౬. ఉపసీవమాణవపుచ్ఛా

౧౦౭౫. ‘‘ఏకో అహం సక్క మహన్తమోఘం, (ఇచ్చాయస్మా ఉపసీవో)

అనిస్సితో నో విసహామి తారితుం;

ఆరమ్మణం బ్రూహి సమన్తచక్ఖు, యం నిస్సితో ఓఘమిమం తరేయ్యం’’.

౧౦౭౬. ‘‘ఆకిఞ్చఞ్ఞం పేక్ఖమానో సతిమా, (ఉపసీవాతి భగవా)

నత్థీతి నిస్సాయ తరస్సు ఓఘం;

కామే పహాయ విరతో కథాహి, తణ్హక్ఖయం నత్తమహాభిపస్స’’ [రత్తమహాభిపస్స (స్యా.), రత్తమహం విపస్స (క.)].

౧౦౭౭. ‘‘సబ్బేసు కామేసు యో వీతరాగో, (ఇచ్చాయస్మా ఉపసీవో)

ఆకిఞ్చఞ్ఞం నిస్సితో హిత్వా మఞ్ఞం;

సఞ్ఞావిమోక్ఖే పరమే విముత్తో [ధిముత్తో (క.)], తిట్ఠే ను సో తత్థ అనానుయాయీ’’ [అనానువాయీ (స్యా. క.)].

౧౦౭౮. ‘‘సబ్బేసు కామేసు యో వీతరాగో, (ఉపసీవాతి భగవా)

ఆకిఞ్చఞ్ఞం నిస్సితో హిత్వా మఞ్ఞం;

సఞ్ఞావిమోక్ఖే పరమే విముత్తో, తిట్ఠేయ్య సో తత్థ అనానుయాయీ’’.

౧౦౭౯. ‘‘తిట్ఠే చే సో తత్థ అనానుయాయీ, పూగమ్పి వస్సానం సమన్తచక్ఖు;

తత్థేవ సో సీతిసియా విముత్తో, చవేథ విఞ్ఞాణం తథావిధస్స’’.

౧౦౮౦. ‘‘అచ్చీ యథా వాతవేగేన ఖిత్తా [ఖిత్తం (స్యా.), ఖిత్తో (పీ.)], (ఉపసీవాతి భగవా)

అత్థం పలేతి న ఉపేతి సఙ్ఖం;

ఏవం మునీ నామకాయా విముత్తో, అత్థం పలేతి న ఉపేతి సఙ్ఖం’’.

౧౦౮౧. ‘‘అత్థఙ్గతో సో ఉద వా సో నత్థి, ఉదాహు వే సస్సతియా అరోగో;

తం మే మునీ సాధు వియాకరోహి, తథా హి తే విదితో ఏస ధమ్మో’’.

౧౦౮౨. ‘‘అత్థఙ్గతస్స న పమాణమత్థి, (ఉపసీవాతి భగవా)

యేన నం వజ్జుం తం తస్స నత్థి;

సబ్బేసు ధమ్మేసు సమూహతేసు, సమూహతా వాదపథాపి సబ్బే’’తి.

ఉపసీవమాణవపుచ్ఛా ఛట్ఠీ నిట్ఠితా.