౩. ధమ్మదిన్నాథేరీఅపదానం
౯౫. ‘‘పదుముత్తరో నామ జినో, సబ్బధమ్మాన పారగూ;
ఇతో సతసహస్సమ్హి, కప్పే ఉప్పజ్జి నాయకో.
౯౬. ‘‘తదాహం హంసవతియం, కులే అఞ్ఞతరే అహుం;
పరకమ్మకారీ ఆసిం, నిపకా సీలసంవుతా.
౯౭. ‘‘పదుముత్తరబుద్ధస్స, సుజాతో అగ్గసావకో;
విహారా అభినిక్ఖమ్మ, పిణ్డపాతాయ [పత్తమాదాయ (క.)] గచ్ఛతి.
౯౮. ‘‘ఘటం గహేత్వా గచ్ఛన్తీ, తదా ఉదకహారికా;
తం దిస్వా అదదం పూపం, పసన్నా సేహి పాణిభి.
౯౯. ‘‘పటిగ్గహేత్వా తత్థేవ, నిసిన్నో పరిభుఞ్జి సో;
తతో నేత్వాన తం గేహం, అదాసిం తస్స భోజనం.
౧౦౦. ‘‘తతో మే అయ్యకో తుట్ఠో, అకరీ సుణిసం సకం;
సస్సుయా సహ గన్త్వాన, సమ్బుద్ధం అభివాదయిం.
౧౦౧. ‘‘తదా సో ధమ్మకథికం, భిక్ఖునిం పరికిత్తయం;
ఠపేసి ఏతదగ్గమ్హి, తం సుత్వా ముదితా అహం.
౧౦౨. ‘‘నిమన్తయిత్వా సుగతం, ససఙ్ఘం లోకనాయకం;
మహాదానం దదిత్వాన, తం ఠానమభిపత్థయిం.
౧౦౩. ‘‘తతో మం సుగతో ఆహ, ఘననిన్నాదసుస్సరో [ఘననిన్నాదసుస్సరే (క.)];
‘మముపట్ఠాననిరతే, ససఙ్ఘపరివేసికే.
౧౦౪. ‘‘‘సద్ధమ్మస్సవనే యుత్తే, గుణవద్ధితమానసే;
భద్దే భవస్సు ముదితా, లచ్ఛసే పణిధీఫలం.
౧౦౫. ‘‘‘సతసహస్సితో కప్పే, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౧౦౬. ‘‘‘తస్స ధమ్మేసు దాయాదా, ఓరసా ధమ్మనిమ్మితా;
ధమ్మదిన్నాతి నామేన, హేస్సతి సత్థు సావికా’.
౧౦౭. ‘‘తం సుత్వా ముదితా హుత్వా, యావజీవం మహామునిం;
మేత్తచిత్తా పరిచరిం, పచ్చయేహి వినాయకం.
౧౦౮. ‘‘తేన కమ్మేన సుకతేన, చేతనాపణిధీహి చ;
జహిత్వా మానుసం దేహం, తావతింసమగచ్ఛహం.
౧౦౯. ‘‘ఇమమ్హి భద్దకే కప్పే, బ్రహ్మబన్ధు మహాయసో;
కస్సపో నామ గోత్తేన, ఉప్పజ్జి వదతం వరో.
౧౧౦. ‘‘ఉపట్ఠాకో మహేసిస్స, తదా ఆసి నరిస్సరో;
కాసిరాజా కికీ నామ, బారాణసిపురుత్తమే.
౧౧౧. ‘‘ఛట్ఠా తస్సాసహం ధీతా, సుధమ్మా ఇతి విస్సుతా;
ధమ్మం సుత్వా జినగ్గస్స, పబ్బజ్జం సమరోచయిం.
౧౧౨. ‘‘అనుజాని న నో తాతో, అగారేవ తదా మయం;
వీసవస్ససహస్సాని, విచరిమ్హ అతన్దితా.
తతియం భాణవారం.
౧౧౩. ‘‘కోమారిబ్రహ్మచరియం, రాజకఞ్ఞా సుఖేధితా;
బుద్ధోపట్ఠాననిరతా, ముదితా సత్త ధీతరో.
౧౧౪. ‘‘సమణీ సమణగుత్తా చ, భిక్ఖునీ భిక్ఖుదాయికా;
ధమ్మా చేవ సుధమ్మా చ, సత్తమీ సఙ్ఘదాయికా.
౧౧౫. ‘‘ఖేమా ఉప్పలవణ్ణా చ, పటాచారా చ కుణ్డలా;
గోతమీ చ అహఞ్చేవ, విసాఖా హోతి సత్తమీ.
౧౧౬. ‘‘తేహి కమ్మేహి సుకతేహి, చేతనాపణిధీహి చ;
జహిత్వా మానుసం దేహం, తావతింసమగచ్ఛహం.
౧౧౭. ‘‘పచ్ఛిమే చ భవే దాని, గిరిబ్బజపురుత్తమే;
జాతా సేట్ఠికులే ఫీతే, సబ్బకామసమిద్ధినే.
౧౧౮. ‘‘యదా రూపగుణూపేతా, పఠమే యోబ్బనే ఠితా;
తదా పరకులం గన్త్వా, వసిం సుఖసమప్పితా.
౧౧౯. ‘‘ఉపేత్వా లోకసరణం, సుణిత్వా ధమ్మదేసనం;
అనాగామిఫలం పత్తో, సామికో మే సుబుద్ధిమా.
౧౨౦. ‘‘తదాహం అనుజానేత్వా, పబ్బజిం అనగారియం;
న చిరేనేవ కాలేన, అరహత్తమపాపుణిం.
౧౨౧. ‘‘తదా ఉపాసకో సో మం, ఉపగన్త్వా అపుచ్ఛథ;
గమ్భీరే నిపుణే పఞ్హే, తే సబ్బే బ్యాకరిం అహం.
౧౨౨. ‘‘జినో తస్మిం గుణే తుట్ఠో, ఏతదగ్గే ఠపేసి మం;
‘భిక్ఖునిం ధమ్మకథికం, నాఞ్ఞం పస్సామి ఏదిసిం.
౧౨౩. ‘ధమ్మదిన్నా యథా ధీరా, ఏవం ధారేథ భిక్ఖవో’;
‘‘ఏవాహం పణ్డితా హోమి [జాతా (సీ.), నామ (స్యా.)], నాయకేనానుకమ్పితా.
౧౨౪. ‘‘పరిచిణ్ణో మయా సత్థా, కతం బుద్ధస్స సాసనం;
ఓహితో గరుకో భారో, భవనేత్తి సమూహతా.
౧౨౫. ‘‘యస్సత్థాయ పబ్బజితా, అగారస్మానగారియం;
సో మే అత్థో అనుప్పత్తో, సబ్బసంయోజనక్ఖయో.
౧౨౬. ‘‘ఇద్ధీసు చ వసీ హోమి, దిబ్బాయ సోతధాతుయా;
పరచిత్తాని జానామి, సత్థుసాసనకారికా.
౧౨౭. ‘‘పుబ్బేనివాసం జానామి, దిబ్బచక్ఖు విసోధితం;
ఖేపేత్వా ఆసవే సబ్బే, విసుద్ధాసిం సునిమ్మలా.
౧౨౮. ‘‘కిలేసా ఝాపితా మయ్హం…పే… విహరామి అనాసవా.
౧౨౯. ‘‘స్వాగతం వత మే ఆసి…పే… కతం బుద్ధస్స సాసనం.
౧౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ధమ్మదిన్నా భిక్ఖునీ ఇమా గాథాయో అభాసిత్థాతి.
ధమ్మదిన్నాథేరియాపదానం తతియం.