౯. భద్దాకుణ్డలకేసాథేరీగాథా

౧౦౭. ‘‘లూనకేసీ పఙ్కధరీ, ఏకసాటీ పురే చరిం;

అవజ్జే వజ్జమతినీ, వజ్జే చావజ్జదస్సినీ.

౧౦౮. ‘‘దివావిహారా నిక్ఖమ్మ, గిజ్ఝకూటమ్హి పబ్బతే;

అద్దసం విరజం బుద్ధం, భిక్ఖుసఙ్ఘపురక్ఖతం.

౧౦౯. ‘‘నిహచ్చ జాణుం వన్దిత్వా, సమ్ముఖా అఞ్జలిం అకం;

‘ఏహి భద్దే’తి మం అవచ, సా మే ఆసూపసమ్పదా.

౧౧౦. ‘‘చిణ్ణా అఙ్గా చ మగధా, వజ్జీ కాసీ చ కోసలా;

అనణా పణ్ణాసవస్సాని, రట్ఠపిణ్డం అభుఞ్జహం.

౧౧౧. ‘‘పుఞ్ఞం వత పసవి బహుం, సప్పఞ్ఞో వతాయం ఉపాసకో;

యో భద్దాయ చీవరం అదాసి, విప్పముత్తాయ సబ్బగన్థేహీ’’తి.

… భద్దా కుణ్డలకేసా థేరీ….