౯. మహాసారోపమసుత్తం

౩౦౭. ఏవం మే సుతం – ఏకం సమయం భగవా రాజగహే విహరతి గిజ్ఝకూటే పబ్బతే అచిరపక్కన్తే దేవదత్తే. తత్ర ఖో భగవా దేవదత్తం ఆరబ్భ భిక్ఖూ ఆమన్తేసి –

‘‘ఇధ, భిక్ఖవే, ఏకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన అత్తమనో హోతి పరిపుణ్ణసఙ్కప్పో. సో తేన లాభసక్కారసిలోకేన అత్తానుక్కంసేతి పరం వమ్భేతి – ‘అహమస్మి లాభసక్కారసిలోకవా [లాభీ సిలోకవా (సీ. పీ.), లాభీ సక్కార సిలోకవా (స్యా.)], ఇమే పనఞ్ఞే భిక్ఖూ అప్పఞ్ఞాతా అప్పేసక్ఖా’తి. సో తేన లాభసక్కారసిలోకేన మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి.

‘‘సేయ్యథాపి, భిక్ఖవే, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం అతిక్కమ్మ పపటికం, సాఖాపలాసం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం [తథాపాయం (క.)] భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం అతిక్కమ్మ పపటికం, సాఖాపలాసం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి. ఏవమేవ ఖో, భిక్ఖవే, ఇధేకచ్చో కులపుత్తో సద్ధా అగారస్మా అనగారియం పబ్బజితో హోతి – ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన అత్తమనో హోతి పరిపుణ్ణసఙ్కప్పో. సో తేన లాభసక్కారసిలోకేన అత్తానుక్కంసేతి, పరం వమ్భేతి ‘అహమస్మి లాభసక్కారసిలోకవా, ఇమే పనఞ్ఞే భిక్ఖూ అప్పఞ్ఞాతా అప్పేసక్ఖా’తి. సో తేన లాభసక్కారసిలోకేన మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి. అయం వుచ్చతి, భిక్ఖవే, భిక్ఖు సాఖాపలాసం అగ్గహేసి బ్రహ్మచరియస్స; తేన చ వోసానం ఆపాది.

౩౦౮. ‘‘ఇధ పన, భిక్ఖవే, ఏకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి. అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి పరిపుణ్ణసఙ్కప్పో. సో తాయ సీలసమ్పదాయ అత్తానుక్కంసేతి, పరం వమ్భేతి – ‘అహమస్మి సీలవా కల్యాణధమ్మో, ఇమే పనఞ్ఞే భిక్ఖూ దుస్సీలా పాపధమ్మా’తి. సో తాయ సీలసమ్పదాయ మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి.

‘‘సేయ్యథాపి, భిక్ఖవే, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం, పపటికం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం, పపటికం ఛేత్వా ఆదాయ పక్కన్తో ‘సార’న్తి మఞ్ఞమానో; యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

‘‘ఏవమేవ ఖో, భిక్ఖవే, ఇధేకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి. అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి పరిపుణ్ణసఙ్కప్పో. సో తాయ సీలసమ్పదాయ అత్తానుక్కంసేతి, పరం వమ్భేతి – ‘అహమస్మి సీలవా కల్యాణధమ్మో, ఇమే పనఞ్ఞే భిక్ఖూ దుస్సీలా పాపధమ్మా’తి. సో తాయ సీలసమ్పదాయ మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి. అయం వుచ్చతి, భిక్ఖవే, భిక్ఖు పపటికం అగ్గహేసి బ్రహ్మచరియస్స; తేన చ వోసానం ఆపాది.

౩౦౯. ‘‘ఇధ పన, భిక్ఖవే, ఏకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి. అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి పరిపుణ్ణసఙ్కప్పో. సో తాయ సమాధిసమ్పదాయ అత్తానుక్కంసేతి, పరం వమ్భేతి – ‘అహమస్మి సమాహితో ఏకగ్గచిత్తో, ఇమే పనఞ్ఞే భిక్ఖూ అసమాహితా విబ్భన్తచిత్తా’తి. సో తాయ సమాధిసమ్పదాయ మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి.

‘‘సేయ్యథాపి, భిక్ఖవే, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం తచం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం తచం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

‘‘ఏవమేవ ఖో, భిక్ఖవే, ఇధేకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి పరిపుణ్ణసఙ్కప్పో. సో తాయ సమాధిసమ్పదాయ అత్తానుక్కంసేతి, పరం వమ్భేతి – ‘అహమస్మి సమాహితో ఏకగ్గచిత్తో, ఇమే పనఞ్ఞే భిక్ఖూ అసమాహితా విబ్భన్తచిత్తా’తి. సో తాయ సమాధిసమ్పదాయ మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి. అయం వుచ్చతి, భిక్ఖవే, భిక్ఖు తచం అగ్గహేసి బ్రహ్మచరియస్స; తేన చ వోసానం ఆపాది.

౩౧౦. ‘‘ఇధ పన, భిక్ఖవే, ఏకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి. అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సో తాయ సమాధిసమ్పదాయ న మజ్జతి నప్పమజ్జతి న పమాదం ఆపజ్జతి అప్పమత్తో సమానో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి పరిపుణ్ణసఙ్కప్పో. సో తేన ఞాణదస్సనేన అత్తానుక్కంసేతి, పరం వమ్భేతి – ‘అహమస్మి జానం పస్సం విహరామి. ఇమే పనఞ్ఞే భిక్ఖూ అజానం అపస్సం విహరన్తీ’తి. సో తేన ఞాణదస్సనేన మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి.

‘‘సేయ్యథాపి, భిక్ఖవే, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం ఫేగ్గుం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం న అఞ్ఞాసి ఫేగ్గుం న అఞ్ఞాసి తచం న అఞ్ఞాసి పపటికం న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం ఫేగ్గుం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి. ఏవమేవ ఖో, భిక్ఖవే, ఇధేకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సో తాయ సమాధిసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి పరిపుణ్ణసఙ్కప్పో. సో తేన ఞాణదస్సనేన అత్తానుక్కంసేతి, పరం వమ్భేతి – ‘అహమస్మి జానం పస్సం విహరామి, ఇమే పనఞ్ఞే భిక్ఖూ అజానం అపస్సం విహరన్తీ’తి. సో తేన ఞాణదస్సనేన మజ్జతి పమజ్జతి పమాదం ఆపజ్జతి, పమత్తో సమానో దుక్ఖం విహరతి. అయం వుచ్చతి, భిక్ఖవే, భిక్ఖు ఫేగ్గుం అగ్గహేసి బ్రహ్మచరియస్స; తేన చ వోసానం ఆపాది.

౩౧౧. ‘‘ఇధ పన, భిక్ఖవే, ఏకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి, న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సో తాయ సమాధిసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి, నో చ ఖో పరిపుణ్ణసఙ్కప్పో. సో తేన ఞాణదస్సనేన న అత్తానుక్కంసేతి, న పరం వమ్భేతి. సో తేన ఞాణదస్సనేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో అసమయవిమోక్ఖం ఆరాధేతి. అట్ఠానమేతం [అట్ఠానం ఖో పనేతం (క.)], భిక్ఖవే, అనవకాసో యం సో భిక్ఖు తాయ అసమయవిముత్తియా పరిహాయేథ.

‘‘సేయ్యథాపి, భిక్ఖవే, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో సారఞ్ఞేవ ఛేత్వా ఆదాయ పక్కమేయ్య ‘సార’న్తి జానమానో. తమేనం చక్ఖుమా పురిసో దిస్వా ఏవం వదేయ్య – ‘అఞ్ఞాసి వతాయం భవం పురిసో సారం, అఞ్ఞాసి ఫేగ్గుం, అఞ్ఞాసి తచం, అఞ్ఞాసి పపటికం, అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో సారఞ్ఞేవ ఛేత్వా ఆదాయ పక్కన్తో ‘సార’న్తి జానమానో. యఞ్చస్స సారేన సారకరణీయం తఞ్చస్స అత్థం అనుభవిస్సతీ’తి.

‘‘ఏవమేవ ఖో, భిక్ఖవే, ఇధేకచ్చో కులపుత్తో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి, న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. సో తేన లాభసక్కారసిలోకేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సో తాయ సీలసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సో తాయ సమాధిసమ్పదాయ న మజ్జతి నప్పమజ్జతి న పమాదం ఆపజ్జతి, అప్పమత్తో సమానో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి, నో చ ఖో పరిపుణ్ణసఙ్కప్పో. సో తేన ఞాణదస్సనేన న అత్తానుక్కంసేతి, న పరం వమ్భేతి. సో తేన ఞాణదస్సనేన న మజ్జతి నప్పమజ్జతి న పమాదం ఆపజ్జతి, అప్పమత్తో సమానో అసమయవిమోక్ఖం ఆరాధేతి. అట్ఠానమేతం, భిక్ఖవే, అనవకాసో యం సో భిక్ఖు తాయ అసమయవిముత్తియా పరిహాయేథ.

‘‘ఇతి ఖో, భిక్ఖవే, నయిదం బ్రహ్మచరియం లాభసక్కారసిలోకానిసంసం, న సీలసమ్పదానిసంసం, న సమాధిసమ్పదానిసంసం, న ఞాణదస్సనానిసంసం. యా చ ఖో అయం, భిక్ఖవే, అకుప్పా చేతోవిముత్తి – ఏతదత్థమిదం, భిక్ఖవే, బ్రహ్మచరియం, ఏతం సారం ఏతం పరియోసాన’’న్తి.

ఇదమవోచ భగవా. అత్తమనా తే భిక్ఖూ భగవతో భాసితం అభినన్దున్తి.

మహాసారోపమసుత్తం నిట్ఠితం నవమం.