౧౦. చూళసారోపమసుత్తం

౩౧౨. ఏవం మే సుతం – ఏకం సమయం భగవా సావత్థియం విహరతి జేతవనే అనాథపిణ్డికస్స ఆరామే. అథ ఖో పిఙ్గలకోచ్ఛో బ్రాహ్మణో యేన భగవా తేనుపసఙ్కమి; ఉపసఙ్కమిత్వా భగవతా సద్ధిం సమ్మోది. సమ్మోదనీయం కథం సారణీయం వీతిసారేత్వా ఏకమన్తం నిసీది. ఏకమన్తం నిసిన్నో ఖో పిఙ్గలకోచ్ఛో బ్రాహ్మణో భగవన్తం ఏతదవోచ – ‘‘యేమే, భో గోతమ, సమణబ్రాహ్మణా సఙ్ఘినో గణినో గణాచరియా ఞాతా యసస్సినో తిత్థకరా సాధుసమ్మతా, బహుజనస్స, సేయ్యథిదం – పూరణో కస్సపో, మక్ఖలి గోసాలో, అజితో కేసకమ్బలో, పకుధో కచ్చాయనో, సఞ్చయో [సఞ్జయో (సీ. స్యా. పీ. క.)] బేలట్ఠపుత్తో, నిగణ్ఠో నాటపుత్తో, సబ్బేతే సకాయ పటిఞ్ఞాయ అబ్భఞ్ఞంసు సబ్బేవ నాబ్భఞ్ఞంసు, ఉదాహు ఏకచ్చే అబ్భఞ్ఞంసు ఏకచ్చే నాబ్భఞ్ఞంసూ’’తి? ‘‘అలం, బ్రాహ్మణ, తిట్ఠతేతం – సబ్బేతే సకాయ పటిఞ్ఞాయ అబ్భఞ్ఞంసు సబ్బేవ నాబ్భఞ్ఞంసు, ఉదాహు ఏకచ్చే అబ్భఞ్ఞంసు ఏకచ్చే నాబ్భఞ్ఞంసూతి. ధమ్మం తే, బ్రాహ్మణ, దేసేస్సామి, తం సుణాహి, సాధుకం మనసి కరోహి, భాసిస్సామీ’’తి. ‘‘ఏవం, భో’’తి ఖో పిఙ్గలకోచ్ఛో బ్రాహ్మణో భగవతో పచ్చస్సోసి. భగవా ఏతదవోచ –

౩౧౩. ‘‘సేయ్యథాపి, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం అతిక్కమ్మ పపటికం, సాఖాపలాసం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం అతిక్కమ్మ పపటికం, సాఖాపలాసం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

౩౧౪. ‘‘సేయ్యథాపి వా పన, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం, పపటికం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం పపటికం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

౩౧౫. ‘‘సేయ్యథాపి వా పన, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం, తచం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం, తచం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

౩౧౬. ‘‘సేయ్యథాపి వా పన, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం, ఫేగ్గుం ఛేత్వా ఆదాయ పక్కమేయ్య ‘సార’న్తి మఞ్ఞమానో. తమేనం చక్ఖుమా పురిసో దిస్వా ఏవం వదేయ్య – ‘న వతాయం భవం పురిసో అఞ్ఞాసి సారం, న అఞ్ఞాసి ఫేగ్గుం, న అఞ్ఞాసి తచం, న అఞ్ఞాసి పపటికం, న అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం, ఫేగ్గుం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతీ’తి.

౩౧౭. ‘‘సేయ్యథాపి వా పన, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో సారఞ్ఞేవ ఛేత్వా ఆదాయ పక్కమేయ్య ‘సార’న్తి జానమానో. తమేనం చక్ఖుమా పురిసో దిస్వా ఏవం వదేయ్య – ‘అఞ్ఞాసి వతాయం భవం పురిసో సారం, అఞ్ఞాసి ఫేగ్గుం, అఞ్ఞాసి తచం, అఞ్ఞాసి పపటికం, అఞ్ఞాసి సాఖాపలాసం. తథా హయం భవం పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో సారఞ్ఞేవ ఛేత్వా ఆదాయ పక్కన్తో ‘సార’న్తి జానమానో. యఞ్చస్స సారేన సారకరణీయం తఞ్చస్స అత్థం అనుభవిస్సతీ’తి.

౩౧౮. ‘‘ఏవమేవ ఖో, బ్రాహ్మణ, ఇధేకచ్చో పుగ్గలో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన అత్తమనో హోతి పరిపుణ్ణసఙ్కప్పో. సో తేన లాభసక్కారసిలోకేన అత్తానుక్కంసేతి, పరం వమ్భేతి – ‘అహమస్మి లాభసక్కారసిలోకవా, ఇమే పనఞ్ఞే భిక్ఖూ అప్పఞ్ఞాతా అప్పేసక్ఖా’తి. లాభసక్కారసిలోకేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ న ఛన్దం జనేతి, న వాయమతి, ఓలీనవుత్తికో చ హోతి సాథలికో. సేయ్యథాపి సో, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం అతిక్కమ్మ పపటికం, సాఖాపలాసం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతి. తథూపమాహం, బ్రాహ్మణ, ఇమం పుగ్గలం వదామి.

౩౧౯. ‘‘ఇధ పన, బ్రాహ్మణ, ఏకచ్చో పుగ్గలో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. లాభసక్కారసిలోకేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, పరిపుణ్ణసఙ్కప్పో. సో తాయ సీలసమ్పదాయ అత్తానుక్కంసేతి, పరం వమ్భేతి – ‘అహమస్మి సీలవా కల్యాణధమ్మో, ఇమే పనఞ్ఞే భిక్ఖూ దుస్సీలా పాపధమ్మా’తి. సీలసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ న ఛన్దం జనేతి, న వాయమతి, ఓలీనవుత్తికో చ హోతి సాథలికో. సేయ్యథాపి సో, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం అతిక్కమ్మ తచం, పపటికం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం, తఞ్చస్స అత్థం నానుభవిస్సతి. తథూపమాహం, బ్రాహ్మణ, ఇమం పుగ్గలం వదామి.

౩౨౦. ‘‘ఇధ పన, బ్రాహ్మణ, ఏకచ్చో పుగ్గలో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి, న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. లాభసక్కారసిలోకేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సీలసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, పరిపుణ్ణసఙ్కప్పో. సో తాయ సమాధిసమ్పదాయ అత్తానుక్కంసేతి, పరం వమ్భేతి – ‘అహమస్మి సమాహితో ఏకగ్గచిత్తో, ఇమే పనఞ్ఞే భిక్ఖూ అసమాహితా విబ్భన్తచిత్తా’తి. సమాధిసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ, తేసం ధమ్మానం సచ్ఛికిరియాయ న ఛన్దం జనేతి, న వాయమతి, ఓలీనవుత్తికో చ హోతి సాథలికో. సేయ్యథాపి సో, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం అతిక్కమ్మ ఫేగ్గుం, తచం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతి. తథూపమాహం, బ్రాహ్మణ, ఇమం పుగ్గలం వదామి.

౩౨౧. ‘‘ఇధ పన, బ్రాహ్మణ, ఏకచ్చో పుగ్గలో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన…పే… అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. లాభసక్కారసిలోకేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సీలసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సమాధిసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి, పరిపుణ్ణసఙ్కప్పో. సో తేన ఞాణదస్సనేన అత్తానుక్కంసేతి, పరం వమ్భేతి – ‘అహమస్మి జానం పస్సం విహరామి, ఇమే పనఞ్ఞే భిక్ఖూ అజానం అపస్సం విహరన్తీ’తి. ఞాణదస్సనేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ న ఛన్దం జనేతి, న వాయమతి, ఓలీనవుత్తికో చ హోతి సాథలికో. సేయ్యథాపి సో, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో అతిక్కమ్మేవ సారం, ఫేగ్గుం ఛేత్వా ఆదాయ పక్కన్తో ‘సార’న్తి మఞ్ఞమానో. యఞ్చస్స సారేన సారకరణీయం తఞ్చస్స అత్థం నానుభవిస్సతి. తథూపమాహం, బ్రాహ్మణ, ఇమం పుగ్గలం వదామి.

౩౨౨. ‘‘ఇధ పన, బ్రాహ్మణ, ఏకచ్చో పుగ్గలో సద్ధా అగారస్మా అనగారియం పబ్బజితో హోతి – ‘ఓతిణ్ణోమ్హి జాతియా జరాయ మరణేన సోకేహి పరిదేవేహి దుక్ఖేహి దోమనస్సేహి ఉపాయాసేహి, దుక్ఖోతిణ్ణో దుక్ఖపరేతో, అప్పేవ నామ ఇమస్స కేవలస్స దుక్ఖక్ఖన్ధస్స అన్తకిరియా పఞ్ఞాయేథా’తి. సో ఏవం పబ్బజితో సమానో లాభసక్కారసిలోకం అభినిబ్బత్తేతి. సో తేన లాభసక్కారసిలోకేన న అత్తమనో హోతి, న పరిపుణ్ణసఙ్కప్పో. సో తేన లాభసక్కారసిలోకేన న అత్తానుక్కంసేతి, న పరం వమ్భేతి. లాభసక్కారసిలోకేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సీలసమ్పదం ఆరాధేతి. సో తాయ సీలసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సీలసమ్పదాయ న అత్తానుక్కంసేతి, న పరం వమ్భేతి. సీలసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో సమాధిసమ్పదం ఆరాధేతి. సో తాయ సమాధిసమ్పదాయ అత్తమనో హోతి, నో చ ఖో పరిపుణ్ణసఙ్కప్పో. సో తాయ సమాధిసమ్పదాయ న అత్తానుక్కంసేతి, న పరం వమ్భేతి. సమాధిసమ్పదాయ చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో. సో ఞాణదస్సనం ఆరాధేతి. సో తేన ఞాణదస్సనేన అత్తమనో హోతి, నో చ ఖో పరిపుణ్ణసఙ్కప్పో. సో తేన ఞాణదస్సనేన న అత్తానుక్కంసేతి, న పరం వమ్భేతి. ఞాణదస్సనేన చ యే అఞ్ఞే ధమ్మా ఉత్తరితరా చ పణీతతరా చ తేసం ధమ్మానం సచ్ఛికిరియాయ ఛన్దం జనేతి, వాయమతి, అనోలీనవుత్తికో చ హోతి అసాథలికో.

౩౨౩. ‘‘కతమే చ, బ్రాహ్మణ, ధమ్మా ఞాణదస్సనేన ఉత్తరితరా చ పణీతతరా చ? ఇధ, బ్రాహ్మణ, భిక్ఖు వివిచ్చేవ కామేహి వివిచ్చ అకుసలేహి ధమ్మేహి సవితక్కం సవిచారం వివేకజం పీతిసుఖం పఠమం ఝానం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు వితక్కవిచారానం వూపసమా అజ్ఝత్తం సమ్పసాదనం చేతసో ఏకోదిభావం అవితక్కం అవిచారం సమాధిజం పీతిసుఖం దుతియం ఝానం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు పీతియా చ విరాగా ఉపేక్ఖకో చ విహరతి, సతో చ సమ్పజానో సుఖఞ్చ కాయేన పటిసంవేదేతి, యం తం అరియా ఆచిక్ఖన్తి – ‘ఉపేక్ఖకో సతిమా సుఖవిహారీ’తి తతియం ఝానం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సుఖస్స చ పహానా దుక్ఖస్స చ పహానా పుబ్బేవ సోమనస్సదోమనస్సానం అత్థఙ్గమా అదుక్ఖమసుఖం ఉపేక్ఖాసతిపారిసుద్ధిం చతుత్థం ఝానం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సబ్బసో రూపసఞ్ఞానం సమతిక్కమా పటిఘసఞ్ఞానం అత్థఙ్గమా నానత్తసఞ్ఞానం అమనసికారా ‘అనన్తో ఆకాసో’తి ఆకాసానఞ్చాయతనం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సబ్బసో ఆకాసానఞ్చాయతనం సమతిక్కమ్మ ‘అనన్తం విఞ్ఞాణ’న్తి విఞ్ఞాణఞ్చాయతనం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సబ్బసో విఞ్ఞాణఞ్చాయతనం సమతిక్కమ్మ ‘నత్థి కిఞ్చీ’తి ఆకిఞ్చఞ్ఞాయతనం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సబ్బసో ఆకిఞ్చఞ్ఞాయతనం సమతిక్కమ్మ నేవసఞ్ఞానాసఞ్ఞాయతనం ఉపసమ్పజ్జ విహరతి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ.

‘‘పున చపరం, బ్రాహ్మణ, భిక్ఖు సబ్బసో నేవసఞ్ఞానాసఞ్ఞాయతనం సమతిక్కమ్మ సఞ్ఞావేదయితనిరోధం ఉపసమ్పజ్జ విహరతి, పఞ్ఞాయ చస్స దిస్వా ఆసవా పరిక్ఖీణా హోన్తి. అయమ్పి ఖో, బ్రాహ్మణ, ధమ్మో ఞాణదస్సనేన ఉత్తరితరో చ పణీతతరో చ. ఇమే ఖో, బ్రాహ్మణ, ధమ్మా ఞాణదస్సనేన ఉత్తరితరా చ పణీతతరా చ.

౩౨౪. ‘‘సేయ్యథాపి సో, బ్రాహ్మణ, పురిసో సారత్థికో సారగవేసీ సారపరియేసనం చరమానో మహతో రుక్ఖస్స తిట్ఠతో సారవతో సారంయేవ ఛేత్వా ఆదాయ పక్కన్తో ‘సార’న్తి జానమానో. యఞ్చస్స సారేన సారకరణీయం తఞ్చస్స అత్థం అనుభవిస్సతి. తథూపమాహం, బ్రాహ్మణ, ఇమం పుగ్గలం వదామి.

‘‘ఇతి ఖో, బ్రాహ్మణ, నయిదం బ్రహ్మచరియం లాభసక్కారసిలోకానిసంసం, న సీలసమ్పదానిసంసం, న సమాధిసమ్పదానిసంసం, న ఞాణదస్సనానిసంసం. యా చ ఖో అయం, బ్రాహ్మణ, అకుప్పా చేతోవిముత్తి – ఏతదత్థమిదం, బ్రాహ్మణ, బ్రహ్మచరియం, ఏతం సారం ఏతం పరియోసాన’’న్తి.

ఏవం వుత్తే, పిఙ్గలకోచ్ఛో బ్రాహ్మణో భగవన్తం ఏతదవోచ – ‘‘అభిక్కన్తం, భో గోతమ, అభిక్కన్తం, భో గోతమ…పే… ఉపాసకం మం భవం గోతమో ధారేతు అజ్జతగ్గే పాణుపేతం సరణం గత’’న్తి.

చూళసారోపమసుత్తం నిట్ఠితం దసమం.

ఓపమ్మవగ్గో నిట్ఠితో తతియో.