౫. పఞ్చకనిపాతో

౧. అఞ్ఞతరాథేరీగాథా

౬౭. ‘‘పణ్ణవీసతివస్సాని, యతో పబ్బజితా అహం;

నాచ్ఛరాసఙ్ఘాతమత్తమ్పి, చిత్తస్సూపసమజ్ఝగం.

౬౮. ‘‘అలద్ధా చేతసో సన్తిం, కామరాగేనవస్సుతా;

బాహా పగ్గయ్హ కన్దన్తీ, విహారం పావిసిం అహం.

౬౯. ‘‘సా భిక్ఖునిం ఉపాగచ్ఛిం, యా మే సద్ధాయికా అహు;

సా మే ధమ్మమదేసేసి, ఖన్ధాయతనధాతుయో.

౭౦. ‘‘తస్సా ధమ్మం సుణిత్వాన, ఏకమన్తే ఉపావిసిం;

పుబ్బేనివాసం జానామి, దిబ్బచక్ఖు విసోధితం.

౭౧. ‘‘చేతోపరిచ్చఞాణఞ్చ [చేతోపరియఞాణఞ్చ (క.)], సోతధాతు విసోధితా;

ఇద్ధీపి మే సచ్ఛికతా, పత్తో మే ఆసవక్ఖయో;

ఛళభిఞ్ఞా [ఛ మేభిఞ్ఞా (స్యా. క.)] సచ్ఛికతా, కతం బుద్ధస్స సాసన’’న్తి.

… అఞ్ఞతరా థేరీ ….

౨. విమలాథేరీగాథా

౭౨. ‘‘మత్తా వణ్ణేన రూపేన, సోభగ్గేన యసేన చ;

యోబ్బనేన చుపత్థద్ధా, అఞ్ఞాసమతిమఞ్ఞిహం.

౭౩. ‘‘విభూసేత్వా ఇమం కాయం, సుచిత్తం బాలలాపనం;

అట్ఠాసిం వేసిద్వారమ్హి, లుద్దో పాసమివోడ్డియ.

౭౪. ‘‘పిలన్ధనం విదంసేన్తీ, గుయ్హం పకాసికం బహుం;

అకాసిం వివిధం మాయం, ఉజ్జగ్ఘన్తీ బహుం జనం.

౭౫. ‘‘సాజ్జ పిణ్డం చరిత్వాన, ముణ్డా సఙ్ఘాటిపారుతా;

నిసిన్నా రుక్ఖమూలమ్హి, అవితక్కస్స లాభినీ.

౭౬. ‘‘సబ్బే యోగా సముచ్ఛిన్నా, యే దిబ్బా యే చ మానుసా;

ఖేపేత్వా ఆసవే సబ్బే, సీతిభూతామ్హి నిబ్బుతా’’తి.

… విమలా పురాణగణికా థేరీ….

౩. సీహాథేరీగాథా

౭౭. ‘‘అయోనిసో మనసికారా, కామరాగేన అట్టితా;

అహోసిం ఉద్ధతా పుబ్బే, చిత్తే అవసవత్తినీ.

౭౮. ‘‘పరియుట్ఠితా క్లేసేహి, సుభసఞ్ఞానువత్తినీ;

సమం చిత్తస్స న లభిం, రాగచిత్తవసానుగా.

౭౯. ‘‘కిసా పణ్డు వివణ్ణా చ, సత్త వస్సాని చారిహం;

నాహం దివా వా రత్తిం వా, సుఖం విన్దిం సుదుక్ఖితా.

౮౦. ‘‘తతో రజ్జుం గహేత్వాన, పావిసిం వనమన్తరం;

వరం మే ఇధ ఉబ్బన్ధం, యఞ్చ హీనం పునాచరే.

౮౧. ‘‘దళ్హపాసం [దళ్హం పాసం (సీ.)] కరిత్వాన, రుక్ఖసాఖాయ బన్ధియ;

పక్ఖిపిం పాసం గీవాయం, అథ చిత్తం విముచ్చి మే’’తి.

… సీహా థేరీ….

౪. సున్దరీనన్దాథేరీగాథా

౮౨. ‘‘ఆతురం అసుచిం పూతిం, పస్స నన్దే సముస్సయం;

అసుభాయ చిత్తం భావేహి, ఏకగ్గం సుసమాహితం.

౮౩. ‘‘యథా ఇదం తథా ఏతం, యథా ఏతం తథా ఇదం;

దుగ్గన్ధం పూతికం వాతి, బాలానం అభినన్దితం.

౮౪. ‘‘ఏవమేతం అవేక్ఖన్తీ, రత్తిన్దివమతన్దితా;

తతో సకాయ పఞ్ఞాయ, అభినిబ్బిజ్ఝ [అభినిబ్బిజ్జ (సీ. స్యా.)] దక్ఖిసం.

౮౫. ‘‘తస్సా మే అప్పమత్తాయ, విచినన్తియా యోనిసో;

యథాభూతం అయం కాయో, దిట్ఠో సన్తరబాహిరో.

౮౬. ‘‘అథ నిబ్బిన్దహం కాయే, అజ్ఝత్తఞ్చ విరజ్జహం;

అప్పమత్తా విసంయుత్తా, ఉపసన్తామ్హి నిబ్బుతా’’తి.

… సున్దరీనన్దా థేరీ….

౫. నన్దుత్తరాథేరీగాథా

౮౭. ‘‘అగ్గిం చన్దఞ్చ సూరియఞ్చ, దేవతా చ నమస్సిహం;

నదీతిత్థాని గన్త్వాన, ఉదకం ఓరుహామిహం.

౮౮. ‘‘బహూవతసమాదానా, అడ్ఢం సీసస్స ఓలిఖిం;

ఛమాయ సేయ్యం కప్పేమి, రత్తిం భత్తం న భుఞ్జహం.

౮౯. ‘‘విభూసామణ్డనరతా, న్హాపనుచ్ఛాదనేహి చ;

ఉపకాసిం ఇమం కాయం, కామరాగేన అట్టితా.

౯౦. ‘‘తతో సద్ధం లభిత్వాన, పబ్బజిం అనగారియం;

దిస్వా కాయం యథాభూతం, కామరాగో సమూహతో.

౯౧. ‘‘సబ్బే భవా సముచ్ఛిన్నా, ఇచ్ఛా చ పత్థనాపి చ;

సబ్బయోగవిసంయుత్తా, సన్తిం పాపుణి చేతసో’’తి.

… నన్దుత్తరా థేరీ….

౬. మిత్తాకాళీథేరీగాథా

౯౨. ‘‘సద్ధాయ పబ్బజిత్వాన, అగారస్మానగారియం;

విచరింహం తేన తేన, లాభసక్కారఉస్సుకా.

౯౩. ‘‘రిఞ్చిత్వా పరమం అత్థం, హీనమత్థం అసేవిహం;

కిలేసానం వసం గన్త్వా, సామఞ్ఞత్థం న బుజ్ఝిహం.

౯౪. ‘‘తస్సా మే అహు సంవేగో, నిసిన్నాయ విహారకే;

ఉమ్మగ్గపటిపన్నామ్హి, తణ్హాయ వసమాగతా.

౯౫. ‘‘అప్పకం జీవితం మయ్హం, జరా బ్యాధి చ మద్దతి;

పురాయం భిజ్జతి [జరాయ భిజ్జతే (సీ.)] కాయో, న మే కాలో పమజ్జితుం.

౯౬. ‘‘యథాభూతమవేక్ఖన్తీ, ఖన్ధానం ఉదయబ్బయం;

విముత్తచిత్తా ఉట్ఠాసిం, కతం బుద్ధస్స సాసన’’న్తి.

… మిత్తా కాళీ థేరీ….

౭. సకులాథేరీగాథా

౯౭. ‘‘అగారస్మిం వసన్తీహం, ధమ్మం సుత్వాన భిక్ఖునో;

అద్దసం విరజం ధమ్మం, నిబ్బానం పదమచ్చుతం.

౯౮. ‘‘సాహం పుత్తం ధీతరఞ్చ, ధనధఞ్ఞఞ్చ ఛడ్డియ;

కేసే ఛేదాపయిత్వాన, పబ్బజిం అనగారియం.

౯౯. ‘‘సిక్ఖమానా అహం సన్తీ, భావేన్తీ మగ్గమఞ్జసం;

పహాసిం రాగదోసఞ్చ, తదేకట్ఠే చ ఆసవే.

౧౦౦. ‘‘భిక్ఖునీ ఉపసమ్పజ్జ, పుబ్బజాతిమనుస్సరిం;

దిబ్బచక్ఖు విసోధితం [విసోధితం దిబ్బచక్ఖు (సీ.)], విమలం సాధుభావితం.

౧౦౧. ‘‘సఙ్ఖారే పరతో దిస్వా, హేతుజాతే పలోకితే [పలోకినే (క.)];

పహాసిం ఆసవే సబ్బే, సీతిభూతామ్హి నిబ్బుతా’’తి.

… సకులా థేరీ….

౮. సోణాథేరీగాథా

౧౦౨. ‘‘దస పుత్తే విజాయిత్వా, అస్మిం రూపసముస్సయే;

తతోహం దుబ్బలా జిణ్ణా, భిక్ఖునిం ఉపసఙ్కమిం.

౧౦౩. ‘‘సా మే ధమ్మమదేసేసి, ఖన్ధాయతనధాతుయో;

తస్సా ధమ్మం సుణిత్వాన, కేసే ఛేత్వాన పబ్బజిం.

౧౦౪. ‘‘తస్సా మే సిక్ఖమానాయ, దిబ్బచక్ఖు విసోధితం;

పుబ్బేనివాసం జానామి, యత్థ మే వుసితం పురే.

౧౦౫. ‘‘అనిమిత్తఞ్చ భావేమి, ఏకగ్గా సుసమాహితా;

అనన్తరావిమోక్ఖాసిం, అనుపాదాయ నిబ్బుతా.

౧౦౬. ‘‘పఞ్చక్ఖన్ధా పరిఞ్ఞాతా, తిట్ఠన్తి ఛిన్నమూలకా;

ధి తవత్థు జరే జమ్మే, నత్థి దాని పునబ్భవో’’తి.

… సోణా థేరీ….

౯. భద్దాకుణ్డలకేసాథేరీగాథా

౧౦౭. ‘‘లూనకేసీ పఙ్కధరీ, ఏకసాటీ పురే చరిం;

అవజ్జే వజ్జమతినీ, వజ్జే చావజ్జదస్సినీ.

౧౦౮. ‘‘దివావిహారా నిక్ఖమ్మ, గిజ్ఝకూటమ్హి పబ్బతే;

అద్దసం విరజం బుద్ధం, భిక్ఖుసఙ్ఘపురక్ఖతం.

౧౦౯. ‘‘నిహచ్చ జాణుం వన్దిత్వా, సమ్ముఖా అఞ్జలిం అకం;

‘ఏహి భద్దే’తి మం అవచ, సా మే ఆసూపసమ్పదా.

౧౧౦. ‘‘చిణ్ణా అఙ్గా చ మగధా, వజ్జీ కాసీ చ కోసలా;

అనణా పణ్ణాసవస్సాని, రట్ఠపిణ్డం అభుఞ్జహం.

౧౧౧. ‘‘పుఞ్ఞం వత పసవి బహుం, సప్పఞ్ఞో వతాయం ఉపాసకో;

యో భద్దాయ చీవరం అదాసి, విప్పముత్తాయ సబ్బగన్థేహీ’’తి.

… భద్దా కుణ్డలకేసా థేరీ….

౧౦. పటాచారాథేరీగాథా

౧౧౨. ‘‘నఙ్గలేహి కసం ఖేత్తం, బీజాని పవపం ఛమా;

పుత్తదారాని పోసేన్తా, ధనం విన్దన్తి మాణవా.

౧౧౩. ‘‘కిమహం సీలసమ్పన్నా, సత్థుసాసనకారికా;

నిబ్బానం నాధిగచ్ఛామి, అకుసీతా అనుద్ధతా.

౧౧౪. ‘‘పాదే పక్ఖాలయిత్వాన, ఉదకేసు కరోమహం;

పాదోదకఞ్చ దిస్వాన, థలతో నిన్నమాగతం.

౧౧౫. ‘‘తతో చిత్తం సమాధేసిం, అస్సం భద్రంవజానియం;

తతో దీపం గహేత్వాన, విహారం పావిసిం అహం;

సేయ్యం ఓలోకయిత్వాన, మఞ్చకమ్హి ఉపావిసిం.

౧౧౬. ‘‘తతో సూచిం గహేత్వాన, వట్టిం ఓకస్సయామహం;

పదీపస్సేవ నిబ్బానం, విమోక్ఖో అహు చేతసో’’తి.

… పటాచారా థేరీ….

౧౧. తింసమత్తాథేరీగాథా

౧౧౭. ‘‘‘ముసలాని గహేత్వాన, ధఞ్ఞం కోట్టేన్తి మాణవా [మానవా (సీ.)];

పుత్తదారాని పోసేన్తా, ధనం విన్దన్తి మాణవా.

౧౧౮. ‘‘‘కరోథ బుద్ధసాసనం, యం కత్వా నానుతప్పతి;

ఖిప్పం పాదాని ధోవిత్వా, ఏకమన్తే నిసీదథ;

చేతోసమథమనుయుత్తా, కరోథ బుద్ధసాసనం’.

౧౧౯. ‘‘తస్సా తా [తం (సీ.)] వచనం సుత్వా, పటాచారాయ సాసనం;

పాదే పక్ఖాలయిత్వాన, ఏకమన్తం ఉపావిసుం;

చేతోసమథమనుయుత్తా, అకంసు బుద్ధసాసనం.

౧౨౦. ‘‘రత్తియా పురిమే యామే, పుబ్బజాతిమనుస్సరుం;

రత్తియా మజ్ఝిమే యామే, దిబ్బచక్ఖుం విసోధయుం;

రత్తియా పచ్ఛిమే యామే, తమోఖన్ధం పదాలయుం.

౧౨౧. ‘‘ఉట్ఠాయ పాదే వన్దింసు, ‘కతా తే అనుసాసనీ;

ఇన్దంవ దేవా తిదసా, సఙ్గామే అపరాజితం;

పురక్ఖత్వా విహస్సామ [విహరామ (సీ.), విహరిస్సామ (స్యా.)], తేవిజ్జామ్హ అనాసవా’’’తి.

ఇత్థం సుదం తింసమత్తా థేరీ భిక్ఖునియో పటాచారాయ సన్తికే అఞ్ఞం బ్యాకరింసూతి.

౧౨. చన్దాథేరీగాథా

౧౨౨. ‘‘దుగ్గతాహం పురే ఆసిం, విధవా చ అపుత్తికా;

వినా మిత్తేహి ఞాతీహి, భత్తచోళస్స నాధిగం.

౧౨౩. ‘‘పత్తం దణ్డఞ్చ గణ్హిత్వా, భిక్ఖమానా కులా కులం;

సీతుణ్హేన చ డయ్హన్తీ, సత్త వస్సాని చారిహం.

౧౨౪. ‘‘భిక్ఖునిం పున దిస్వాన, అన్నపానస్స లాభినిం;

ఉపసఙ్కమ్మ అవోచం [అవోచిం (క.)], ‘పబ్బజ్జం అనగారియం’.

౧౨౫. ‘‘సా చ మం అనుకమ్పాయ, పబ్బాజేసి పటాచారా;

తతో మం ఓవదిత్వాన, పరమత్థే నియోజయి.

౧౨౬. ‘‘తస్సాహం వచనం సుత్వా, అకాసిం అనుసాసనిం;

అమోఘో అయ్యాయోవాదో, తేవిజ్జామ్హి అనాసవా’’తి.