౭. సకులాథేరీగాథా

౯౭. ‘‘అగారస్మిం వసన్తీహం, ధమ్మం సుత్వాన భిక్ఖునో;

అద్దసం విరజం ధమ్మం, నిబ్బానం పదమచ్చుతం.

౯౮. ‘‘సాహం పుత్తం ధీతరఞ్చ, ధనధఞ్ఞఞ్చ ఛడ్డియ;

కేసే ఛేదాపయిత్వాన, పబ్బజిం అనగారియం.

౯౯. ‘‘సిక్ఖమానా అహం సన్తీ, భావేన్తీ మగ్గమఞ్జసం;

పహాసిం రాగదోసఞ్చ, తదేకట్ఠే చ ఆసవే.

౧౦౦. ‘‘భిక్ఖునీ ఉపసమ్పజ్జ, పుబ్బజాతిమనుస్సరిం;

దిబ్బచక్ఖు విసోధితం [విసోధితం దిబ్బచక్ఖు (సీ.)], విమలం సాధుభావితం.

౧౦౧. ‘‘సఙ్ఖారే పరతో దిస్వా, హేతుజాతే పలోకితే [పలోకినే (క.)];

పహాసిం ఆసవే సబ్బే, సీతిభూతామ్హి నిబ్బుతా’’తి.

… సకులా థేరీ….