౧౦. యసోధరాపముఖఅట్ఠారసభిక్ఖునీసహస్సఅపదానం
౪౨౬. ‘‘అట్ఠారససహస్సాని, భిక్ఖునీ సక్యసమ్భవా;
యసోధరాపముఖాని, సమ్బుద్ధం ఉపసఙ్కముం.
౪౨౭. ‘‘అట్ఠారససహస్సాని, సబ్బా హోన్తి మహిద్ధికా;
వన్దన్తీ మునినో పాదే, ఆరోచేన్తి యథాబలం.
౪౨౮. ‘‘‘జాతి ఖీణా జరా బ్యాధి, మరణఞ్చ మహాముని;
అనాసవం పదం సన్తం, అమతం యామ నాయక.
౪౨౯. ‘‘‘ఖలితఞ్చే పురే అత్థి, సబ్బాసమ్పి మహాముని;
అపరాధమజానన్తీ, ఖమ అమ్హం వినాయక.
౪౩౦. ‘‘‘ఇద్ధిఞ్చాపి నిదస్సేథ, మమ సాసనకారికా;
పరిసానఞ్చ సబ్బాసం, కఙ్ఖం ఛిన్దథ యావతా.
౪౩౧. ‘‘‘యసోధరా మహావీర, మనాపా పియదస్సనా;
సబ్బా తుయ్హం మహావీర, అగారస్మిం పజాపతి.
౪౩౨. ‘‘‘థీనం సతసహస్సానం, నవుతీనం ఛదుత్తరి;
అగారే తే మయం వీర, పామోక్ఖా సబ్బా ఇస్సరా.
౪౩౩. ‘‘‘రూపాచారగుణూపేతా, యోబ్బనట్ఠా పియంవదా;
సబ్బా నో అపచాయన్తి, దేవతా వియ మానుసా.
౪౩౪. ‘‘‘అట్ఠారససహస్సాని, సబ్బా సాకియసమ్భవా;
యసోధరాసహస్సాని, పామోక్ఖా ఇస్సరా తదా.
౪౩౫. ‘‘‘కామధాతుమతిక్కమ్మ, సణ్ఠితా రూపధాతుయా;
రూపేన సదిసా నత్థి, సహస్సానం మహాముని.
౪౩౬. ‘‘‘సమ్బుద్ధం అభివాదేత్వా, ఇద్ధిం దస్సంసు సత్థునో;
నేకా నానావిధాకారా, మహాఇద్ధీపి దస్సయుం.
౪౩౭. ‘‘‘చక్కవాళసమం కాయం, సీసం ఉత్తరతో కురు;
ఉభో పక్ఖా దువే దీపా, జమ్బుదీపం సరీరతో.
౪౩౮. ‘‘‘దక్ఖిణఞ్చ సరం పిఞ్ఛం, నానాసాఖా తు పత్తకా;
చన్దఞ్చ సూరియఞ్చక్ఖి, మేరుపబ్బతతో సిఖం.
౪౩౯. ‘‘‘చక్కవాళగిరిం తుణ్డం, జమ్బురుక్ఖం సమూలకం;
బీజమానా ఉపాగన్త్వా, వన్దన్తీ లోకనాయకం.
౪౪౦. ‘‘‘హత్థివణ్ణం తథేవస్సం, పబ్బతం జలధిం తథా;
చన్దఞ్చ సూరియం మేరుం, సక్కవణ్ణఞ్చ దస్సయుం.
౪౪౧. ‘‘‘యసోధరా మయం వీర, పాదే వన్దామ చక్ఖుమ;
తవ చిరపభావేన, నిప్ఫన్నా నరనాయక.
౪౪౨. ‘‘‘ఇద్ధీసు చ వసీ హోమ, దిబ్బాయ సోతధాతుయా;
చేతోపరియఞాణస్స, వసీ హోమ మహామునే.
౪౪౩. ‘‘‘పుబ్బేనివాసం జానామ, దిబ్బచక్ఖు విసోధితం;
సబ్బాసవపరిక్ఖీణా, నత్థి దాని పునబ్భవో.
౪౪౪. ‘‘‘అత్థధమ్మనిరుత్తీసు, పటిభానే తథేవ చ;
ఞాణం అమ్హం మహావీర, ఉప్పన్నం తవ సన్తికే.
౪౪౫. ‘‘‘పుబ్బానం లోకనాథానం, సఙ్గమం నో నిదస్సితం;
అధికారా బహూ అమ్హం, తుయ్హత్థాయ మహామునే.
౪౪౬. ‘‘‘యం అమ్హం పూరితం కమ్మం, కుసలం సరసే మునే;
తుయ్హత్థాయ మహావీర, పుఞ్ఞానుపచితాని నో.
౪౪౭. ‘‘‘అభబ్బట్ఠానే వజ్జేత్వా, వారయిమ్హ అనాచరం;
తుయ్హత్థాయ మహావీర, చత్తాని జీవితాని నో [సఞ్చత్తం జీవితమ్పి నో (స్యా.)].
౪౪౮. ‘‘‘నేకకోటిసహస్సాని, భరియత్థాయదాసి నో;
న తత్థ విమనా హోమ, తుయ్హత్థాయ మహామునే.
౪౪౯. ‘‘‘నేకకోటిసహస్సాని, ఉపకారాయదాసి నో;
న తత్థ విమనా హోమ, తుయ్హత్థాయ మహామునే.
౪౫౦. ‘‘‘నేకకోటిసహస్సాని, భోజనత్థాయదాసి నో;
న తత్థ విమనా హోమ, తుయ్హత్థాయ మహామునే.
౪౫౧. ‘‘‘నేకకోటిసహస్సాని, జీవితాని చజిమ్హసే [చజిమ్హ నో (పీ. క.)];
భయమోక్ఖం కరిస్సామ, జీవితాని చజిమ్హసే.
౪౫౨. ‘‘‘అఙ్గగతే అలఙ్కారే, వత్థే నానావిధే బహూ;
ఇత్థిభణ్డే న గూహామ, తుయ్హత్థాయ మహామునే.
౪౫౩. ‘‘‘ధనధఞ్ఞపరిచ్చాగం, గామాని నిగమాని చ;
ఖేత్తం పుత్తా చ ధీతా చ, పరిచ్చత్తా మహామునే.
౪౫౪. ‘‘‘హత్థీ అస్సా గవా చాపి, దాసియో పరిచారికా;
తుయ్హత్థాయ మహావీర, పరిచ్చత్తం అసఙ్ఖియం.
౪౫౫. ‘‘‘యం అమ్హే పటిమన్తేసి, దానం దస్సామ యాచకే;
విమనం నో న పస్సామ, దదతో దానముత్తమం.
౪౫౬. ‘‘‘నానావిధం బహుం దుక్ఖం, సంసారే చ బహుబ్బిధే;
తుయ్హత్థాయ మహావీర, అనుభుత్తం అసఙ్ఖియం.
౪౫౭. ‘‘‘సుఖప్పత్తానుమోదామ, న చ దుక్ఖేసు దుమ్మనా;
సబ్బత్థ తులితా హోమ, తుయ్హత్థాయ మహామునే.
౪౫౮. ‘‘‘అనుమగ్గేన సమ్బుద్ధో, యం ధమ్మం అభినీహరి;
అనుభోత్వా సుఖం దుక్ఖం, పత్తో బోధిం మహామునే.
౪౫౯. ‘‘‘బ్రహ్మదేవఞ్చ సమ్బుద్ధం, గోతమం లోకనాయకం;
అఞ్ఞేసం లోకనాథానం, సఙ్గమం తేహి నో బహూ.
౪౬౦. ‘‘‘అధికారం బహుం అమ్హే, తుయ్హత్థాయ మహామునే;
గవేసతో బుద్ధధమ్మే, మయం తే పరిచారికా.
౪౬౧. ‘‘‘కప్పే చ సతసహస్సే, చతురో చ అసఙ్ఖియే;
దీపఙ్కరో మహావీరో, ఉప్పజ్జి లోకనాయకో.
౪౬౨. ‘‘‘పచ్చన్తదేసవిసయే, నిమన్తేత్వా తథాగతం;
తస్స ఆగమనం మగ్గం, సోధేన్తి తుట్ఠమానసా.
౪౬౩. ‘‘‘తేన కాలేన సో ఆసి, సుమేధో నామ బ్రాహ్మణో;
మగ్గఞ్చ పటియాదేసి, ఆయతో సబ్బదస్సినో.
౪౬౪. ‘‘‘తేన కాలేన అహుమ్హ, సబ్బా బ్రాహ్మణసమ్భవా;
థలూదజాని పుప్ఫాని, ఆహరిమ్హ సమాగమం.
౪౬౫. ‘‘‘తస్మిం సో సమయే బుద్ధో, దీపఙ్కరో మహాయసో;
వియాకాసి మహావీరో, ఇసిముగ్గతమానసం.
౪౬౬. ‘‘‘చలతీ రవతీ పుథవీ, సఙ్కమ్పతి సదేవకే;
తస్స కమ్మం పకిత్తేన్తే, ఇసిముగ్గతమానసం.
౪౬౭. ‘‘‘దేవకఞ్ఞా మనుస్సా చ, మయఞ్చాపి సదేవకా;
నానాపూజనీయం భణ్డం, పూజయిత్వాన పత్థయుం.
౪౬౮. ‘‘‘తేసం బుద్ధో వియాకాసి, జోతిదీప సనామకో;
అజ్జ యే పత్థితా అత్థి, తే భవిస్సన్తి సమ్ముఖా.
౪౬౯. ‘‘‘అపరిమేయ్యే ఇతో కప్పే, యం నో బుద్ధో వియాకరి;
తం వాచమనుమోదేన్తా, ఏవంకారీ అహుమ్హ నో.
౪౭౦. ‘‘‘తస్స కమ్మస్స సుకతస్స, తస్స చిత్తం పసాదయుం;
దేవమానుసికం యోనిం, అనుభోత్వా అసఙ్ఖియం.
౪౭౧. ‘‘‘సుఖదుక్ఖేనుభోత్వాన, దేవేసు మానుసేసు చ;
పచ్ఛిమే భవే సమ్పత్తే, జాతామ్హ సాకియే కులే.
౪౭౨. ‘‘‘రూపవతీ భోగవతీ, యససీలవతీ తతో;
సబ్బఙ్గసమ్పదా హోమ, కులేసు అభిసక్కతా.
౪౭౩. ‘‘‘లాభం సిలోకం సక్కారం, లోకధమ్మసమాగమం;
చిత్తఞ్చ దుక్ఖితం నత్థి, వసామ అకుతోభయా.
౪౭౪. ‘‘‘వుత్తఞ్హేతం భగవతా, రఞ్ఞో అన్తేపురే తదా;
ఖత్తియానం పురే వీర [తాసం (స్యా.)], ఉపకారఞ్చ నిద్దిసి.
౪౭౫. ‘‘‘ఉపకారా చ యా నారీ, యా చ నారీ సుఖే దుఖే;
అత్థక్ఖాయీ చ యా నారీ, యా చ నారీనుకమ్పికా.
౪౭౬. ‘‘‘ధమ్మం చరే సుచరితం, న నం దుచ్చరితం చరే;
ధమ్మచారీ సుఖం సేతి, అస్మిం లోకే పరమ్హి చ.
౪౭౭. ‘‘‘అగారం విజహిత్వాన, పబ్బజిమ్హనగారియం;
అడ్ఢమాసే అసమ్పత్తే, చతుసచ్చం ఫుసిమ్హ నో.
౪౭౮. ‘‘‘చీవరం పిణ్డపాతఞ్చ, పచ్చయం సయనాసనం;
ఉపనేన్తి బహూ అమ్హే, సాగరస్సేవ ఊమియో.
౪౭౯. ‘‘‘కిలేసా ఝాపితా అమ్హం [మయ్హం (స్యా.), అమ్హాకం (క.)], భవా సబ్బే సమూహతా;
నాగీవ బన్ధనం ఛేత్వా, విహరామ అనాసవా.
౪౮౦. ‘‘‘స్వాగతం వత నో ఆసి, మమ బుద్ధస్స సన్తికే;
తిస్సో విజ్జా అనుప్పత్తా, కతం బుద్ధస్స సాసనం.
౪౮౧. ‘‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’.
౪౮౨. ‘‘ఏవం బహువిధం దుక్ఖం, సమ్పత్తీ చ బహుబ్బిధా;
విసుద్ధభావం సమ్పత్తా, లభామ సబ్బసమ్పదా.
౪౮౩. ‘‘యా దదన్తి సకత్తానం, పుఞ్ఞత్థాయ మహేసినో;
సహాయసమ్పదా హోన్తి, నిబ్బానపదమసఙ్ఖతం.
౪౮౪. ‘‘పరిక్ఖీణం అతీతఞ్చ, పచ్చుప్పన్నం అనాగతం;
సబ్బకమ్మమ్పి నో ఖీణం, పాదే వన్దామ చక్ఖుమ.
౪౮౫. ‘‘నిబ్బానాయ వదన్తీనం, కిం వో వక్ఖామ ఉత్తరి;
సన్తసఙ్ఖతదోసఞ్హి, పప్పోథ [సన్తసఙ్ఖతదోసో యో, పజ్జోతం (స్యా. పీ. క.)] అమతం పదం’’.
ఇత్థం సుదం యసోధరాపముఖాని అట్ఠారసభిక్ఖునీసహస్సాని భగవతో సమ్ముఖా ఇమా గాథాయో అభాసిత్థాతి.
యసోధరాపముఖఅట్ఠారసభిక్ఖునీసహస్సాపదానం దసమం.
కుణ్డలకేసీవగ్గో తతియో.