౧౦. మారతజ్జనీయసుత్తం
౫౦౬. ఏవం మే సుతం – ఏకం సమయం ఆయస్మా మహామోగ్గల్లానో భగ్గేసు విహరతి సుసుమారగిరే భేసకళావనే మిగదాయే. తేన ఖో పన సమయేన ఆయస్మా మహామోగ్గల్లానో అబ్భోకాసే చఙ్కమతి. తేన ఖో పన సమయేన మారో పాపిమా ఆయస్మతో మహామోగ్గల్లానస్స కుచ్ఛిగతో హోతి కోట్ఠమనుపవిట్ఠో. అథ ఖో ఆయస్మతో మహామోగ్గల్లానస్స ఏతదహోసి – ‘‘కిం ను ఖో మే కుచ్ఛి గరుగరో వియ [గరు గరు వియ (సీ. పీ. టీకాయం పాఠన్తరం)]? మాసాచితం మఞ్ఞే’’తి. అథ ఖో ఆయస్మా మహామోగ్గల్లానో చఙ్కమా ఓరోహిత్వా విహారం పవిసిత్వా పఞ్ఞత్తే ఆసనే నిసీది. నిసజ్జ ఖో ఆయస్మా మహామోగ్గల్లానో పచ్చత్తం యోనిసో మనసాకాసి. అద్దసా ఖో ఆయస్మా మహామోగ్గల్లానో మారం పాపిమన్తం కుచ్ఛిగతం కోట్ఠమనుపవిట్ఠం. దిస్వాన మారం పాపిమన్తం ఏతదవోచ – ‘‘నిక్ఖమ, పాపిమ; నిక్ఖమ, పాపిమ! మా తథాగతం విహేసేసి, మా తథాగతసావకం. మా తే అహోసి దీఘరత్తం అహితాయ దుక్ఖాయా’’తి. అథ ఖో మారస్స పాపిమతో ఏతదహోసి – ‘‘అజానమేవ ఖో మం అయం సమణో అపస్సం ఏవమాహ – ‘నిక్ఖమ, పాపిమ; నిక్ఖమ, పాపిమ! మా తథాగతం విహేసేసి, మా తథాగతసావకం. మా తే అహోసి దీఘరత్తం అహితాయ దుక్ఖాయా’తి. యోపిస్స సో సత్థా సోపి మం నేవ ఖిప్పం జానేయ్య, కుతో పన [కుతో చ పన (స్యా.)] మం అయం సావకో జానిస్సతీ’’తి? అథ ఖో ఆయస్మా మహామోగ్గల్లానో మారం పాపిమన్తం ఏతదవోచ – ‘‘ఏవమ్పి ఖో తాహం, పాపిమ, జానామి, మా త్వం మఞ్ఞిత్థో – ‘న మం జానాతీ’తి. మారో త్వమసి, పాపిమ; తుయ్హఞ్హి, పాపిమ, ఏవం హోతి – ‘అజానమేవ ఖో మం అయం సమణో అపస్సం ఏవమాహ – నిక్ఖమ, పాపిమ; నిక్ఖమ, పాపిమ! మా తథాగతం విహేసేసి, మా తథాగతసావకం. మా తే అహోసి దీఘరత్తం అహితాయ దుక్ఖాయాతి. యోపిస్స సో సత్థా సోపి మం నేవ ఖిప్పం జానేయ్య, కుతో పన మం అయం సావకో జానిస్సతీ’’’తి?
అథ ఖో మారస్స పాపిమతో ఏతదహోసి – ‘‘జానమే ఖో మం అయం సమణో పస్సం ఏవమాహ – ‘నిక్ఖమ, పాపిమ; నిక్ఖమ, పాపిమ! మా తథాగతం విహేసేసి, మా తథాగతసావకం. మా తే అహోసి దీఘరత్తం అహితాయ దుక్ఖాయా’’’తి. అథ ఖో మారో పాపిమా ఆయస్మతో మహామోగ్గల్లానస్స ముఖతో ఉగ్గన్త్వా పచ్చగ్గళే అట్ఠాసి.
౫౦౭. అద్దసా ఖో ఆయస్మా మహామోగ్గల్లానో మారం పాపిమన్తం పచ్చగ్గళే ఠితం; దిస్వాన మారం పాపిమన్తం ఏతదవోచ – ‘ఏత్థాపి ఖో తాహం, పాపిమ, పస్సామి; మా త్వం మఞ్ఞిత్థో ‘‘న మం పస్సతీ’’తి. ఏసో త్వం, పాపిమ, పచ్చగ్గళే ఠితో. భూతపుబ్బాహం, పాపిమ, దూసీ నామ మారో అహోసిం, తస్స మే కాళీ నామ భగినీ. తస్సా త్వం పుత్తో. సో మే త్వం భాగినేయ్యో అహోసి. తేన ఖో పన, పాపిమ, సమయేన కకుసన్ధో భగవా అరహం సమ్మాసమ్బుద్ధో లోకే ఉప్పన్నో హోతి. కకుసన్ధస్స ఖో పన, పాపిమ, భగవతో అరహతో సమ్మాసమ్బుద్ధస్స విధురసఞ్జీవం నామ సావకయుగం అహోసి అగ్గం భద్దయుగం. యావతా ఖో పన, పాపిమ, కకుసన్ధస్స భగవతో అరహతో సమ్మాసమ్బుద్ధస్స సావకా. తేసు న చ కోచి ఆయస్మతా విధురేన సమసమో హోతి యదిదం ధమ్మదేసనాయ. ఇమినా ఖో ఏవం [ఏతం (సీ. స్యా. పీ.)], పాపిమ, పరియాయేన ఆయస్మతో విధురస్స విధురోతేవ [విధురస్స విధురో విధురోత్వేవ (సీ. స్యా. కం. పీ.)] సమఞ్ఞా ఉదపాది.
‘‘ఆయస్మా పన, పాపిమ, సఞ్జీవో అరఞ్ఞగతోపి రుక్ఖమూలగతోపి సుఞ్ఞాగారగతోపి అప్పకసిరేనేవ సఞ్ఞావేదయితనిరోధం సమాపజ్జతి. భూతపుబ్బం, పాపిమ, ఆయస్మా సఞ్జీవో అఞ్ఞతరస్మిం రుక్ఖమూలే సఞ్ఞావేదయితనిరోధం సమాపన్నో నిసిన్నో హోతి. అద్దసంసు ఖో, పాపిమ, గోపాలకా పసుపాలకా కస్సకా పథావినో ఆయస్మన్తం సఞ్జీవం అఞ్ఞతరస్మిం రుక్ఖమూలే సఞ్ఞావేదయితనిరోధం సమాపన్నం నిసిన్నం; దిస్వాన తేసం ఏతదహోసి – ‘అచ్ఛరియం వత, భో, అబ్భుతం వత, భో! అయం సమణో నిసిన్నకోవ కాలఙ్కతో! హన్ద నం దహామా’తి. అథ ఖో తే, పాపిమ, గోపాలకా పసుపాలకా కస్సకా పథావినో తిణఞ్చ కట్ఠఞ్చ గోమయఞ్చ సంకడ్ఢిత్వా ఆయస్మతో సఞ్జీవస్స కాయే ఉపచినిత్వా అగ్గిం దత్వా పక్కమింసు. అథ ఖో, పాపిమ, ఆయస్మా సఞ్జీవో తస్సా రత్తియా అచ్చయేన తాయ సమాపత్తియా వుట్ఠహిత్వా చీవరాని పప్ఫోటేత్వా పుబ్బణ్హసమయం నివాసేత్వా పత్తచీవరమాదాయ గామం పిణ్డాయ పావిసి. అద్దసంసు ఖో తే, పాపిమ, గోపాలకా పసుపాలకా కస్సకా పథావినో ఆయస్మన్తం సఞ్జీవం పిణ్డాయ చరన్తం; దిస్వాన నేసం ఏతదహోసి – ‘అచ్ఛరియం వత, భో, అబ్భుతం వత, భో! అయం సమణో నిసిన్నకోవ కాలఙ్కతో, స్వాయం పటిసఞ్జీవితో’తి. ఇమినా ఖో ఏవం, పాపిమ, పరియాయేన ఆయస్మతో సఞ్జీవస్స సఞ్జీవోతేవ [సఞ్జీవో సఞ్జీవోత్వేవ (సీ. స్యా. కం. పీ.)] సమఞ్ఞా ఉదపాది.
౫౦౮. ‘‘అథ ఖో, పాపిమ, దూసిస్స మారస్స ఏతదహోసి – ‘ఇమేసం ఖో అహం భిక్ఖూనం సీలవన్తానం కల్యాణధమ్మానం నేవ జానామి ఆగతిం వా గతిం వా. యంనూనాహం బ్రాహ్మణగహపతికే అన్వావిసేయ్యం – ఏథ, తుమ్హే భిక్ఖూ సీలవన్తే కల్యాణధమ్మే అక్కోసథ పరిభాసథ రోసేథ విహేసేథ. అప్పేవ నామ తుమ్హేహి అక్కోసియమానానం పరిభాసియమానానం రోసియమానానం విహేసియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతార’న్తి. అథ ఖో తే, పాపిమ, దూసీ మారో బ్రాహ్మణగహపతికే అన్వావిసి – ‘ఏథ, తుమ్హే భిక్ఖూ సీలవన్తే కల్యాణధమ్మే అక్కోసథ పరిభాసథ రోసేథ విహేసేథ. అప్పేవ నామ తుమ్హేహి అక్కోసియమానానం పరిభాసియమానానం రోసియమానానం విహేసియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతార’న్తి.
‘‘అథ ఖో తే, పాపిమ, బ్రాహ్మణగహపతికా అన్వావిసిట్ఠా దూసినా మారేన భిక్ఖూ సీలవన్తే కల్యాణధమ్మే అక్కోసన్తి పరిభాసన్తి రోసేన్తి విహేసేన్తి – ‘ఇమే పన ముణ్డకా సమణకా ఇబ్భా కిణ్హా [కణ్హా (స్యా. కం. క.)] బన్ధుపాదాపచ్చా ‘‘ఝాయినోస్మా ఝాయినోస్మా’’తి పత్తక్ఖన్ధా అధోముఖా మధురకజాతా ఝాయన్తి పజ్ఝాయన్తి నిజ్ఝాయన్తి అపజ్ఝాయన్తి. సేయ్యథాపి నామ ఉలూకో రుక్ఖసాఖాయం మూసికం మగ్గయమానో ఝాయతి పజ్ఝాయతి నిజ్ఝాయతి అపజ్ఝాయతి; ఏవమేవిమే ముణ్డకా సమణకా ఇబ్భా కిణ్హా బన్ధుపాదాపచ్చా ‘‘ఝాయినోస్మా ఝాయినోస్మా’’తి పత్తక్ఖన్ధా అధోముఖా మధురకజాతా ఝాయన్తి పజ్ఝాయన్తి నిజ్ఝాయన్తి అపజ్ఝాయన్తి. సేయ్యథాపి నామ కోత్థు నదీతీరే మచ్ఛే మగ్గయమానో ఝాయతి పజ్ఝాయతి నిజ్ఝాయతి అపజ్ఝాయతి; ఏవమేవిమే ముణ్డకా సమణకా ఇబ్భా కిణ్హా బన్ధుపాదాపచ్చా ‘‘ఝాయినోస్మా ఝాయినోస్మా’’తి పత్తక్ఖన్ధా అధోముఖా మధురకజాతా ఝాయన్తి పజ్ఝాయన్తి నిజ్ఝాయన్తి అపజ్ఝాయన్తి. సేయ్యథాపి నామ బిళారో సన్ధిసమలసఙ్కటీరే మూసికం మగ్గయమానో ఝాయతి పజ్ఝాయతి నిజ్ఝాయతి అపజ్ఝాయతి; ఏవమేవిమే ముణ్డకా సమణకా ఇబ్భా కిణ్హా బన్ధుపాదాపచ్చా ‘‘ఝాయినోస్మా ఝాయినోస్మా’’తి పత్తక్ఖన్ధా అధోముఖా మధురకజాతా ఝాయన్తి పజ్ఝాయన్తి నిజ్ఝాయన్తి అపజ్ఝాయన్తి. సేయ్యథాపి నామ గద్రభో వహచ్ఛిన్నో సన్ధిసమలసఙ్కటీరే ఝాయతి పజ్ఝాయతి నిజ్ఝాయతి అపజ్ఝాయతి, ఏవమేవిమే ముణ్డకా సమణకా ఇబ్భా కిణ్హా బన్ధుపాదాపచ్చా ‘‘ఝాయినోస్మా ఝాయినోస్మా’’తి పత్తక్ఖన్ధా అధోముఖా మధురకజాతా ఝాయన్తి పజ్ఝాయన్తి నిజ్ఝాయన్తి అపజ్ఝాయన్తీ’’తి.
‘‘యే ఖో పన, పాపిమ, తేన సమయేన మనుస్సా కాలఙ్కరోన్తి యేభుయ్యేన కాయస్స భేదా పరం మరణా అపాయం దుగ్గతిం వినిపాతం నిరయం ఉపపజ్జన్తి.
౫౦౯. ‘‘అథ ఖో, పాపిమ, కకుసన్ధో భగవా అరహం సమ్మాసమ్బుద్ధో భిక్ఖూ ఆమన్తేసి – ‘అన్వావిట్ఠా ఖో, భిక్ఖవే, బ్రాహ్మణగహపతికా దూసినా మారేన – ఏథ, తుమ్హే భిక్ఖూ సీలవన్తే కల్యాణధమ్మే అక్కోసథ పరిభాసథ రోసేథ విహేసేథ, అప్పేవ నామ తుమ్హేహి అక్కోసియమానానం పరిభాసియమానానం రోసియమానానం విహేసియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతార’న్తి. ఏథ, తుమ్హే, భిక్ఖవే, మేత్తాసహగతేన చేతసా ఏకం దిసం ఫరిత్వా విహరథ, తథా దుతియం, తథా తతియం, తథా చతుత్థం. ఇతి ఉద్ధమధో తిరియం సబ్బధి సబ్బత్తతాయ సబ్బావన్తం లోకం మేత్తాసహగతేన చేతసా విపులేన మహగ్గతేన అప్పమాణేన అవేరేన అబ్యాబజ్ఝేన ఫరిత్వా విహరథ. కరుణాసహగతేన చేతసా…పే… ముదితాసహగతేన చేతసా…పే… ఉపేక్ఖాసహగతేన చేతసా ఏకం దిసం ఫరిత్వా విహరథ, తథా దుతియం, తథా తతియం, తథా చతుత్థం. ఇతి ఉద్ధమధో తిరియం సబ్బధి సబ్బత్తతాయ సబ్బావన్తం లోకం ఉపేక్ఖాసహగతేన చేతసా విపులేన మహగ్గతేన అప్పమాణేన అవేరేన అబ్యాబజ్ఝేన ఫరిత్వా విహరథా’తి.
‘‘అథ ఖో తే, పాపిమ, భిక్ఖూ కకుసన్ధేన భగవతా అరహతా సమ్మాసమ్బుద్ధేన ఏవం ఓవదియమానా ఏవం అనుసాసియమానా అరఞ్ఞగతాపి రుక్ఖమూలగతాపి సుఞ్ఞాగారగతాపి మేత్తాసహగతేన చేతసా ఏకం దిసం ఫరిత్వా విహరింసు, తథా దుతియం, తథా తతియం, తథా చతుత్థం. ఇతి ఉద్ధమధో తిరియం సబ్బధి సబ్బత్తతాయ సబ్బావన్తం లోకం మేత్తాసహగతేన చేతసా విపులేన మహగ్గతేన అప్పమాణేన అవేరేన అబ్యాబజ్ఝేన ఫరిత్వా విహరింసు. కరుణాసహగతేన చేతసా…పే… ముదితాసహగతేన చేతసా…పే… ఉపేక్ఖాసహగతేన చేతసా ఏకం దిసం ఫరిత్వా విహరింసు, తథా దుతియం, తథా తతియం, తథా చతుత్థం. ఇతి ఉద్ధమధో తిరియం సబ్బధి సబ్బత్తతాయ సబ్బావన్తం లోకం ఉపేక్ఖాసహగతేన చేతసా విపులేన మహగ్గతేన అప్పమాణేన అవేరేన అబ్యాబజ్ఝేన ఫరిత్వా విహరింసు.
౫౧౦. ‘‘అథ ఖో, పాపిమ, దూసిస్స మారస్స ఏతదహోసి – ‘ఏవమ్పి ఖో అహం కరోన్తో ఇమేసం భిక్ఖూనం సీలవన్తానం కల్యాణధమ్మానం నేవ జానామి ఆగతిం వా గతిం వా, యంనూనాహం బ్రాహ్మణగహపతికే అన్వావిసేయ్యం – ఏథ, తుమ్హే భిక్ఖూ సీలవన్తే కల్యాణధమ్మే సక్కరోథ గరుం కరోథ మానేథ పూజేథ, అప్పేవ నామ తుమ్హేహి సక్కరియమానానం గరుకరియమానానం మానియమానానం పూజియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతార’న్తి. అథ ఖో తే, పాపిమ, దూసీ మారో బ్రాహ్మణగహపతికే అన్వావిసి – ‘ఏథ, తుమ్హే భిక్ఖూ సీలవన్తే కల్యాణధమ్మే సక్కరోథ గరుం కరోథ మానేథ పూజేథ, అప్పేవ నామ తుమ్హేహి సక్కరియమానానం గరుకరియమానానం మానియమానానం పూజియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతార’న్తి. అథ ఖో తే, పాపిమ, బ్రాహ్మణగహపతికా అన్వావిట్ఠా దూసినా మారేన భిక్ఖూ సీలవన్తే కల్యాణధమ్మే సక్కరోన్తి గరుం కరోన్తి మానేన్తి పూజేన్తి.
‘‘యే ఖో పన, పాపిమ, తేన సమయేన మనుస్సా కాలఙ్కరోన్తి యేభుయ్యేన కాయస్స భేదా పరం మరణా సుగతిం సగ్గం లోకం ఉపపజ్జన్తి.
౫౧౧. ‘‘అథ ఖో, పాపిమ, కకుసన్ధో భగవా అరహం సమ్మాసమ్బుద్ధో భిక్ఖూ ఆమన్తేసి – ‘అన్వావిట్ఠా ఖో, భిక్ఖవే, బ్రాహ్మణగహపతికా దూసినా మారేన – ఏథ, తుమ్హే భిక్ఖూ సీలవన్తే కల్యాణధమ్మే సక్కరోథ గరుం కరోథ మానేథ పూజేథ, అప్పేవ నామ తుమ్హేహి సక్కరియమానానం గరుకరియమానానం మానియమానానం పూజియమానానం సియా చిత్తస్స అఞ్ఞథత్తం, యథా తం దూసీ మారో లభేథ ఓతారన్తి. ఏథ, తుమ్హే, భిక్ఖవే, అసుభానుపస్సినో కాయే విహరథ, ఆహారే పటికూలసఞ్ఞినో, సబ్బలోకే అనభిరతిసఞ్ఞినో [అనభిరతసఞ్ఞీనో (సీ. స్యా. కం. పీ.)], సబ్బసఙ్ఖారేసు అనిచ్చానుపస్సినో’తి.
‘‘అథ ఖో తే, పాపిమ, భిక్ఖూ కకుసన్ధేన భగవతా అరహతా సమ్మాసమ్బుద్ధేన ఏవం ఓవదియమానా ఏవం అనుసాసియమానా అరఞ్ఞగతాపి రుక్ఖమూలగతాపి సుఞ్ఞాగారగతాపి అసుభానుపస్సినో కాయే విహరింసు, ఆహారే పటికూలసఞ్ఞినో, సబ్బలోకే అనభిరతిసఞ్ఞినో, సబ్బసఙ్ఖారేసు అనిచ్చానుపస్సినో.
౫౧౨. ‘‘అథ ఖో, పాపిమ, కకుసన్ధో భగవా అరహం సమ్మాసమ్బుద్ధో పుబ్బణ్హసమయం నివాసేత్వా పత్తచీవరమాదాయ ఆయస్మతా విధురేన పచ్ఛాసమణేన గామం పిణ్డాయ పావిసి. అథ ఖో, పాపిమ, దూసీ మారో అఞ్ఞతరం కుమారకం [కుమారం (సీ. పీ.)] అన్వావిసిత్వా సక్ఖరం గహేత్వా ఆయస్మతో విధురస్స సీసే పహారమదాసి; సీసం వోభిన్ది [సీసం తే భిన్దిస్సామీతి (క.)]. అథ ఖో, పాపిమ, ఆయస్మా విధురో భిన్నేన సీసేన లోహితేన గళన్తేన కకుసన్ధంయేవ భగవన్తం అరహన్తం సమ్మాసమ్బుద్ధం పిట్ఠితో పిట్ఠితో అనుబన్ధి. అథ ఖో, పాపిమ, కకుసన్ధో భగవా అరహం సమ్మాసమ్బుద్ధో నాగాపలోకితం అపలోకేసి – ‘న వాయం దూసీ మారో మత్తమఞ్ఞాసీ’తి. సహాపలోకనాయ చ పన, పాపిమ, దూసీ మారో తమ్హా చ ఠానా చవి మహానిరయఞ్చ ఉపపజ్జి.
‘‘తస్స ఖో పన, పాపిమ, మహానిరయస్స తయో నామధేయ్యా హోన్తి – ఛఫస్సాయతనికో ఇతిపి, సఙ్కుసమాహతో ఇతిపి, పచ్చత్తవేదనియో ఇతిపి. అథ ఖో మం, పాపిమ, నిరయపాలా ఉపసఙ్కమిత్వా ఏతదవోచుం – యదా ఖో తే [యతో తే (క.)], మారిస, సఙ్కునా సఙ్కు హదయే సమాగచ్ఛేయ్య. అథ నం త్వం జానేయ్యాసి – ‘వస్ససహస్సం మే నిరయే పచ్చమానస్సా’తి. సో ఖో అహం, పాపిమ, బహూని వస్సాని బహూని వస్ససతాని బహూని వస్ససహస్సాని తస్మిం మహానిరయే అపచ్చిం. దసవస్ససహస్సాని తస్సేవ మహానిరయస్స ఉస్సదే అపచ్చిం వుట్ఠానిమం నామ వేదనం వేదియమానో. తస్స మయ్హం, పాపిమ, ఏవరూపో కాయో హోతి, సేయ్యథాపి మనుస్సస్స. ఏవరూపం సీసం హోతి, సేయ్యథాపి మచ్ఛస్స.
౫౧౩. ‘‘కీదిసో నిరయో ఆసి, యత్థ దూసీ అపచ్చథ;
విధురం సావకమాసజ్జ, కకుసన్ధఞ్చ బ్రాహ్మణం.
‘‘సతం ఆసి అయోసఙ్కూ, సబ్బే పచ్చత్తవేదనా;
ఈదిసో నిరయో ఆసి, యత్థ దూసీ అపచ్చథ;
విధురం సావకమాసజ్జ, కకుసన్ధఞ్చ బ్రాహ్మణం.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘మజ్ఝే సరస్స తిట్ఠన్తి, విమానా కప్పట్ఠాయినో;
వేళురియవణ్ణా రుచిరా, అచ్చిమన్తో పభస్సరా;
అచ్ఛరా తత్థ నచ్చన్తి, పుథు నానత్తవణ్ణియో.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘యో వే బుద్ధేన చోదితో, భిక్ఖు సఙ్ఘస్స పేక్ఖతో;
మిగారమాతుపాసాదం, పాదఙ్గుట్ఠేన కమ్పయి.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘యో వేజయన్తం పాసాదం, పాదఙ్గుట్ఠేన కమ్పయి;
ఇద్ధిబలేనుపత్థద్ధో, సంవేజేసి చ దేవతా.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘యో వేజయన్తపాసాదే, సక్కం సో పరిపుచ్ఛతి;
అపి వాసవ జానాసి, తణ్హాక్ఖయవిముత్తియో;
తస్స సక్కో వియాకాసి, పఞ్హం పుట్ఠో యథాతథం.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘యో బ్రహ్మం పరిపుచ్ఛతి, సుధమ్మాయాభితో సభం;
అజ్జాపి త్యావుసో దిట్ఠి, యా తే దిట్ఠి పురే అహు;
పస్ససి వీతివత్తన్తం, బ్రహ్మలోకే పభస్సరం.
‘‘తస్స బ్రహ్మా వియాకాసి, అనుపుబ్బం యథాతథం;
న మే మారిస సా దిట్ఠి, యా మే దిట్ఠి పురే అహు.
‘‘పస్సామి వీతివత్తన్తం, బ్రహ్మలోకే పభస్సరం;
సోహం అజ్జ కథం వజ్జం, అహం నిచ్చోమ్హి సస్సతో.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘యో మహామేరునో కూటం, విమోక్ఖేన అఫస్సయి;
వనం పుబ్బవిదేహానం, యే చ భూమిసయా నరా.
‘‘యో ఏతమభిజానాతి, భిక్ఖు బుద్ధస్స సావకో;
తాదిసం భిక్ఖుమాసజ్జ, కణ్హ దుక్ఖం నిగచ్ఛసి.
‘‘న వే అగ్గి చేతయతి [వేఠయతి (సీ.)], ‘అహం బాలం డహామీ’తి;
బాలో చ జలితం అగ్గిం, ఆసజ్జ నం స డయ్హతి.
‘‘ఏవమేవ తువం మార, ఆసజ్జ నం తథాగతం;
సయం డహిస్ససి అత్తానం, బాలో అగ్గింవ సంఫుసం.
‘‘అపుఞ్ఞం పసవీ మారో, ఆసజ్జ నం తథాగతం;
కిన్ను మఞ్ఞసి పాపిమ, న మే పాపం విపచ్చతి.
‘‘కరోతో చీయతి పాపం, చిరరత్తాయ అన్తక;
మార నిబ్బిన్ద బుద్ధమ్హా, ఆసం మాకాసి భిక్ఖుసు.
‘‘ఇతి మారం అతజ్జేసి, భిక్ఖు భేసకళావనే;
తతో సో దుమ్మనో యక్ఖో, నతత్థేవన్తరధాయథా’’తి.
మారతజ్జనీయసుత్తం నిట్ఠితం దసమం.
చూళయమకవగ్గో నిట్ఠితో పఞ్చమో.
తస్సుద్దానం –
సాలేయ్య వేరఞ్జదువే చ తుట్ఠి, చూళమహాధమ్మసమాదానఞ్చ;
వీమంసకా కోసమ్బి చ బ్రాహ్మణో, దూసీ చ మారో దసమో చ వగ్గో.
సాలేయ్యవగ్గో నిట్ఠితో పఞ్చమో.