౩. కుణ్డలకేసీవగ్గో

౧. కుణ్డలకేసాథేరీఅపదానం

౧. ‘‘పదుముత్తరో నామ జినో, సబ్బధమ్మాన పారగూ;

ఇతో సతసహస్సమ్హి, కప్పే ఉప్పజ్జి నాయకో.

౨. ‘‘తదాహం హంసవతియం, జాతా సేట్ఠికులే అహుం;

నానారతనపజ్జోతే, మహాసుఖసమప్పితా.

౩. ‘‘ఉపేత్వా తం మహావీరం, అస్సోసిం ధమ్మదేసనం;

తతో జాతప్పసాదాహం, ఉపేసిం సరణం జినం.

౪. ‘‘తదా మహాకారుణికో, పదుముత్తరనామకో;

ఖిప్పాభిఞ్ఞానమగ్గన్తి, ఠపేసి భిక్ఖునిం సుభం.

౫. ‘‘తం సుత్వా ముదితా హుత్వా, దానం దత్వా మహేసినో;

నిపచ్చ సిరసా పాదే, తం ఠానమభిపత్థయిం.

౬. ‘‘అనుమోది మహావీరో, ‘భద్దే యం తేభిపత్థితం;

సమిజ్ఝిస్సతి తం సబ్బం, సుఖినీ హోహి నిబ్బుతా.

౭. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౮. ‘‘‘తస్స ధమ్మేసు దాయాదా, ఓరసా ధమ్మనిమ్మితా;

భద్దాకుణ్డలకేసాతి, హేస్సతి సత్థు సావికా’.

౯. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౦. ‘‘తతో చుతా యామమగం, తతోహం తుసితం గతా;

తతో చ నిమ్మానరతిం, వసవత్తిపురం తతో.

౧౧. ‘‘యత్థ యత్థూపపజ్జామి, తస్స కమ్మస్స వాహసా;

తత్థ తత్థేవ రాజూనం, మహేసిత్తమకారయిం.

౧౨. ‘‘తతో చుతా మనుస్సేసు, రాజూనం చక్కవత్తినం;

మణ్డలీనఞ్చ రాజూనం, మహేసిత్తమకారయిం.

౧౩. ‘‘సమ్పత్తిం అనుభోత్వాన, దేవేసు మానుసేసు చ;

సబ్బత్థ సుఖితా హుత్వా, నేకకప్పేసు సంసరిం.

౧౪. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౧౫. ‘‘ఉపట్ఠాకో మహేసిస్స, తదా ఆసి నరిస్సరో;

కాసిరాజా కికీ నామ, బారాణసిపురుత్తమే.

౧౬. ‘‘తస్స ధీతా చతుత్థాసిం, భిక్ఖుదాయీతి విస్సుతా;

ధమ్మం సుత్వా జినగ్గస్స, పబ్బజ్జం సమరోచయిం.

౧౭. ‘‘అనుజాని న నో తాతో, అగారేవ తదా మయం;

వీసవస్ససహస్సాని, విచరిమ్హ అతన్దితా.

౧౮. ‘‘కోమారిబ్రహ్మచరియం, రాజకఞ్ఞా సుఖేధితా;

బుద్ధోపట్ఠాననిరతా, ముదితా సత్త ధీతరో.

౧౯. ‘‘సమణీ సమణగుత్తా చ, భిక్ఖునీ భిక్ఖుదాయికా;

ధమ్మా చేవ సుధమ్మా చ, సత్తమీ సఙ్ఘదాయికా.

౨౦. ‘‘ఖేమా ఉప్పలవణ్ణా చ, పటాచారా అహం తదా;

కిసాగోతమీ ధమ్మదిన్నా, విసాఖా హోతి సత్తమీ.

౨౧. ‘‘తేహి కమ్మేహి సుకతేహి, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౨. ‘‘పచ్ఛిమే చ భవే దాని, గిరిబ్బజపురుత్తమే;

జాతా సేట్ఠికులే ఫీతే, యదాహం యోబ్బనే ఠితా.

౨౩. ‘‘చోరం వధత్థం నీయన్తం, దిస్వా రత్తా తహిం అహం;

పితా మే తం సహస్సేన, మోచయిత్వా వధా తతో.

౨౪. ‘‘అదాసి తస్స మం తాతో, విదిత్వాన మనం మమ;

తస్సాహమాసిం విసట్ఠా, అతీవ దయితా హితా.

౨౫. ‘‘సో మే భూసనలోభేన, బలిమజ్ఝాసయో [ఖలితజ్ఝాసయో (సీ.), బలిం పచ్చాహరం (స్యా.), మాలపచ్ఛాహతం (పీ.)] దిసో;

చోరప్పపాతం నేత్వాన, పబ్బతం చేతయీ వధం.

౨౬. ‘‘తదాహం పణమిత్వాన, సత్తుకం సుకతఞ్జలీ;

రక్ఖన్తీ అత్తనో పాణం, ఇదం వచనమబ్రవిం.

౨౭. ‘‘‘ఇదం సువణ్ణకేయూరం, ముత్తా వేళురియా బహూ;

సబ్బం హరస్సు [వరస్సు (క.)] భద్దన్తే, మఞ్చ దాసీతి సావయ’.

౨౮. ‘‘‘ఓరోపయస్సు కల్యాణీ, మా బాళ్హం పరిదేవసి;

న చాహం అభిజానామి, అహన్త్వా ధనమాభతం’.

౨౯. ‘‘‘యతో సరామి అత్తానం, యతో పత్తోస్మి విఞ్ఞుతం;

న చాహం అభిజానామి, అఞ్ఞం పియతరం తయా’.

౩౦. ‘‘‘ఏహి తం ఉపగూహిస్సం, కత్వాన తం పదక్ఖిణం;

న చ దాని పునో అత్థి [తం వన్దామి పున నత్థి (స్యా.)], మమ తుయ్హఞ్చ సఙ్గమో.

౩౧. ‘‘‘న హి సబ్బేసు ఠానేసు, పురిసో హోతి పణ్డితో;

ఇత్థీపి పణ్డితా హోతి, తత్థ తత్థ విచక్ఖణా.

౩౨. ‘‘‘న హి సబ్బేసు ఠానేసు, పురిసో హోతి పణ్డితో;

ఇత్థీపి పణ్డితా హోతి, లహుం అత్థవిచిన్తికా.

౩౩. ‘‘‘లహుఞ్చ వత ఖిప్పఞ్చ, నికట్ఠే [నేకత్థే (సీ. స్యా.)] సమచేతయిం;

మిగం ఉణ్ణా యథా ఏవం [చిత్తపుణ్ణాయ తానేవ (స్యా.), మిగం పుణ్ణాయ తేనేవ (పీ.)], తదాహం సత్తుకం వధిం.

౩౪. ‘‘‘యో చ ఉప్పతితం అత్థం, న ఖిప్పమనుబుజ్ఝతి;

సో హఞ్ఞతే మన్దమతి, చోరోవ గిరిగబ్భరే.

౩౫. ‘‘‘యో చ ఉప్పతితం అత్థం, ఖిప్పమేవ నిబోధతి;

ముచ్చతే సత్తుసమ్బాధా, తదాహం సత్తుకా యథా’.

౩౬. ‘‘తదాహం పాతయిత్వాన, గిరిదుగ్గమ్హి సత్తుకం;

సన్తికం సేతవత్థానం, ఉపేత్వా పబ్బజిం అహం.

౩౭. ‘‘సణ్డాసేన చ కేసే మే, లుఞ్చిత్వా సబ్బసో తదా;

పబ్బజిత్వాన సమయం, ఆచిక్ఖింసు నిరన్తరం.

౩౮. ‘‘తతో తం ఉగ్గహేత్వాహం, నిసీదిత్వాన ఏకికా;

సమయం తం విచిన్తేసిం, సువానో మానుసం కరం.

౩౯. ‘‘ఛిన్నం గయ్హ సమీపే మే, పాతయిత్వా అపక్కమి;

దిస్వా నిమిత్తమలభిం, హత్థం తం పుళవాకులం.

౪౦. ‘‘తతో ఉట్ఠాయ సంవిగ్గా, అపుచ్ఛిం సహధమ్మికే;

తే అవోచుం విజానన్తి, తం అత్థం సక్యభిక్ఖవో.

౪౧. ‘‘సాహం తమత్థం పుచ్ఛిస్సం, ఉపేత్వా బుద్ధసావకే;

తే మమాదాయ గచ్ఛింసు, బుద్ధసేట్ఠస్స సన్తికం.

౪౨. ‘‘సో మే ధమ్మమదేసేసి, ఖన్ధాయతనధాతుయో;

అసుభానిచ్చదుక్ఖాతి, అనత్తాతి చ నాయకో.

౪౩. ‘‘తస్స ధమ్మం సుణిత్వాహం, ధమ్మచక్ఖుం విసోధయిం;

తతో విఞ్ఞాతసద్ధమ్మా, పబ్బజ్జం ఉపసమ్పదం.

౪౪. ‘‘ఆయాచితో తదా ఆహ, ‘ఏహి భద్దే’తి నాయకో;

తదాహం ఉపసమ్పన్నా, పరిత్తం తోయమద్దసం.

౪౫. ‘‘పాదపక్ఖాలనేనాహం, ఞత్వా సఉదయబ్బయం;

తథా సబ్బేపి సఙ్ఖారే, ఈదిసం చిన్తయిం [సఙ్ఖారా, ఇతి సంచిన్తయిం (సీ. స్యా. పీ.)] తదా.

౪౬. ‘‘తతో చిత్తం విముచ్చి మే, అనుపాదాయ సబ్బసో;

ఖిప్పాభిఞ్ఞానమగ్గం మే, తదా పఞ్ఞాపయీ జినో.

౪౭. ‘‘ఇద్ధీసు చ వసీ హోమి, దిబ్బాయ సోతధాతుయా;

పరచిత్తాని జానామి, సత్థుసాసనకారికా.

౪౮. ‘‘పుబ్బేనివాసం జానామి, దిబ్బచక్ఖు విసోధితం;

ఖేపేత్వా ఆసవే సబ్బే, విసుద్ధాసిం సునిమ్మలా.

౪౯. ‘‘పరిచిణ్ణో మయా సత్థా, కతం బుద్ధస్స సాసనం;

ఓహితో గరుకో భారో, భవనేత్తి సమూహతా.

౫౦. ‘‘యస్సత్థాయ పబ్బజితా, అగారస్మానగారియం;

సో మే అత్థో అనుప్పత్తో, సబ్బసంయోజనక్ఖయో.

౫౧. ‘‘అత్థధమ్మనిరుత్తీసు, పటిభానే తథేవ చ;

ఞాణం మే విమలం సుద్ధం, బుద్ధసేట్ఠస్స సాసనే.

౫౨. ‘‘కిలేసా ఝాపితా మయ్హం, భవా సబ్బే సమూహతా;

నాగీవ బన్ధనం ఛేత్వా, విహరామి అనాసవా.

౫౩. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౫౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం భద్దాకుణ్డలకేసా భిక్ఖునీ ఇమా గాథాయో అభాసిత్థాతి.

కుణ్డలకేసాథేరియాపదానం పఠమం.

౨. కిసాగోతమీథేరీఅపదానం

౫౫. ‘‘పదుముత్తరో నామ జినో, సబ్బధమ్మాన పారగూ;

ఇతో సతసహస్సమ్హి, కప్పే ఉప్పజ్జి నాయకో.

౫౬. ‘‘తదాహం హంసవతియం, జాతా అఞ్ఞతరే కులే;

ఉపేత్వా తం నరవరం, సరణం సముపాగమిం.

౫౭. ‘‘ధమ్మఞ్చ తస్స అస్సోసిం, చతుసచ్చూపసఞ్హితం;

మధురం పరమస్సాదం, వట్టసన్తిసుఖావహం [చిత్తసన్తి … (స్యా.)].

౫౮. ‘‘తదా చ భిక్ఖునిం వీరో, లూఖచీవరధారినిం;

ఠపేన్తో ఏతదగ్గమ్హి, వణ్ణయీ పురిసుత్తమో.

౫౯. ‘‘జనేత్వానప్పకం పీతిం, సుత్వా భిక్ఖునియా గుణే;

కారం కత్వాన బుద్ధస్స, యథాసత్తి యథాబలం.

౬౦. ‘‘నిపచ్చ మునివరం తం, తం ఠానమభిపత్థయిం;

తదానుమోది సమ్బుద్ధో, ఠానలాభాయ నాయకో.

౬౧. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౬౨. ‘‘‘తస్స ధమ్మేసు దాయాదా, ఓరసా ధమ్మనిమ్మితా;

కిసాగోతమీ [గోతమీ నామ (సీ. క.)] నామేన, హేస్సతి సత్థు సావికా’.

౬౩. ‘‘తం సుత్వా ముదితా హుత్వా, యావజీవం తదా జినం;

మేత్తచిత్తా పరిచరిం, పచ్చయేహి వినాయకం.

౬౪. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౬౫. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౬౬. ‘‘ఉపట్ఠాకో మహేసిస్స, తదా ఆసి నరిస్సరో;

కాసిరాజా కికీ నామ, బారాణసిపురుత్తమే.

౬౭. ‘‘పఞ్చమీ తస్స ధీతాసిం, ధమ్మా నామేన విస్సుతా;

ధమ్మం సుత్వా జినగ్గస్స, పబ్బజ్జం సమరోచయిం.

౬౮. ‘‘అనుజాని న నో తాతో, అగారేవ తదా మయం;

వీసవస్ససహస్సాని, విచరిమ్హ అతన్దితా.

౬౯. ‘‘కోమారిబ్రహ్మచరియం, రాజకఞ్ఞా సుఖేధితా;

బుద్ధోపట్ఠాననిరతా, ముదితా సత్త ధీతరో.

౭౦. ‘‘సమణీ సమణగుత్తా చ, భిక్ఖునీ భిక్ఖుదాయికా;

ధమ్మా చేవ సుధమ్మా చ, సత్తమీ సఙ్ఘదాయికా.

౭౧. ‘‘ఖేమా ఉప్పలవణ్ణా చ, పటాచారా చ కుణ్డలా;

అహఞ్చ ధమ్మదిన్నా చ, విసాఖా హోతి సత్తమీ.

౭౨. ‘‘తేహి కమ్మేహి సుకతేహి, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౭౩. ‘‘పచ్ఛిమే చ భవే దాని, జాతా సేట్ఠికులే అహం;