౯. యసోధరాపముఖదసభిక్ఖునీసహస్సఅపదానం

౪౧౧. ‘‘కప్పే చ సతసహస్సే, చతురో చ అసఙ్ఖియే;

దీపఙ్కరో నామ జినో, ఉప్పజ్జి లోకనాయకో.

౪౧౨. ‘‘దీపఙ్కరో మహావీరో, వియాకాసి వినాయకో;

సుమేధఞ్చ సుమిత్తఞ్చ, సమానసుఖదుక్ఖతం.

౪౧౩. ‘‘సదేవకఞ్చ పస్సన్తో, విచరన్తో సదేవకం;

తేసం పకిత్తనే అమ్హే, ఉపగమ్మ సమాగమం.

౪౧౪. ‘‘అమ్హం సబ్బపతి హోహి [సబ్బా పతీ హోన్తి (పీ.)], అనాగతసమాగమే;

సబ్బావ తుయ్హం భరియా, మనాపా పియవాదికా.

౪౧౫. ‘‘దానం సీలమయం సబ్బం, భావనా చ సుభావితా;

దీఘరత్తఞ్చ నో [దీఘరత్తమిదం (స్యా. క.)] సబ్బం, పరిచ్చత్తం మహామునే.

౪౧౬. ‘‘గన్ధం విలేపనం మాలం, దీపఞ్చ రతనామయం;

యంకిఞ్చి పత్థితం సబ్బం, పరిచ్చత్తం మహాముని.

౪౧౭. ‘‘అఞ్ఞం వాపి కతం కమ్మం, పరిభోగఞ్చ మానుసం;

దీఘరత్తఞ్హి నో సబ్బం, పరిచ్చత్తం మహాముని.

౪౧౮. ‘‘అనేకజాతిసంసారం, బహుం పుఞ్ఞమ్పి నో కతం;

ఇస్సరమనుభోత్వాన, సంసరిత్వా భవాభవే.

౪౧౯. ‘‘పచ్ఛిమే భవే సమ్పత్తే, సక్యపుత్తనివేసనే;

నానాకులూపపన్నాయో, అచ్ఛరా కామవణ్ణినీ.

౪౨౦. ‘‘లాభగ్గేన యసం పత్తా, పూజితా సబ్బసక్కతా;

లాభియో అన్నపానానం, సదా సమ్మానితా మయం.

౪౨౧. ‘‘అగారం పజహిత్వాన, పబ్బజిమ్హనగారియం;

అడ్ఢమాసే అసమ్పత్తే, సబ్బా పత్తామ్హ నిబ్బుతిం.

౪౨౨. ‘‘లాభియో అన్నపానానం, వత్థసేనాసనాని చ;

ఉపేన్తి పచ్చయా సబ్బే, సదా సక్కతపూజితా.

౪౨౩. ‘‘కిలేసా ఝాపితా అమ్హం…పే… విహరామ అనాసవా.

౪౨౪. ‘‘స్వాగతం వత నో ఆసి…పే… కతం బుద్ధస్స సాసనం.

౪౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం యసోధరాపముఖాని దసభిక్ఖునీసహస్సాని భగవతో సమ్ముఖా ఇమా గాథాయో అభాసిత్థాతి.

యసోధరాపముఖదసభిక్ఖునీసహస్సాపదానం నవమం.