౨. విమలాథేరీగాథా

౭౨. ‘‘మత్తా వణ్ణేన రూపేన, సోభగ్గేన యసేన చ;

యోబ్బనేన చుపత్థద్ధా, అఞ్ఞాసమతిమఞ్ఞిహం.

౭౩. ‘‘విభూసేత్వా ఇమం కాయం, సుచిత్తం బాలలాపనం;

అట్ఠాసిం వేసిద్వారమ్హి, లుద్దో పాసమివోడ్డియ.

౭౪. ‘‘పిలన్ధనం విదంసేన్తీ, గుయ్హం పకాసికం బహుం;

అకాసిం వివిధం మాయం, ఉజ్జగ్ఘన్తీ బహుం జనం.

౭౫. ‘‘సాజ్జ పిణ్డం చరిత్వాన, ముణ్డా సఙ్ఘాటిపారుతా;

నిసిన్నా రుక్ఖమూలమ్హి, అవితక్కస్స లాభినీ.

౭౬. ‘‘సబ్బే యోగా సముచ్ఛిన్నా, యే దిబ్బా యే చ మానుసా;

ఖేపేత్వా ఆసవే సబ్బే, సీతిభూతామ్హి నిబ్బుతా’’తి.

… విమలా పురాణగణికా థేరీ….