౭. భద్దకాపిలానీథేరీఅపదానం
౨౪౪. ‘‘పదుముత్తరో నామ జినో, సబ్బధమ్మాన పారగూ [సబ్బధమ్మేసు చక్ఖుమా (సీ. పీ.)];
ఇతో సతసహస్సమ్హి, కప్పే ఉప్పజ్జి నాయకో.
౨౪౫. ‘‘తదాహు హంసవతియం, విదేహో నామ నామతో [నామకో (స్యా. పీ.)];
సేట్ఠీ పహూతరతనో, తస్స జాయా అహోసహం.
౨౪౬. ‘‘కదాచి సో నరాదిచ్చం, ఉపేచ్చ సపరిజ్జనో;
ధమ్మమస్సోసి బుద్ధస్స, సబ్బదుక్ఖభయప్పహం [దుక్ఖక్ఖయావహం (స్యా.)].
౨౪౭. ‘‘సావకం ధుతవాదానం, అగ్గం కిత్తేసి నాయకో;
సుత్వా సత్తాహికం దానం, దత్వా బుద్ధస్స తాదినో.
౨౪౮. ‘‘నిపచ్చ సిరసా పాదే, తం ఠానమభిపత్థయిం;
స హాసయన్తో పరిసం, తదా హి నరపుఙ్గవో.
౨౪౯. ‘‘సేట్ఠినో అనుకమ్పాయ, ఇమా గాథా అభాసథ;
‘లచ్ఛసే పత్థితం ఠానం, నిబ్బుతో హోహి పుత్తక.
౨౫౦. ‘‘‘సతసహస్సితో కప్పే, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౨౫౧. ‘‘‘తస్స ధమ్మేసు దాయాదో, ఓరసో ధమ్మనిమ్మితో;
కస్సపో నామ గోత్తేన, హేస్సతి సత్థు సావకో’.
౨౫౨. ‘‘తం సుత్వా ముదితో హుత్వా, యావజీవం తదా జినం;
మేత్తచిత్తో పరిచరి, పచ్చయేహి వినాయకం.
౨౫౩. ‘‘సాసనం జోతయిత్వాన, సో మద్దిత్వా కుతిత్థియే;
వేనేయ్యం వినయిత్వా చ, నిబ్బుతో సో ససావకో.
౨౫౪. ‘‘నిబ్బుతే తమ్హి లోకగ్గే, పూజనత్థాయ సత్థునో;
ఞాతిమిత్తే సమానేత్వా, సహ తేహి అకారయి.
౨౫౫. ‘‘సత్తయోజనికం థూపం, ఉబ్బిద్ధం రతనామయం;
జలన్తం సతరంసింవ, సాలరాజంవ ఫుల్లితం.
౨౫౬. ‘‘సత్తసతసహస్సాని, పాతియో [చాతియో (స్యా.)] తత్థ కారయి;
నళగ్గీ వియ జోతన్తీ [జోతన్తే (స్యా. పీ.)], రతనేహేవ సత్తహి.
౨౫౭. ‘‘గన్ధతేలేన పూరేత్వా, దీపానుజ్జలయీ తహిం;
పూజనత్థాయ [పూజత్థాయ (సీ. క.)] మహేసిస్స, సబ్బభూతానుకమ్పినో.
౨౫౮. ‘‘సత్తసతసహస్సాని, పుణ్ణకుమ్భాని కారయి;
రతనేహేవ పుణ్ణాని, పూజనత్థాయ మహేసినో.
౨౫౯. ‘‘మజ్ఝే అట్ఠట్ఠకుమ్భీనం, ఉస్సితా కఞ్చనగ్ఘియో;
అతిరోచన్తి వణ్ణేన, సరదేవ దివాకరో.
౨౬౦. ‘‘చతుద్వారేసు సోభన్తి, తోరణా రతనామయా;
ఉస్సితా ఫలకా రమ్మా, సోభన్తి రతనామయా.
౨౬౧. ‘‘విరోచన్తి పరిక్ఖిత్తా [పరిక్ఖాయో (స్యా.)], అవటంసా సునిమ్మితా;
ఉస్సితాని పటాకాని, రతనాని విరోచరే.
౨౬౨. ‘‘సురత్తం సుకతం చిత్తం, చేతియం రతనామయం;
అతిరోచతి వణ్ణేన, ససఞ్ఝోవ [ససజ్ఝావ (స్యా. క.), ససఞ్జావ (పీ.)] దివాకరో.
౨౬౩. ‘‘థూపస్స వేదియో తిస్సో, హరితాలేన పూరయి;
ఏకం మనోసిలాయేకం, అఞ్జనేన చ ఏకికం.
౨౬౪. ‘‘పూజం ఏతాదిసం రమ్మం, కారేత్వా వరవాదినో;
అదాసి దానం సఙ్ఘస్స, యావజీవం యథాబలం.
౨౬౫. ‘‘సహావ సేట్ఠినా తేన, తాని పుఞ్ఞాని సబ్బసో;
యావజీవం కరిత్వాన, సహావ సుగతిం గతా.
౨౬౬. ‘‘సమ్పత్తియోనుభోత్వాన, దేవత్తే అథ మానుసే;
ఛాయా వియ సరీరేన, సహ తేనేవ సంసరిం.
౨౬౭. ‘‘ఏకనవుతితో కప్పే, విపస్సీ నామ నాయకో;
ఉప్పజ్జి చారుదస్సనో, సబ్బధమ్మవిపస్సకో.
౨౬౮. ‘‘తదాయం బన్ధుమతియం, బ్రాహ్మణో సాధుసమ్మతో;
అడ్ఢో సన్తో గుణేనాపి [సత్థాగమేనాసి (సీ.)], ధనేన చ సుదుగ్గతో.
౨౬౯. ‘‘తదాపి తస్సాహం ఆసిం, బ్రాహ్మణీ సమచేతసా;
కదాచి సో దిజవరో, సఙ్గమేసి మహామునిం.
౨౭౦. ‘‘నిసిన్నం జనకాయమ్హి, దేసేన్తం అమతం పదం;
సుత్వా ధమ్మం పముదితో, అదాసి ఏకసాటకం.
౨౭౧. ‘‘ఘరమేకేన వత్థేన, గన్త్వానేతం స మబ్రవి [మమబ్రవి (సీ. స్యా. పీ.)];
‘అనుమోద మహాపుఞ్ఞం [మహాపఞ్ఞే (సీ.), మహాపుఞ్ఞే (స్యా. క.)], దిన్నం బుద్ధస్స సాటకం’.
౨౭౨. ‘‘తదాహం అఞ్జలిం కత్వా, అనుమోదిం సుపీణితా [సువిదితా (స్యా.), సుపీతియా (క.)];
‘సుదిన్నో సాటకో సామి, బుద్ధసేట్ఠస్స తాదినో’.
౨౭౩. ‘‘సుఖితో సజ్జితో హుత్వా, సంసరన్తో భవాభవే;
బారాణసిపురే రమ్మే, రాజా ఆసి మహీపతి.
౨౭౪. ‘‘తదా తస్స మహేసీహం, ఇత్థిగుమ్బస్స ఉత్తమా;
తస్సాతి దయితా [తస్సావి దుతియికా (స్యా.)] ఆసిం, పుబ్బస్నేహేన భత్తునో [చుత్తరి (స్యా. పీ. క.)].
౨౭౫. ‘‘పిణ్డాయ విచరన్తే తే [సో (సీ. స్యా. పీ.)], అట్ఠ పచ్చేకనాయకే;
దిస్వా పముదితో హుత్వా, దత్వా పిణ్డం మహారహం.
౨౭౬. ‘‘పునో నిమన్తయిత్వాన, కత్వా రతనమణ్డపం;
కమ్మారేహి కతం పత్తం [కతం ఛత్తం (సీ.), కతమట్ఠం (స్యా.)], సోవణ్ణం వత తత్తకం.
౨౭౭. ‘‘సమానేత్వాన తే సబ్బే, తేసం దానమదాసి సో;
సోణ్ణాసనే పవిట్ఠానం, పసన్నో సేహి పాణిభి.
౨౭౮. ‘‘తమ్పి దానం సహాదాసిం, కాసిరాజేనహం తదా;
పునాహం బారాణసియం, జాతా కాసికగామకే.
౨౭౯. ‘‘కుటుమ్బికకులే ఫీతే, సుఖితో సో సభాతుకో;
జేట్ఠస్స భాతునో జాయా, అహోసిం సుపతిబ్బతా.
౨౮౦. ‘‘పచ్చేకబుద్ధం దిస్వాన, కనియస్స మమ భత్తునో [భత్తుకనియసో (స్యా.)];
భాగన్నం తస్స దత్వాన, ఆగతే తమ్హి పావదిం.
౨౮౧. ‘‘నాభినన్దిత్థ సో దానం, తతో తస్స అదాసహం;
ఉఖా [బుద్ధా (స్యా.)] ఆనియ తం అన్నం, పునో తస్సేవ సో అదా.
౨౮౨. ‘‘తదన్నం ఛడ్డయిత్వాన, దుట్ఠా బుద్ధస్సహం తదా;
పత్తం కలలపుణ్ణం తం, అదాసిం తస్స తాదినో.
౨౮౩. ‘‘దానే చ గహణే చేవ, అపచే పదుసేపి చ;
సమచిత్తముఖం దిస్వా, తదాహం సంవిజిం భుసం.
౨౮౪. ‘‘పునో పత్తం గహేత్వాన, సోధయిత్వా సుగన్ధినా;
పసన్నచిత్తా పూరేత్వా, సఘతం సక్కరం అదం.
౨౮౫. ‘‘యత్థ యత్థూపపజ్జామి, సురూపా హోమి దానతో;
బుద్ధస్స అపకారేన, దుగ్గన్ధా వదనేన చ.
౨౮౬. ‘‘పున కస్సపవీరస్స, నిధాయన్తమ్హి చేతియే;
సోవణ్ణం ఇట్ఠకం వరం, అదాసిం ముదితా అహం.
౨౮౭. ‘‘చతుజ్జాతేన గన్ధేన, నిచయిత్వా తమిట్ఠకం;
ముత్తా దుగ్గన్ధదోసమ్హా, సబ్బఙ్గసుసమాగతా.
౨౮౮. ‘‘సత్తపాతిసహస్సాని, రతనేహేవ సత్తహి;
కారేత్వా ఘతపూరాని, వట్టీని [వట్టీయో (సీ.)] చ సహస్ససో.
౨౮౯. ‘‘పక్ఖిపిత్వా పదీపేత్వా, ఠపయిం సత్తపన్తియో;
పూజనత్థం లోకనాథస్స, విప్పసన్నేన చేతసా.
౨౯౦. ‘‘తదాపి తమ్హి పుఞ్ఞమ్హి, భాగినీయి విసేసతో;
పున కాసీసు సఞ్జాతో, సుమిత్తా ఇతి విస్సుతో.
౨౯౧. ‘‘తస్సాహం భరియా ఆసిం, సుఖితా సజ్జితా పియా;
తదా పచ్చేకమునినో, అదాసిం ఘనవేఠనం.
౨౯౨. ‘‘తస్సాపి భాగినీ ఆసిం, మోదిత్వా దానముత్తమం;
పునాపి కాసిరట్ఠమ్హి, జాతో కోలియజాతియా.
౨౯౩. ‘‘తదా కోలియపుత్తానం, సతేహి సహ పఞ్చహి;
పఞ్చపచ్చేకబుద్ధానం, సతాని సముపట్ఠహి.
౨౯౪. ‘‘తేమాసం తప్పయిత్వాన [వాసయిత్వాన (స్యా. పీ.)], అదాసి చ తిచీవరే [తిచీవరం (స్యా.)];
జాయా తస్స తదా ఆసిం, పుఞ్ఞకమ్మపథానుగా.
౨౯౫. ‘‘తతో చుతో అహు రాజా, నన్దో నామ మహాయసో;
తస్సాపి మహేసీ ఆసిం, సబ్బకామసమిద్ధినీ.
౨౯౬. ‘‘తదా రాజా భవిత్వాన, బ్రహ్మదత్తో మహీపతి;
పదుమవతీపుత్తానం, పచ్చేకమునినం తదా.
౨౯౭. ‘‘సతాని పఞ్చనూనాని, యావజీవం ఉపట్ఠహిం;
రాజుయ్యానే నివాసేత్వా, నిబ్బుతాని చ పూజయిం.
౨౯౮. ‘‘చేతియాని చ కారేత్వా, పబ్బజిత్వా ఉభో మయం;
భావేత్వా అప్పమఞ్ఞాయో, బ్రహ్మలోకం అగమ్హసే.
౨౯౯. ‘‘తతో చుతో మహాతిత్థే, సుజాతో పిప్ఫలాయనో;
మాతా సుమనదేవీతి, కోసిగోత్తో దిజో పితా.
౩౦౦. ‘‘అహం మద్దే జనపదే, సాకలాయ పురుత్తమే;
కప్పిలస్స దిజస్సాసిం, ధీతా మాతా సుచీమతి.
౩౦౧. ‘‘ఘనకఞ్చనబిమ్బేన, నిమ్మినిత్వాన మం పితా;
అదా కస్సపధీరస్స, కామేహి వజ్జితస్సమం.
౩౦౨. ‘‘కదాచి సో కారుణికో, గన్త్వా కమ్మన్తపేక్ఖకో;
కాకాదికేహి ఖజ్జన్తే, పాణే దిస్వాన సంవిజి.
౩౦౩. ‘‘ఘరేవాహం తిలే జాతే, దిస్వానాతపతాపనే;
కిమి కాకేహి ఖజ్జన్తే, సంవేగమలభిం తదా.
౩౦౪. ‘‘తదా సో పబ్బజీ ధీరో, అహం తమనుపబ్బజిం;
పఞ్చవస్సాని నివసిం, పరిబ్బాజవతే [పరిబ్బాజపథే (స్యా. పీ.)] అహం.
౩౦౫. ‘‘యదా పబ్బజితా ఆసి, గోతమీ జినపోసికా;
తదాహం తముపగన్త్వా, బుద్ధేన అనుసాసితా.
౩౦౬. ‘‘న చిరేనేవ కాలేన, అరహత్తమపాపుణిం;
అహో కల్యాణమిత్తత్తం, కస్సపస్స సిరీమతో.
౩౦౭. ‘‘సుతో బుద్ధస్స దాయాదో, కస్సపో సుసమాహితో;
పుబ్బేనివాసం యో వేది, సగ్గాపాయఞ్చ పస్సతి.
౩౦౮. ‘‘అథో జాతిక్ఖయం పత్తో, అభిఞ్ఞావోసితో ముని;
ఏతాహి తీహి విజ్జాహి, తేవిజ్జో హోతి బ్రాహ్మణో.
౩౦౯. ‘‘తథేవ భద్దకాపిలానీ [భద్దాకాపిలానీ (సీ. పీ.)], తేవిజ్జా మచ్చుహాయినీ;
ధారేతి అన్తిమం దేహం, జిత్వా మారం సవాహనం.
౩౧౦. ‘‘దిస్వా ఆదీనవం లోకే, ఉభో పబ్బజితా మయం;
త్యమ్హ ఖీణాసవా దన్తా, సీతిభూతామ్హ నిబ్బుతా.
౩౧౧. ‘‘కిలేసా ఝాపితా మయ్హం…పే… విహరామి అనాసవా.
౩౧౨. ‘‘స్వాగతం వత మే ఆసి…పే… కతం బుద్ధస్స సాసనం.
౩౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం భద్దకాపిలానీ భిక్ఖునీ ఇమా గాథాయో అభాసిత్థాతి.
భద్దకాపిలానీథేరియాపదానం సత్తమం.