౮. సోణాథేరీగాథా

౧౦౨. ‘‘దస పుత్తే విజాయిత్వా, అస్మిం రూపసముస్సయే;

తతోహం దుబ్బలా జిణ్ణా, భిక్ఖునిం ఉపసఙ్కమిం.

౧౦౩. ‘‘సా మే ధమ్మమదేసేసి, ఖన్ధాయతనధాతుయో;

తస్సా ధమ్మం సుణిత్వాన, కేసే ఛేత్వాన పబ్బజిం.

౧౦౪. ‘‘తస్సా మే సిక్ఖమానాయ, దిబ్బచక్ఖు విసోధితం;

పుబ్బేనివాసం జానామి, యత్థ మే వుసితం పురే.

౧౦౫. ‘‘అనిమిత్తఞ్చ భావేమి, ఏకగ్గా సుసమాహితా;

అనన్తరావిమోక్ఖాసిం, అనుపాదాయ నిబ్బుతా.

౧౦౬. ‘‘పఞ్చక్ఖన్ధా పరిఞ్ఞాతా, తిట్ఠన్తి ఛిన్నమూలకా;

ధి తవత్థు జరే జమ్మే, నత్థి దాని పునబ్భవో’’తి.

… సోణా థేరీ….