౨. కిసాగోతమీథేరీఅపదానం
౫౫. ‘‘పదుముత్తరో నామ జినో, సబ్బధమ్మాన పారగూ;
ఇతో సతసహస్సమ్హి, కప్పే ఉప్పజ్జి నాయకో.
౫౬. ‘‘తదాహం హంసవతియం, జాతా అఞ్ఞతరే కులే;
ఉపేత్వా తం నరవరం, సరణం సముపాగమిం.
౫౭. ‘‘ధమ్మఞ్చ తస్స అస్సోసిం, చతుసచ్చూపసఞ్హితం;
మధురం పరమస్సాదం, వట్టసన్తిసుఖావహం [చిత్తసన్తి … (స్యా.)].
౫౮. ‘‘తదా చ భిక్ఖునిం వీరో, లూఖచీవరధారినిం;
ఠపేన్తో ఏతదగ్గమ్హి, వణ్ణయీ పురిసుత్తమో.
౫౯. ‘‘జనేత్వానప్పకం పీతిం, సుత్వా భిక్ఖునియా గుణే;
కారం కత్వాన బుద్ధస్స, యథాసత్తి యథాబలం.
౬౦. ‘‘నిపచ్చ మునివరం తం, తం ఠానమభిపత్థయిం;
తదానుమోది సమ్బుద్ధో, ఠానలాభాయ నాయకో.
౬౧. ‘‘‘సతసహస్సితో కప్పే, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౬౨. ‘‘‘తస్స ధమ్మేసు దాయాదా, ఓరసా ధమ్మనిమ్మితా;
కిసాగోతమీ [గోతమీ నామ (సీ. క.)] నామేన, హేస్సతి సత్థు సావికా’.
౬౩. ‘‘తం సుత్వా ముదితా హుత్వా, యావజీవం తదా జినం;
మేత్తచిత్తా పరిచరిం, పచ్చయేహి వినాయకం.
౬౪. ‘‘తేన కమ్మేన సుకతేన, చేతనాపణిధీహి చ;
జహిత్వా మానుసం దేహం, తావతింసమగచ్ఛహం.
౬౫. ‘‘ఇమమ్హి భద్దకే కప్పే, బ్రహ్మబన్ధు మహాయసో;
కస్సపో నామ గోత్తేన, ఉప్పజ్జి వదతం వరో.
౬౬. ‘‘ఉపట్ఠాకో మహేసిస్స, తదా ఆసి నరిస్సరో;
కాసిరాజా కికీ నామ, బారాణసిపురుత్తమే.
౬౭. ‘‘పఞ్చమీ తస్స ధీతాసిం, ధమ్మా నామేన విస్సుతా;
ధమ్మం సుత్వా జినగ్గస్స, పబ్బజ్జం సమరోచయిం.
౬౮. ‘‘అనుజాని న నో తాతో, అగారేవ తదా మయం;
వీసవస్ససహస్సాని, విచరిమ్హ అతన్దితా.
౬౯. ‘‘కోమారిబ్రహ్మచరియం, రాజకఞ్ఞా సుఖేధితా;
బుద్ధోపట్ఠాననిరతా, ముదితా సత్త ధీతరో.
౭౦. ‘‘సమణీ సమణగుత్తా చ, భిక్ఖునీ భిక్ఖుదాయికా;
ధమ్మా చేవ సుధమ్మా చ, సత్తమీ సఙ్ఘదాయికా.
౭౧. ‘‘ఖేమా ఉప్పలవణ్ణా చ, పటాచారా చ కుణ్డలా;
అహఞ్చ ధమ్మదిన్నా చ, విసాఖా హోతి సత్తమీ.
౭౨. ‘‘తేహి కమ్మేహి సుకతేహి, చేతనాపణిధీహి చ;
జహిత్వా మానుసం దేహం, తావతింసమగచ్ఛహం.
౭౩. ‘‘పచ్ఛిమే చ భవే దాని, జాతా సేట్ఠికులే అహం;
దుగ్గతే అధనే నట్ఠే [నీచే (స్యా.), నిద్ధే (పీ.)], గతా చ సధనం కులం.
౭౪. ‘‘పతిం ఠపేత్వా సేసా మే, దేస్సన్తి అధనా ఇతి;
యదా చ పసూతా [ససుతా (సీ. పీ.)] ఆసిం, సబ్బేసం దయితా తదా.
౭౫. ‘‘యదా సో తరుణో భద్దో [పుత్తో (సీ. స్యా.)], కోమలకో [కోమారకో (స్యా.), కోమలఙ్గో (సీ. పీ.)] సుఖేధితో;
సపాణమివ కన్తో మే, తదా యమవసం గతో.
౭౬. ‘‘సోకట్టా దీనవదనా, అస్సునేత్తా రుదమ్ముఖా;
మతం కుణపమాదాయ, విలపన్తీ గమామహం.
౭౭. ‘‘తదా ఏకేన సన్దిట్ఠా, ఉపేత్వాభిసక్కుత్తమం;
అవోచం దేహి భేసజ్జం, పుత్తసఞ్జీవనన్తి భో.
౭౮. ‘‘న విజ్జన్తే మతా యస్మిం, గేహే సిద్ధత్థకం తతో;
ఆహరాతి జినో ఆహ, వినయోపాయకోవిదో.
౭౯. ‘‘తదా గమిత్వా సావత్థిం, న లభిం తాదిసం ఘరం;
కుతో సిద్ధత్థకం తస్మా, తతో లద్ధా సతిం అహం.
౮౦. ‘‘కుణపం ఛడ్డయిత్వాన, ఉపేసిం లోకనాయకం;
దూరతోవ మమం దిస్వా, అవోచ మధురస్సరో.
౮౧. ‘‘‘యో చ వస్ససతం జీవే, అపస్సం ఉదయబ్బయం;
ఏకాహం జీవితం సేయ్యో, పస్సతో ఉదయబ్బయం.
౮౨. ‘‘‘న గామధమ్మో నిగమస్స ధమ్మో, న చాపియం ఏకకులస్స ధమ్మో;
సబ్బస్స లోకస్స సదేవకస్స, ఏసేవ ధమ్మో యదిదం అనిచ్చతా’.
౮౩. ‘‘సాహం సుత్వానిమా [సహసుత్వానిమా (క.)] గాథా, ధమ్మచక్ఖుం విసోధయిం;
తతో విఞ్ఞాతసద్ధమ్మా, పబ్బజిం అనగారియం.
౮౪. ‘‘తథా పబ్బజితా సన్తీ, యుఞ్జన్తీ జినసాసనే;
న చిరేనేవ కాలేన, అరహత్తమపాపుణిం.
౮౫. ‘‘ఇద్ధీసు చ వసీ హోమి, దిబ్బాయ సోతధాతుయా;
పరచిత్తాని జానామి, సత్థుసాసనకారికా.
౮౬. ‘‘పుబ్బేనివాసం జానామి, దిబ్బచక్ఖు విసోధితం;
ఖేపేత్వా ఆసవే సబ్బే, విసుద్ధాసిం సునిమ్మలా.
౮౭. ‘‘పరిచిణ్ణో మయా సత్థా, కతం బుద్ధస్స సాసనం;
ఓహితో గరుకో భారో, భవనేత్తి సమూహతా.
౮౮. ‘‘యస్సత్థాయ పబ్బజితా, అగారస్మానగారియం;
సో మే అత్థో అనుప్పత్తో, సబ్బసంయోజనక్ఖయో.
౮౯. ‘‘అత్థధమ్మనిరుత్తీసు, పటిభానే తథేవ చ;
ఞాణం మే విమలం సుద్ధం, బుద్ధసేట్ఠస్స వాహసా.
౯౦. ‘‘సఙ్కారకూటా ఆహిత్వా, సుసానా రథియాపి చ;
తతో సఙ్ఘాటికం కత్వా, లూఖం ధారేమి చీవరం.
౯౧. ‘‘జినో తస్మిం గుణే తుట్ఠో, లూఖచీవరధారణే;
ఠపేసి ఏతదగ్గమ్హి, పరిసాసు వినాయకో.
౯౨. ‘‘కిలేసా ఝాపితా మయ్హం…పే… విహరామి అనాసవా.
౯౩. ‘‘స్వాగతం వత మే ఆసి…పే… కతం బుద్ధస్స సాసనం.
౯౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం కిసాగోతమీ భిక్ఖునీ ఇమా గాథాయో అభాసిత్థాతి.
కిసాగోతమీథేరియాపదానం దుతియం.