన, బహుం దుగ్గతిగామినం;

ఫుట్ఠో కమ్మవిపాకేన, అణణో భుఞ్జామి భోజనం.

‘‘పమాదమనుయుఞ్జన్తి, బాలా దుమ్మేధినో జనా;

అప్పమాదఞ్చ మేధావీ, ధనం సేట్ఠంవ రక్ఖతి.

‘‘మా పమాదమనుయుఞ్జేథ, మా కామరతి సన్థవం;

అప్పమత్తో హి ఝాయన్తో, పప్పోతి విపులం [పరమం (క.)] సుఖం.

‘‘స్వాగతం [సాగతం (సీ. పీ.)] నాపగతం [నామ సగతం (క.)], నయిదం దుమ్మన్తితం మమ;

సంవిభత్తేసు [సువిభత్తేసు (స్యా. కం.), సవిభత్తేసు (సీ. క.), పటిభత్తేసు (పీ.)] ధమ్మేసు, యం సేట్ఠం తదుపాగమం.

‘‘స్వాగతం నాపగతం, నయిదం దుమ్మన్తితం మమ;

తిస్సో విజ్జా అనుప్పత్తా, కతం బుద్ధస్స సాసన’’న్తి.

అఙ్గులిమాలసుత్తం నిట్ఠితం ఛట్ఠం.