నమో తస్స భగవతో అరహతో సమ్మాసమ్బుద్ధస్స

ఖుద్దకనికాయే

థేరీఅపదానపాళి

౧. సుమేధావగ్గో

౧. సుమేధాథేరీఅపదానం

అథ థేరికాపదానాని సుణాథ –

౧. ‘‘భగవతి కోణాగమనే, సఙ్ఘారామమ్హి నవనివేసనమ్హి [నివేసమ్హి (స్యా.)];

సఖియో తిస్సో జనియో, విహారదానం అదాసిమ్హ.

౨. ‘‘దసక్ఖత్తుం సతక్ఖత్తుం, దససతక్ఖత్తుం సతానఞ్చ సతక్ఖత్తుం [సతాని చ సత్తక్ఖత్తుం (సీ. క.)];

దేవేసు ఉపపజ్జిమ్హ, కో వాదో మానుసే భవే.

౩. ‘‘దేవే మహిద్ధికా అహుమ్హ, మానుసకమ్హి కో వాదో;

సత్తరతనమహేసీ [సత్తరతనస్స మహేసీ (సీ. పీ.)], ఇత్థిరతనం అహం భవిం.

౪. ‘‘ఇధ సఞ్చితకుసలా [తత్థ సఞ్చితం కుసలం (స్యా.)], సుసమిద్ధకులప్పజా;

ధనఞ్జానీ చ ఖేమా చ, అహమ్పి చ తయో జనా.

౫. ‘‘ఆరామం సుకతం కత్వా, సబ్బావయవమణ్డితం;

బుద్ధప్పముఖసఙ్ఘస్స, నియ్యాదేత్వా సమోదితా.

౬. ‘‘యత్థ యత్థూపపజ్జామి, తస్స కమ్మస్స వాహసా;

దేవేసు అగ్గతం పత్తా, మనుస్సేసు తథేవ చ.

౭. ‘‘ఇమస్మింయేవ కప్పమ్హి, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౮. ‘‘ఉపట్ఠాకో మహేసిస్స, తదా ఆసి నరిస్సరో;

కాసిరాజా కికీ నామ, బారాణసిపురుత్తమే.

౯. ‘‘తస్సాసుం సత్త ధీతరో, రాజకఞ్ఞా సుఖేధితా [సుఖేథితా (స్యా.)];

బుద్ధోపట్ఠాననిరతా, బ్రహ్మచరియం చరింసు తా.

౧౦. ‘‘తాసం సహాయికా హుత్వా, సీలేసు సుసమాహితా;

దత్వా దానాని సక్కచ్చం, అగారేవ వతం [అగారేవ వత్తం (స్యా.)] చరిం.

౧౧. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసూపగా అహం.

౧౨. ‘‘తతో చుతా యామమగం [యామసగ్గం (స్యా.)], తతోహం తుసితం గతా;

తతో చ నిమ్మానరతిం, వసవత్తిపురం తతో.

౧౩. ‘‘యత్థ యత్థూపపజ్జామి, పుఞ్ఞకమ్మసమోహితా;

తత్థ తత్థేవ రాజూనం, మహేసిత్తమకారయిం.

౧౪. ‘‘తతో చుతా మనుస్సత్తే, రాజూనం చక్కవత్తినం;

మణ్డలీనఞ్చ రాజూనం, మహేసిత్తమకారయిం.

౧౫. ‘‘సమ్పత్తిమనుభోత్వాన, దేవేసు మానుసేసు చ;

సబ్బత్థ సుఖితా హుత్వా, నేకజాతీసు సంసరిం.

౧౬. ‘‘సో హేతు చ సో పభవో, తమ్మూలం సాసనే ఖమం [తమ్మూలం సా చ సాసనే ఖన్తి (సీ. పీ. క.)];

పఠమం తం సమోధానం, తం ధమ్మరతాయ నిబ్బానం [నిబ్బుతం (స్యా.)].

౧౭. ‘‘కిలేసా ఝాపితా మయ్హం, భవా సబ్బే సమూహతా;

నాగీవ బన్ధనం ఛేత్వా, విహరామి అనాసవా.

౧౮. ‘‘స్వాగతం వత మే ఆసి, మమ బుద్ధస్స [బుద్ధసేట్ఠస్స (సీ. స్యా. క.)] సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౧౯. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం సుమేధా భిక్ఖునీ ఇమా గాథాయో అభాసిత్థాతి.

సుమేధాథేరియాపదానం పఠమం.

౨. మేఖలాదాయికాథేరీఅపదానం

౨౦. ‘‘సిద్ధత్థస్స భగవతో, థూపకారాపికా అహుం [థూపకార మకాసహం (స్యా.)];

మేఖలికా మయా దిన్నా, నవకమ్మాయ సత్థునో.

౨౧. ‘‘నిట్ఠితే చ మహాథూపే, మేఖలం పునదాసహం;

లోకనాథస్స మునినో, పసన్నా సేహి పాణిభి.

౨౨. ‘‘చతున్నవుతితో కప్పే, యం మేఖలమదం తదా;

దుగ్గతిం నాభిజానామి, థూపకారస్సిదం ఫలం.

౨౩. ‘‘కిలేసా ఝాపితా మయ్హం…పే… విహరామి అనాసవా.

౨౪. ‘‘స్వాగతం వత మే ఆసి…పే… కతం బుద్ధస్స సాసనం.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం మేఖలాదాయికా భిక్ఖునీ ఇమా గాథాయో అభాసిత్థాతి.

మేఖలాదాయికాథేరియాపదానం దుతియం.

౩. మణ్డపదాయికాథేరీఅపదానం

౨౬. ‘‘కోణాగమనబుద్ధస్స, మణ్డపో కారితో మయా;

ధువం తిచీవరందాసిం [థూపఞ్చ పవరమదం (స్యా.), ధువఞ్చ చీవరం అదం (పీ.)], బుద్ధస్స లోకబన్ధునో.

౨౭. ‘‘యం యం జనపదం యామి, నిగమే రాజధానియో;

సబ్బత్థ పూజితో హోమి, పుఞ్ఞకమ్మస్సిదం ఫలం.

౨౮. ‘‘కిలేసా ఝాపితా మయ్హం…పే… విహరామి అనాసవా.

౨౯. ‘‘స్వాగతం వత మే ఆసి…పే… కతం బుద్ధస్స సాసనం.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం మణ్డపదాయికా భిక్ఖునీ ఇమా గాథాయో అభాసిత్థాతి.

మణ్డపదాయికాథేరియాపదానం తతియం.

౪. సఙ్కమనత్థాథేరీఅపదానం

౩౧. ‘‘విపస్సిస్స భగవతో [కోణ్డఞ్ఞస్స భగవతో (స్యా. పీ.)], లోకజేట్ఠస్స తాదినో;

రథియం పటిపన్నస్స, తారయన్తస్స పాణినో.

౩౨. ‘‘ఘరతో నిక్ఖమిత్వాన, అవకుజ్జా నిపజ్జహం;

అనుకమ్పకో లోకనాథో, సిరసి [సీసన్తే (సీ. క.)] అక్కమీ మమ [తదా (స్యా. పీ.)].

౩౩. ‘‘అక్కమిత్వాన సిరసి [సమ్బుద్ధో (క.)], అగమా లోకనాయకో;

తేన చిత్తప్పసాదేన, తుసితం అగమాసహం.

౩౪. ‘‘కిలేసా ఝాపితా మయ్హం…పే… విహరామి అనాసవా.

౩౫. ‘‘స్వాగతం వత మే ఆసి…పే… కతం బుద్ధస్స సాసనం.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం సఙ్కమనత్థా [సఙ్కమనదా (స్యా.)] భిక్ఖునీ ఇమా గాథాయో అభాసిత్థాతి.

సఙ్కమనత్థాథేరియాపదానం చతుత్థం.

౫. నళమాలికాథేరీఅపదానం

౩౭. ‘‘చన్దభాగానదీతీరే, అహోసిం కిన్నరీ తదా;

అద్దసం విరజం బుద్ధం, సయమ్భుం అపరాజితం.

౩౮. ‘‘పసన్నచిత్తా సుమనా, వేదజాతా కతఞ్జలీ;

నళమాలం గహేత్వాన, సయమ్భుం అభిపూజయిం.

౩౯. ‘‘తేన కమ్మేన సుకతేన, చేతనాపణిధీహి చ;

జహిత్వా కిన్నరీదేహం, అగచ్ఛిం తిదసం గతిం.

౪౦. ‘‘ఛత్తింసదేవరాజూనం, మహేసిత్తమకారయిం;

దసన్నం చక్కవత్తీనం, మహేసిత్తమకారయిం;

సంవేజేత్వాన మే చిత్తం [వేదయిత్వాన కుసలం (స్యా.), సంవేదయిత్వా కుసలం (పీ.)], పబ్బజిం అనగారియం.

౪౧. ‘‘కిలేసా ఝాపితా మయ్హం, భవా సబ్బే సమూహతా [భవా సంఘాతితా మమ (క.)];

సబ్బాసవపరిక్ఖీణా, నత్థి దాని పునబ్భవో.

౪౨. ‘‘చతున్నవుతితో కప్పే, యం పుప్ఫమభిపూజయిం;

దుగ్గతిం నాభిజానామి, పుప్ఫపూజాయిదం ఫలం.

౪౩. ‘‘కిలేసా ఝాపితా మయ్హం…పే… విహరామి అనాసవా.

౪౪. ‘‘స్వాగతం వత మే ఆసి…పే… కతం బుద్ధస్స సాసనం.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం నళమాలికా థేరీ ఇమా గాథాయో అభాసిత్థాతి.

నళమాలికాథేరియాపదానం పఞ్చమం.

౬. ఏకపిణ్డపాతదాయికాథేరీఅపదానం

౪౬. ‘‘నగరే బన్ధుమతియా, బన్ధుమా నామ ఖత్తియో;

తస్స రఞ్ఞో అహుం భరియా, ఏకజ్ఝం చారయామహం [ఏకచ్చం వాదయామహం (స్యా.)].

౪౭. ‘‘రహోగతా నిసీదిత్వా, ఏవం చిన్తేసహం తదా;

‘ఆదాయ గమనీయఞ్హి, కుసలం నత్థి మే కతం.

౪౮. ‘‘‘మహాభితాపం కటుకం, ఘోరరూపం సుదారుణం;

నిరయం నూన గచ్ఛామి, ఏత్థ మే నత్థి సంసయో’.

౪౯. ‘‘రాజానం ఉపసఙ్కమ్మ, ఇదం వచనమబ్రవిం;

‘ఏకం మే సమణం దేహి, భోజయిస్సామి ఖత్తియ’.

౫౦. ‘‘అదాసి మే మహారాజా, సమణం భావితిన్ద్రియం;

తస్స పత్తం గహేత్వాన, పరమన్నేన పూరయిం [తప్పయిం (సీ.)].

౫౧. ‘‘పూరయిత్వా పరమన్నం, గన్ధాలేపం అకాసహం;

జాలేన పిదహిత్వాన, వత్థయుగేన [పీతచోళేన (స్యా.), మహానేలేన (పీ.)] ఛాదయిం.

౫౨. ‘‘ఆరమ్మణం మమం ఏతం, సరామి యావజీవిహం;

తత్థ చిత్తం పసాదేత్వా, తావతింసమగచ్ఛహం.

౫౩. ‘‘తింసానం దేవరాజూనం, మహేసిత్తమకారయిం;

మనసా పత్థితం మయ్హం, నిబ్బత్తతి యథిచ్ఛితం [యతిచ్ఛకం (స్యా.), యదిచ్ఛకం (పీ. క.)].

౫౪. ‘‘వీసానం చక్కవత్తీనం, మహేసిత్తమకారయిం;

ఓచితత్తావ [ఉపచితత్తా (స్యా.)] హుత్వాన, సంసరామి భవేస్వహం.

౫౫. ‘‘సబ్బబన్ధనముత్తాహం, అపేతా మే ఉపాదికా;

సబ్బాసవపరిక్ఖీణా, నత్థి దాని పునబ్భవో.

౫౬. ‘‘ఏకనవుతితో కప్పే, యం దానమదదిం తదా;

దుగ్గతిం నాభిజానామి, పిణ్డపాతస్సిదం ఫలం.

౫౭. ‘‘కిలేసా ఝాపితా మయ్హం…పే… విహరామి అనాసవా.

౫౮. ‘‘స్వాగతం వత మే ఆసి…పే… కతం బుద్ధస్స సాసనం.

౫౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఏకపిణ్డపాతదాయికా భిక్ఖునీ ఇమా గాథాయో అభాసిత్థాతి.

ఏకపిణ్డపాతదాయికాథేరియాపదానం ఛట్ఠం.

౭. కటచ్ఛుభిక్ఖాదాయికాథేరీఅపదానం

౬౦. ‘‘పిణ్డచారం చరన్తస్స, తిస్సనామస్స సత్థునో;

కటచ్ఛుభిక్ఖం పగ్గయ్హ, బుద్ధసేట్ఠస్స దాసహం.

౬౧. ‘‘పటిగ్గహేత్వా సమ్బుద్ధో, తిస్సో లోకగ్గనాయకో;

వీథియా సణ్ఠితో సత్థా, అకా మే అనుమోదనం.

౬౨. ‘‘‘కటచ్ఛుభిక్ఖం దత్వాన, తావతింసం గమిస్ససి;

ఛత్తింసదేవరాజూనం, మహేసిత్తం కరిస్ససి.

౬౩. ‘‘‘పఞ్ఞాసం చక్కవత్తీనం, మహేసిత్తం కరిస్ససి;

మనసా పత్థితం సబ్బం, పటిలచ్ఛసి సబ్బదా.

౬౪. ‘‘‘సమ్పత్తిం అనుభోత్వాన, పబ్బజిస్ససికిఞ్చనా;

సబ్బాసవే పరిఞ్ఞాయ, నిబ్బాయిస్ససినాసవా’.

౬౫. ‘‘ఇదం వత్వాన సమ్బుద్ధో, తిస్సో లోకగ్గనాయకో;

నభం అబ్భుగ్గమీ వీరో, హంసరాజావ అమ్బరే.

౬౬. ‘‘సుదిన్నం మే దానవరం [సుదిన్నమేవ మే దానం (స్యా.)], సుయిట్ఠా యాగసమ్పదా;

కటచ్ఛుభిక్ఖం దత్వాన, పత్తాహం అచలం పదం.

౬౭. ‘‘ద్వేనవుతే ఇతో కప్పే, యం దానమదదిం తదా;

దుగ్గతిం నాభిజానామి, భిక్ఖాదానస్సిదం ఫలం.

౬౮. ‘‘కిలేసా ఝాపితా మయ్హం…పే… విహరామి అనాసవా.

౬౯. ‘‘స్వాగతం వత మే ఆసి…పే… కతం బుద్ధస్స సాసనం.

౭౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం కటచ్ఛుభిక్ఖాదాయికా భిక్ఖునీ ఇమా గాథాయో అభాసిత్థాతి.

కటచ్ఛుభిక్ఖాదాయికాథేరియాపదానం సత్తమం.

౮. సత్తుప్పలమాలికాథేరీఅపదానం