౫. నన్దాథేరీఅపదానం

౧౬౬. ‘‘పదుముత్తరో నామ జినో, సబ్బధమ్మాన పారగూ;

ఇతో సతసహస్సమ్హి, కప్పే ఉప్పజ్జి నాయకో.

౧౬౭. ‘‘ఓవాదకో విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౧౬౮. ‘‘అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి.

౧౬౯. ‘‘ఏవం నిరాకులం ఆసి, సుఞ్ఞతం తిత్థియేహి చ;

విచిత్తం అరహన్తేహి, వసీభూతేహి తాదిభి.

౧౭౦. ‘‘రతనానట్ఠపఞ్ఞాసం, ఉగ్గతోవ మహాముని;

కఞ్చనగ్ఘియసఙ్కాసో, బాత్తింసవరలక్ఖణో.

౧౭౧. ‘‘వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౧౭౨. ‘‘తదాహం హంసవతియం, జాతా సేట్ఠికులే అహుం;

నానారతనపజ్జోతే, మహాసుఖసమప్పితా.

౧౭౩. ‘‘ఉపేత్వా తం మహావీరం, అస్సోసిం ధమ్మదేసనం;

అమతం పరమస్సాదం, పరమత్థనివేదకం.

౧౭౪. ‘‘తదా నిమన్తయిత్వాన, ససఙ్ఘం లోకనాయకం;

దత్వా తస్స మహాదానం, పసన్నా సేహి పాణిభి.

౧౭౫. ‘‘ఝాయినీనం భిక్ఖునీనం, అగ్గట్ఠానమపత్థయిం;

నిపచ్చ సిరసా ధీరం, ససఙ్ఘం లోకనాయకం.

౧౭౬. ‘‘తదా అదన్తదమకో, తిలోకసరణో పభూ;

బ్యాకాసి నరసారథి, ‘లచ్ఛసే తం సుపత్థితం.

౧౭౭. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౭౮. ‘‘‘తస్స ధమ్మేసు దాయాదా, ఓరసా ధమ్మనిమ్మితా;

నన్దాతి నామ నామేన, హేస్సతి సత్థు సావికా’.

౧౭౯. ‘‘తం సుత్వా ముదితా హుత్వా, యావజీవం తదా జినం;

మేత్తచిత్తా పరిచరిం, పచ్చయేహి వినాయకం.

౧౮౦. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౮౧. ‘‘తతో చుతా యామమగం, తతోహం తుసితం గతా [అగం (సీ. పీ. క.)];

తతో చ నిమ్మానరతిం, వసవత్తిపురం తతో [గతా (స్యా.)].

౧౮౨. ‘‘యత్థ యత్థూపపజ్జామి, తస్స కమ్మస్స వాహసా;

తత్థ తత్థేవ రాజూనం, మహేసిత్తమకారయిం.

౧౮౩. ‘‘తతో చుతా మనుస్సత్తే, రాజానం చక్కవత్తినం;

మణ్డలీనఞ్చ రాజూనం, మహేసిత్తమకారయిం.

౧౮౪. ‘‘సమ్పత్తిం అనుభోత్వాన, దేవేసు మనుజేసు చ;

సబ్బత్థ సుఖితా హుత్వా, నేకకప్పేసు సంసరిం.

౧౮౫. ‘‘పచ్ఛిమే భవే సమ్పత్తే, సురమ్మే [పురస్మిం (స్యా.)] కపిలవ్హయే;

రఞ్ఞో సుద్ధోదనస్సాహం, ధీతా ఆసిం అనిన్దితా.

౧౮౬. ‘‘సిరియా [సిరింవ (సీ.), రంసిరివ (స్యా.)] రూపినిం దిస్వా, నన్దితం ఆసి తం కులం;

తేన నన్దాతి మే నామం, సున్దరం పవరం అహు.

౧౮౭. ‘‘యువతీనఞ్చ సబ్బాసం, కల్యాణీతి చ విస్సుతా;

తస్మిమ్పి నగరే రమ్మే, ఠపేత్వా తం యసోధరం.

౧౮౮. ‘‘జేట్ఠో భాతా తిలోకగ్గో, పచ్ఛిమో [మజ్ఝిమో (పీ.)] అరహా తథా;

ఏకాకినీ గహట్ఠాహం, మాతరా పరిచోదితా.

౧౮౯. ‘‘‘సాకియమ్హి కులే జాతా, పుత్తే బుద్ధానుజా తువం;

నన్దేనపి వినా భూతా, అగారే కిం ను అచ్ఛసి.

౧౯౦. ‘‘‘జరావసానం యోబ్బఞ్ఞం, రూపం అసుచిసమ్మతం;

రోగన్తమపిచారోగ్యం, జీవితం మరణన్తికం.

౧౯౧. ‘‘‘ఇదమ్పి తే సుభం రూపం, ససీకన్తం మనోహరం;

భూసనానం అలఙ్కారం, సిరిసఙ్ఘాటసన్నిభం.

౧౯౨. ‘‘‘పుఞ్జితం లోకసారంవ, నయనానం రసాయనం;

పుఞ్ఞానం కిత్తిజననం, ఉక్కాకకులనన్దనం.

౧౯౩. ‘‘‘న చిరేనేవ కాలేన, జరా సమధిసేస్సతి [సమభిభోస్సతి (సీ. స్యా.), సమధిహేస్సతి (పీ.)];

విహాయ గేహం కారుఞ్ఞే [కారుఞ్ఞే (సీ. పీ.), పారయ్హిం (స్యా.)], చర ధమ్మమనిన్దితే’.

౧౯౪. ‘‘సుత్వాహం మాతు వచనం, పబ్బజిం అనగారియం;

దేహేన న తు చిత్తేన, రూపయోబ్బనలాళితా.

౧౯౫. ‘‘మహతా చ పయత్తేన, ఝానజ్ఝేన పరం మమ;

కాతుఞ్చ వదతే మాతా, న చాహం తత్థ ఉస్సుకా.

౧౯౬. ‘‘తతో మహాకారుణికో, దిస్వా మం కామలాలసం [కమలాననం (స్యా.)];

నిబ్బిన్దనత్థం రూపస్మిం, మమ చక్ఖుపథే జినో.

౧౯౭. ‘‘సకేన ఆనుభావేన, ఇత్థిం మాపేసి సోభినిం;

దస్సనీయం సురుచిరం, మమతోపి సురూపినిం.

౧౯౮. ‘‘తమహం విమ్హితా దిస్వా, అతివిమ్హితదేహినిం;

చిన్తయిం సఫలం మేతి, నేత్తలాభఞ్చ మానుసం.

౧౯౯. ‘‘తమహం ఏహి సుభగే, యేనత్థో తం వదేహి మే;

కులం తే నామగోత్తఞ్చ, వద మే యది తే పియం.

౨౦౦. ‘న వఞ్చకాలో సుభగే [పఞ్హకాలో సుభణే (సీ. స్యా. పీ.)], ఉచ్ఛఙ్గే మం నివాసయ;

సీదన్తీవ మమఙ్గాని, పసుప్పయ ముహుత్తకం’.

౨౦౧. ‘‘తతో సీసం మమఙ్కే సా, కత్వా సయి సులోచనా;

తస్సా నలాటే పతితా, లుద్ధా [లూతా (స్యా.)] పరమదారుణా.

౨౦౨. ‘‘సహ తస్సా నిపాతేన, పిళకా ఉపపజ్జథ;

పగ్ఘరింసు పభిన్నా చ, కుణపా పుబ్బలోహితా.

౨౦౩. ‘‘పభిన్నం వదనఞ్చాపి, కుణపం పూతిగన్ధనం;

ఉద్ధుమాతం వినిలఞ్చ, పుబ్బఞ్చాపి సరీరకం.

౨౦౪. ‘‘సా పవేదితసబ్బఙ్గీ, నిస్ససన్తీ ముహుం ముహుం;

వేదయన్తీ సకం దుక్ఖం, కరుణం పరిదేవయి.

౨౦౫. ‘‘‘దుక్ఖేన దుక్ఖితా హోమి, ఫుసయన్తి చ వేదనా;

మహాదుక్ఖే నిముగ్గమ్హి, సరణం హోహి మే సఖీ’.

౨౦౬. ‘‘‘కుహిం వదనసోభం తే, కుహిం తే తుఙ్గనాసికా;

తమ్బబిమ్బవరోట్ఠం తే, వదనం తే కుహిం గతం.

౨౦౭. ‘‘‘కుహిం ససీనిభం వణ్ణం, కమ్బుగీవా కుహిం గతా;

దోళాలోలావ [దామామాలఞ్చ (స్యా.), దోలోలుల్లావ (క.)] తే కణ్ణా, వేవణ్ణం సముపాగతా.

౨౦౮. ‘‘‘మకుళఖారకాకారా [మకులమ్బురూహాకారా (సీ.), మకుళపదుమాకారా (స్యా.)], కలికావ [కలసావ (సీ. స్యా. పీ.)] పయోధరా;

పభిన్నా పూతికుణపా, దుట్ఠగన్ధిత్తమాగతా.

౨౦౯. ‘‘‘వేదిమజ్ఝావ సుస్సోణీ [తనుమజ్ఝా పుథుస్సోణీ (సీ. స్యా.), వేదిమజ్ఝా పుథుస్సోణీ (పీ.)], సూనావ నీతకిబ్బిసా;

జాతా అమేజ్ఝభరితా, అహో రూపమసస్సతం.

౨౧౦. ‘‘‘సబ్బం సరీరసఞ్జాతం, పూతిగన్ధం భయానకం;

సుసానమివ బీభచ్ఛం, రమన్తే యత్థ బాలిసా’.

౨౧౧. ‘‘తదా మహాకారుణికో, భాతా మే లోకనాయకో;

దిస్వా సంవిగ్గచిత్తం మం, ఇమా గాథా అభాసథ.

౨౧౨. ‘‘‘ఆతురం కుణపం పూతిం, పస్స నన్దే సముస్సయం;

అసుభాయ చిత్తం భావేహి, ఏకగ్గం సుసమాహితం.

౨౧౩. ‘‘‘యథా ఇదం తథా ఏతం, యథా ఏతం తథా ఇదం;

దుగ్గన్ధం పూతికం వాతి, బాలానం అభినన్దితం.

౨౧౪. ‘‘‘ఏవమేతం అవేక్ఖన్తీ, రత్తిన్దివమతన్దితా;

తతో సకాయ పఞ్ఞాయ, అభినిబ్బిజ్ఝ దక్ఖసి’.

౨౧౫. ‘‘తతోహం అతిసంవిగ్గా, సుత్వా గాథా సుభాసితా;

తత్రట్ఠితావహం సన్తీ, అరహత్తమపాపుణిం.

౨౧౬. ‘‘యత్థ యత్థ నిసిన్నాహం, సదా ఝానపరాయనా;

జినో తస్మిం గుణే తుట్ఠో, ఏతదగ్గే ఠపేసి మం.

౨౧౭. ‘‘కిలేసా ఝాపితా మయ్హం…పే… విహరామి అనాసవా.

౨౧౮. ‘‘స్వాగతం వత మే ఆసి…పే… కతం బుద్ధస్స సాసనం.

౨౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం నన్దా భిక్ఖునీ జనపదకల్యాణీ ఇమా గాథాయో అభాసిత్థాతి.

నన్దాథేరియాపదానం పఞ్చమం.