౭. నన్దమాణవపుచ్ఛా

౧౦౮౩. ‘‘సన్తి లోకే మునయో, (ఇచ్చాయస్మా నన్దో)

జనా వదన్తి తయిదం కథంసు;

ఞాణూపపన్నం నో మునిం [ముని నో (స్యా. క.)] వదన్తి, ఉదాహు వే జీవితేనూపపన్నం’’.

౧౦౮౪. ‘‘న దిట్ఠియా న సుతియా న ఞాణేన, (న సీలబ్బతేన) [( ) నత్థి సీ.-పీ పోత్థకేసు]

మునీధ నన్ద కుసలా వదన్తి;

విసేనికత్వా అనీఘా నిరాసా, చరన్తి యే తే మునయోతి బ్రూమి’’.

౧౦౮౫. ‘‘యే కేచిమే సమణబ్రాహ్మణాసే, (ఇచ్చాయస్మా నన్దో)

దిట్ఠస్సుతేనాపి [దిట్ఠేన సుతేనాపి (సీ.), దిట్ఠే సుతేనాపి (స్యా. పీ. క.)] వదన్తి సుద్ధిం;

సీలబ్బతేనాపి వదన్తి సుద్ధిం, అనేకరూపేన వదన్తి సుద్ధిం;

కచ్చిస్సు తే భగవా తత్థ యతా చరన్తా, అతారు జాతిఞ్చ జరఞ్చ మారిస;

పుచ్ఛామి తం భగవా బ్రూహి మే తం’’.

౧౦౮౬. ‘‘యే కేచిమే సమణబ్రాహ్మణాసే, (నన్దాతి భగవా)

దిట్ఠస్సుతేనాపి వదన్తి సుద్ధిం;

సీలబ్బతేనాపి వదన్తి సుద్ధిం, అనేకరూపేన వదన్తి సుద్ధిం;

కిఞ్చాపి తే తత్థ యతా చరన్తి, నారింసు జాతిజరన్తి బ్రూమి’’.

౧౦౮౭. ‘‘యే కేచిమే సమణబ్రాహ్మణాసే, (ఇచ్చాయస్మా నన్దో)

దిట్ఠస్సుతేనాపి వదన్తి సుద్ధిం;

సీలబ్బతేనాపి వదన్తి సుద్ధిం, అనేకరూపేన వదన్తి సుద్ధిం;

తే చే ముని [సచే ముని (సీ.)] బ్రూసి అనోఘతిణ్ణే, అథ కో చరహి దేవమనుస్సలోకే;

అతారి జాతిఞ్చ జరఞ్చ మారిస, పుచ్ఛామి తం భగవా బ్రూహి మే తం’’.

౧౦౮౮. ‘‘నాహం సబ్బే సమణబ్రాహ్మణాసే, (నన్దాతి భగవా)

జాతిజరాయ నివుతాతి బ్రూమి;

యే సీధ దిట్ఠంవ సుతం ముతం వా, సీలబ్బతం వాపి పహాయ సబ్బం;

అనేకరూపమ్పి పహాయ సబ్బం, తణ్హం పరిఞ్ఞాయ అనాసవాసే;

తే వే నరా ఓఘతిణ్ణాతి బ్రూమి’’.

౧౦౮౯. ‘‘ఏతాభినన్దామి వచో మహేసినో, సుకిత్తితం గోతమనూపధీకం;

యే సీధ దిట్ఠం వ సుతం ముతం వా, సీలబ్బతం వాపి పహాయ సబ్బం;

అనేకరూపమ్పి పహాయ సబ్బం, తణ్హం పరిఞ్ఞాయ అనాసవాసే;

అహమ్పి తే ఓఘతిణ్ణాతి బ్రూమీ’’తి.

నన్దమాణవపుచ్ఛా సత్తమా నిట్ఠితా.