౮. యసోధరాథేరీఅపదానం
౩౧౪. ఏకస్మిం సమయే రమ్మే, ఇద్ధే రాజగహే పురే;
పబ్భారమ్హి వరేకమ్హి, వసన్తే నరనాయకే.
౩౧౫. వసన్తియా తమ్హి నగరే, రమ్మే భిక్ఖునుపస్సయే;
యసోధరాభిక్ఖునియా, ఏవం ఆసి వితక్కితం.
౩౧౬. ‘‘సుద్ధోదనో మహారాజా, గోతమీ చ పజాపతీ;
అభిఞ్ఞాతా మహాథేరా, థేరియో చ మహిద్ధికా.
౩౧౭. ‘‘సన్తిం గతావ ఆసుం తే, దీపచ్చీవ నిరాసవా;
లోకనాథే ధరన్తేవ, అహమ్పి చ సివం పదం.
౩౧౮. ‘‘గమిస్సామీతి చిన్తేత్వా, పస్సన్తీ ఆయుమత్తనో;
పస్సిత్వా ఆయుసఙ్ఖారం, తదహేవ ఖయం గతం.
౩౧౯. ‘‘పత్తచీవరమాదాయ, నిక్ఖమిత్వా సకస్సమా;
పురక్ఖతా భిక్ఖునీభి, సతేహి సహస్సేహి సా [సహ పఞ్చహి (సీ. పీ.)].
౩౨౦. ‘‘మహిద్ధికా మహాపఞ్ఞా, సమ్బుద్ధం ఉపసఙ్కమి;
సమ్బుద్ధం అభివాదేత్వా, సత్థునో చక్కలక్ఖణే;
నిసిన్నా ఏకమన్తమ్హి, ఇదం వచనమబ్రవి.
౩౨౧. ‘‘‘అట్ఠసత్తతివస్సాహం, పచ్ఛిమో వత్తతే వయో [పచ్ఛిమా వత్తయి వయా (స్యా.)];
పబ్భారమ్హి అనుప్పత్తా, ఆరోచేమి మహాముని.
౩౨౨. ‘‘‘పరిపక్కో వయో మయ్హం, పరిత్తం మమ జీవితం;
పహాయ వో గమిస్సామి, కతం మే సరణమత్తనో.
౩౨౩. ‘‘‘వయమ్హి పచ్ఛిమే కాలే, మరణం ఉపరుద్ధతి;
అజ్జరత్తిం మహావీర, పాపుణిస్సామి నిబ్బుతిం.
౩౨౪. ‘‘‘నత్థి జాతి జరా బ్యాధి, మరణఞ్చ మహామునే;
అజరామరణం పురం, గమిస్సామి అసఙ్ఖతం.
౩౨౫. ‘‘‘యావతా పరిసా నామ, సముపాసన్తి సత్థునో;
అపరాధమజానన్తీ [సచే మేత్థి (సీ.), పజానన్తీ (క.)], ఖమన్తం సమ్ముఖా మునే.
౩౨౬. ‘‘‘సంసరిత్వా చ సంసారే, ఖలితఞ్చే మమం తయి;
ఆరోచేమి మహావీర, అపరాధం ఖమస్సు మే’.
౩౨౭. ‘‘సుత్వాన వచనం తస్సా, మునిన్దో ఇదమబ్రవి;
‘కిముత్తరం తే వక్ఖామి, నిబ్బానాయ వజన్తియా.
౩౨౮. ‘‘‘ఇద్ధిఞ్చాపి నిదస్సేహి, మమ సాసనకారికే;
పరిసానఞ్చ సబ్బాసం, కఙ్ఖం ఛిన్దస్సు యావతా’.
౩౨౯. ‘‘సుత్వా తం మునినో వాచం, భిక్ఖునీ సా యసోధరా;
వన్దిత్వా మునిరాజం తం, ఇదం వచనమబ్రవి.
౩౩౦. ‘‘‘యసోధరా అహం వీర, అగారే తే పజాపతి;
సాకియమ్హి కులే జాతా, ఇత్థిఅఙ్గే పతిట్ఠితా.
౩౩౧. ‘‘‘థీనం సతసహస్సానం, నవుతీనం ఛదుత్తరి;
అగారే తే అహం వీర, పామోక్ఖా సబ్బా ఇస్సరా.
౩౩౨. ‘‘‘రూపాచారగుణూపేతా, యోబ్బనట్ఠా పియంవదా;
సబ్బా మం అపచాయన్తి, దేవతా వియ మానుసా.
౩౩౩. ‘‘‘కఞ్ఞాసతసహస్సపముఖా, సక్యపుత్తనివేసనే;
సమానసుఖదుక్ఖతా, దేవతా వియ నన్దనే.
౩౩౪. ‘‘‘కామధాతుమతిక్కమ్మ [కామధాతుమతిక్కన్తా (సీ. స్యా. పీ. క.)], సణ్ఠితా రూపధాతుయా;
రూపేన సదిసా నత్థి, ఠపేత్వా లోకనాయకం.
౩౩౫. ‘‘‘సమ్బుద్ధం అభివాదేత్వా, ఇద్ధిం దస్సేసి సత్థునో;
నేకా నానావిధాకారా, మహాఇద్ధీపి దస్సయీ [ఏవమాదీని వత్వాన, ఉపతిత్వాన అమ్బరం; ఇద్ధీ అనేకా దస్సేసి, బుద్ధానుఞ్ఞా యసోధరా; (సీ.)].
౩౩౬. ‘‘‘చక్కవాళసమం కాయం, సీసం ఉత్తరతో కురు;
ఉభో పక్ఖా దువే దీపా, జమ్బుదీపం సరీరతో.
౩౩౭. ‘‘‘దక్ఖిణఞ్చ సరం పిఞ్ఛం, నానాసాఖా తు పత్తకా;
చన్దఞ్చ సూరియఞ్చక్ఖి, మేరుపబ్బతతో సిఖం.
౩౩౮. ‘‘‘చక్కవాలగిరిం తుణ్డం, జమ్బురుక్ఖం సమూలకం;
బీజమానా ఉపాగన్త్వా, వన్దన్తీ లోకనాయకం.
౩౩౯. ‘‘‘హత్థివణ్ణం తథేవస్సం, పబ్బతం జలధిం తథా;
చన్దిమం సూరియం మేరుం, సక్కవణ్ణఞ్చ దస్సయి.
౩౪౦. ‘‘‘యసోధరా అహం వీర, పాదే వన్దామి చక్ఖుమ;
సహస్సలోకధాతూనం, ఫుల్లపద్మేన ఛాదయి.
౩౪౧. ‘‘‘బ్రహ్మవణ్ణఞ్చ మాపేత్వా, ధమ్మం దేసేసి సుఞ్ఞతం;
యసోధరా అహం వీర, పాదే వన్దామి చక్ఖుమ.
౩౪౨. ‘‘‘ఇద్ధీసు చ వసీ హోమి, దిబ్బాయ సోతధాతుయా;
చేతోపరియఞాణస్స, వసీ హోమి మహాముని.
౩౪౩. ‘‘‘పుబ్బేనివాసం జానామి, దిబ్బచక్ఖు విసోధితం;
సబ్బాసవపరిక్ఖీణా, నత్థి దాని పునబ్భవో.
౩౪౪. ‘‘‘అత్థధమ్మనిరుత్తీసు, పటిభానే తథేవ చ;
ఞాణం మయ్హం మహావీర, ఉప్పన్నం తవ సన్తికే.
౩౪౫. ‘‘‘పుబ్బానం లోకనాథానం, సఙ్గమం తే నిదస్సితం [సుదస్సితం (స్యా. పీ. క.)];
అధికారం బహుం మయ్హం, తుయ్హత్థాయ మహామునే.
౩౪౬. ‘‘‘యం మయ్హం పూరితం కమ్మం, కుసలం సరసే మునే;
తుయ్హత్థాయ మహావీర, పుఞ్ఞం ఉపచితం మయా.
౩౪౭. ‘‘‘అభబ్బట్ఠానే వజ్జేత్వా, వారయిత్వా అనాచరం;
తుయ్హత్థాయ మహావీర, సఞ్చత్తం జీవితం మయా.
౩౪౮. ‘‘‘నేకకోటిసహస్సాని, భరియత్థాయదాసి మం;
న తత్థ విమనా హోమి, తుయ్హత్థాయ మహాముని.
౩౪౯. ‘‘‘నేకకోటిసహస్సాని, ఉపకారాయదాసి మం;
న తత్థ విమనా హోమి, తుయ్హత్థాయ మహాముని.
౩౫౦. ‘‘‘నేకకోటిసహస్సాని, భోజనత్థాయదాసి మం;
న తత్థ విమనా హోమి, తుయ్హత్థాయ మహాముని.
౩౫౧. ‘‘‘నేకకోటిసహస్సాని, జీవితాని పరిచ్చజిం;
భయమోక్ఖం కరిస్సన్తి, దదామి మమ జీవితం.
౩౫౨. ‘‘‘అఙ్గగతే [అఙ్గే ఏవం (క.)] అలఙ్కారే, వత్థే నానావిధే బహూ;
ఇత్థిమణ్డే న గూహామి, తుయ్హత్థాయ మహాముని.
౩౫౩. ‘‘‘ధనధఞ్ఞపరిచ్చాగం, గామాని నిగమాని చ;
ఖేత్తం పుత్తా చ ధీతా చ, పరిచ్చత్తా మహాముని.
౩౫౪. ‘‘‘హత్థీ అస్సా గవా చాపి, దాసియో పరిచారికా;
తుయ్హత్థాయ మహావీర, పరిచ్చత్తా అసఙ్ఖియా.
౩౫౫. ‘‘‘యం మయ్హం పటిమన్తేసి [పతిమన్తేసి (సీ.)], దానం దస్సామి యాచకే;
విమనం మే న పస్సామి, దదతో దానముత్తమం.
౩౫౬. ‘‘‘నానావిధం బహుం దుక్ఖం, సంసారే చ బహుబ్బిధే;
తుయ్హత్థాయ మహావీర, అనుభుత్తం అసఙ్ఖియం.
౩౫౭. ‘‘‘సుఖప్పత్తానుమోదామి, న చ దుక్ఖేసు దుమ్మనా;
సబ్బత్థ తులితా హోమి, తుయ్హత్థాయ మహాముని.
౩౫౮. ‘‘‘అనుమగ్గేన సమ్బుద్ధో, యం ధమ్మం అభినీహరి;
అనుభోత్వా సుఖం దుక్ఖం, పత్తో బోధిం మహాముని.
౩౫౯. ‘‘‘బ్రహ్మదేవఞ్చ సమ్బుద్ధం, గోతమం లోకనాయకం;
అఞ్ఞేసం లోకనాథానం, సఙ్గమం తే బహుం మయా.
౩౬౦. ‘‘‘అధికారం బహుం మయ్హం, తుయ్హత్థాయ మహాముని;
గవేసతో బుద్ధధమ్మే, అహం తే పరిచారికా.
౩౬౧. ‘‘‘కప్పే చ సతసహస్సే, చతురో చ అసఙ్ఖియే;
దీపఙ్కరో మహావీరో, ఉప్పజ్జి లోకనాయకో.
౩౬౨. ‘‘‘పచ్చన్తదేసవిసయే, నిమన్తేత్వా తథాగతం;
తస్స ఆగమనం మగ్గం, సోధేన్తి తుట్ఠమానసా.
౩౬౩. ‘‘‘తేన కాలేన సో ఆసి, సుమేధో నామ బ్రాహ్మణో;
మగ్గఞ్చ పటియాదేసి, ఆయతో [ఆయతం (సీ.)] సబ్బదస్సినో.
౩౬౪. ‘‘‘తేన కాలేనహం ఆసిం, కఞ్ఞా బ్రాహ్మణసమ్భవా;
సుమిత్తానామ నామేన, ఉపగచ్ఛిం సమాగమం.
౩౬౫. ‘‘‘అట్ఠ ఉప్పలహత్థాని, పూజనత్థాయ సత్థునో;
ఆదాయ జనసంమజ్ఝే, అద్దసం ఇసి ముగ్గతం.
౩౬౬. ‘‘‘చిరానుగతం దయితం [చిరానుపరి ఆసీనం (సీ.)], అతిక్కన్తం మనోహరం;
దిస్వా తదా అమఞ్ఞిస్సం, సఫలం జీవితం మమ.
౩౬౭. ‘‘‘పరక్కమం తం సఫలం, అద్దసం ఇసినో తదా;
పుబ్బకమ్మేన సమ్బుద్ధే, చిత్తఞ్చాపి పసీది మే.
౩౬౮. ‘‘‘భియ్యో చిత్తం పసాదేసిం, ఇసే ఉగ్గతమానసే;
దేయ్యం అఞ్ఞం న పస్సామి, దేమి పుప్ఫాని తే ఇసి.
౩౬౯. ‘‘‘పఞ్చహత్థా తవ హోన్తు, తయో హోన్తు మమం ఇసే;
తేన సద్ధిం సమా హోన్తు, బోధత్థాయ తవం ఇసే’.
చతుత్థం భాణవారం.
౩౭౦. ‘‘ఇసి గహేత్వా పుప్ఫాని, ఆగచ్ఛన్తం మహాయసం;
పూజేసి జనసంమజ్ఝే, బోధత్థాయ మహాఇసి.
౩౭౧. ‘‘పస్సిత్వా జనసంమజ్ఝే, దీపఙ్కరో మహాముని;
వియాకాసి మహావీరో, ఇసి ముగ్గతమానసం.
౩౭౨. ‘‘అపరిమేయ్యే ఇతో కప్పే, దీపఙ్కరో మహాముని;
మమ కమ్మం వియాకాసి, ఉజుభావం మహాముని.
౩౭౩. ‘‘‘సమచిత్తా సమకమ్మా, సమకారీ భవిస్సతి;
పియా హేస్సతి కమ్మేన, తుయ్హత్థాయ మహాఇసి [మహాఇసే (స్యా.)].
౩౭౪. ‘‘‘సుదస్సనా సుపియా చ, మనాపా పియవాదినీ;
తస్స ధమ్మేసు దాయాదా, విహరిస్సతి ఇద్ధికా.
౩౭౫. ‘‘‘యథాపి భణ్డసాముగ్గం, అనురక్ఖతి సామినో;
ఏవం కుసలధమ్మానం, అనురక్ఖిస్సతే అయం.
౩౭౬. ‘‘‘తస్స తే [తస్స తం (స్యా.)] అనుకమ్పన్తీ, పూరయిస్సతి పారమీ;
సీహోవ పఞ్జరం భేత్వా [హిత్వా (స్యా.), హేత్వా (పీ.)], పాపుణిస్సతి బోధియం’.
౩౭౭. ‘‘అపరిమేయ్యే ఇతో కప్పే, యం మం బుద్ధో వియాకరీ;
తం వాచం అనుమోదేన్తీ, ఏవంకారీ భవిం అహం.
౩౭౮. ‘‘తస్స కమ్మస్స సుకతస్స, తత్థ చిత్తం పసాదయిం;
దేవమనుస్సకం యోనిం, అనుభోత్వా అసఙ్ఖియం.
౩౭౯. ‘‘సుఖదుక్ఖేనుభోత్వాహం, దేవేసు మానుసేసు చ;
పచ్ఛిమే భవే సమ్పత్తే, అజాయిం సాకియే కులే.
౩౮౦. ‘‘రూపవతీ భోగవతీ, యససీలవతీ తతో;
సబ్బఙ్గసమ్పదా హోమి, కులేసు అభిసక్కతా.
౩౮౧. ‘‘లాభం సిలోకం సక్కారం, లోకధమ్మసమాగమం;
చిత్తఞ్చ దుక్ఖితం నత్థి, వసామి అకుతోభయా.
౩౮౨. ‘‘వుత్తఞ్హేతం భగవతా, రఞ్ఞో అన్తేపురే తదా;
ఖత్తియానం పురే వీర, ఉపకారఞ్చ నిద్దిసి.
౩౮౩. ‘‘ఉపకారా చ యా నారీ, యా చ నారీ సుఖే దుఖే;
అత్థక్ఖాయీ చ యా నారీ, యా చ నారీనుకమ్పికా.
౩౮౪. ‘‘పఞ్చకోటిసతా బుద్ధా, నవకోటిసతాని చ;
ఏతేసం దేవదేవానం, మహాదానం పవత్తయిం.
౩౮౫. ‘‘అధికారం మహా [సదా (పీ.) ఏవముపరిపి] మయ్హం, ధమ్మరాజ సుణోహి మే;
ఏకాదసకోటిసతా, బుద్ధా ద్వాదస కోటియో [హోన్తి లోకగ్గనాయకా (సీ. స్యా.), పణ్ణాకోటిసతాని చ (పీ.)].
౩౮౬. ‘‘ఏతేసం దేవదేవానం, మహాదానం పవత్తయిం;
అధికారం మహా మయ్హం, ధమ్మరాజ సుణోహి మే.
౩౮౭. ‘‘‘వీసకోటిసతా బుద్ధా, తింసకోటిసతాని చ;