౩. సీహాథేరీగాథా

౭౭. ‘‘అయోనిసో మనసికారా, కామరాగేన అట్టితా;

అహోసిం ఉద్ధతా పుబ్బే, చిత్తే అవసవత్తినీ.

౭౮. ‘‘పరియుట్ఠితా క్లేసేహి, సుభసఞ్ఞానువత్తినీ;

సమం చిత్తస్స న లభిం, రాగచిత్తవసానుగా.

౭౯. ‘‘కిసా పణ్డు వివణ్ణా చ, సత్త వస్సాని చారిహం;

నాహం దివా వా రత్తిం వా, సుఖం విన్దిం సుదుక్ఖితా.

౮౦. ‘‘తతో రజ్జుం గహేత్వాన, పావిసిం వనమన్తరం;

వరం మే ఇధ ఉబ్బన్ధం, యఞ్చ హీనం పునాచరే.

౮౧. ‘‘దళ్హపాసం [దళ్హం పాసం (సీ.)] కరిత్వాన, రుక్ఖసాఖాయ బన్ధియ;

పక్ఖిపిం పాసం గీవాయం, అథ చిత్తం విముచ్చి మే’’తి.

… సీహా థేరీ….