౪. సకులాథేరీఅపదానం

౧౩౧. ‘‘పదుముత్తరో నామ జినో, సబ్బధమ్మాన పారగూ;

ఇతో సతసహస్సమ్హి, కప్పే ఉప్పజ్జి నాయకో.

౧౩౨. ‘‘హితాయ సబ్బసత్తానం, సుఖాయ వదతం వరో;

అత్థాయ పురిసాజఞ్ఞో, పటిపన్నో సదేవకే.

౧౩౩. ‘‘యసగ్గపత్తో సిరిమా, కిత్తివణ్ణగతో జినో;

పూజితో సబ్బలోకస్స, దిసాసబ్బాసు విస్సుతో.

౧౩౪. ‘‘ఉత్తిణ్ణవిచికిచ్ఛో సో, వీతివత్తకథంకథో;

సమ్పుణ్ణమనసఙ్కప్పో, పత్తో సమ్బోధిముత్తమం.

౧౩౫. ‘‘అనుప్పన్నస్స మగ్గస్స, ఉప్పాదేతా నరుత్తమో;

అనక్ఖాతఞ్చ అక్ఖాసి, అసఞ్జాతఞ్చ సఞ్జనీ.

౧౩౬. ‘‘మగ్గఞ్ఞూ చ మగ్గవిదూ, మగ్గక్ఖాయీ నరాసభో;

మగ్గస్స కుసలో సత్థా, సారథీనం వరుత్తమో.

౧౩౭. ‘‘మహాకారుణికో సత్థా, ధమ్మం దేసేసి నాయకో;

నిముగ్గే కామపఙ్కమ్హి, సముద్ధరతి పాణినే.

౧౩౮. ‘‘తదాహం హంసవతియం, జాతా ఖత్తియనన్దనా;

సురూపా సధనా చాపి, దయితా చ సిరీమతీ.

౧౩౯. ‘‘ఆనన్దస్స మహారఞ్ఞో, ధీతా పరమసోభణా;

వేమాతా [వేమాతు (సీ.)] భగినీ చాపి, పదుముత్తరనామినో.

౧౪౦. ‘‘రాజకఞ్ఞాహి సహితా, సబ్బాభరణభూసితా;

ఉపాగమ్మ మహావీరం, అస్సోసిం ధమ్మదేసనం.

౧౪౧. ‘‘తదా హి సో లోకగరు, భిక్ఖునిం దిబ్బచక్ఖుకం;

కిత్తయం పరిసామజ్ఝే [చతుపరిసాయ మజ్ఝే (స్యా.)], అగ్గట్ఠానే ఠపేసి తం.

౧౪౨. ‘‘సుణిత్వా తమహం హట్ఠా, దానం దత్వాన సత్థునో;

పూజిత్వాన చ సమ్బుద్ధం, దిబ్బచక్ఖుం అపత్థయిం.

౧౪౩. ‘‘తతో అవోచ మం సత్థా, ‘నన్దే లచ్ఛసి పత్థితం;

పదీపధమ్మదానానం, ఫలమేతం సునిచ్ఛితం.

౧౪౪. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౪౫. ‘‘‘తస్స ధమ్మేసు దాయాదా, ఓరసా ధమ్మనిమ్మితా;

సకులా నామ నామేన [సకులాతి చ నామేన (స్యా.)], హేస్సతి సత్థు సావికా’.

౧౪౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౪౭. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౧౪౮. ‘‘పరిబ్బాజకినీ ఆసిం, తదాహం ఏకచారినీ;

భిక్ఖాయ విచరిత్వాన, అలభిం తేలమత్తకం.

౧౪౯. ‘‘తేన దీపం పదీపేత్వా, ఉపట్ఠిం సబ్బసంవరిం;

చేతియం ద్విపదగ్గస్స [దిపదగ్గస్స (సీ. స్యా. పీ.)], విప్పసన్నేన చేతసా.

౧౫౦. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౫౧. ‘‘యత్థ యత్థూపపజ్జామి, తస్స కమ్మస్స వాహసా;

పజ్జలన్తి [సఞ్జలన్తి (స్యా. క.), సంచరన్తి (పీ.)] మహాదీపా, తత్థ తత్థ గతాయ మే.

౧౫౨. ‘‘తిరోకుట్టం తిరోసేలం, సమతిగ్గయ్హ పబ్బతం;

పస్సామహం యదిచ్ఛామి, దీపదానస్సిదం ఫలం.

౧౫౩. ‘‘విసుద్ధనయనా హోమి, యససా చ జలామహం;

సద్ధాపఞ్ఞావతీ చేవ, దీపదానస్సిదం ఫలం.

౧౫౪. ‘‘పచ్ఛిమే చ భవే దాని, జాతా విప్పకులే అహం;

పహూతధనధఞ్ఞమ్హి, ముదితే రాజపూజితే.

౧౫౫. ‘‘అహం సబ్బఙ్గసమ్పన్నా, సబ్బాభరణభూసితా;

పురప్పవేసే సుగతం, వాతపానే ఠితా అహం.

౧౫౬. ‘‘దిస్వా జలన్తం యససా, దేవమనుస్ససక్కతం;

అనుబ్యఞ్జనసమ్పన్నం, లక్ఖణేహి విభూసితం.

౧౫౭. ‘‘ఉదగ్గచిత్తా సుమనా, పబ్బజ్జం సమరోచయిం;

న చిరేనేవ కాలేన, అరహత్తమపాపుణిం.

౧౫౮. ‘‘ఇద్ధీసు చ వసీ హోమి, దిబ్బాయ సోతధాతుయా;

పరచిత్తాని జానామి, సత్థుసాసనకారికా.

౧౫౯. ‘‘పుబ్బేనివాసం జానామి, దిబ్బచక్ఖు విసోధితం;

ఖేపేత్వా ఆసవే సబ్బే, విసుద్ధాసిం సునిమ్మలా.

౧౬౦. ‘‘పరిచిణ్ణో మయా సత్థా, కతం బుద్ధస్స సాసనం;

ఓహితో గరుకో భారో, భవనేత్తి సమూహతా.

౧౬౧. ‘‘యస్సత్థాయ పబ్బజితా, అగారస్మానగారియం;

సో మే అత్థో అనుప్పత్తో, సబ్బసంయోజనక్ఖయో.

౧౬౨. ‘‘తతో మహాకారుణికో, ఏతదగ్గే ఠపేసి మం;

దిబ్బచక్ఖుకానం అగ్గా, సకులాతి నరుత్తమో.

౧౬౩. ‘‘కిలేసా ఝాపితా మయ్హం…పే… విహరామి అనాసవా.

౧౬౪. ‘‘స్వాగతం వత మే ఆసి…పే… కతం బుద్ధస్స సాసనం.

౧౬౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం సకులా భిక్ఖునీ ఇమా గాథాయో అభాసిత్థాతి.

సకులాథేరియాపదానం చతుత్థం.