౫. ధోతకమాణవపుచ్ఛా

౧౦౬౭. ‘‘పుచ్ఛామి తం భగవా బ్రూహి మే తం, (ఇచ్చాయస్మా ధోతకో)

వాచాభికఙ్ఖామి మహేసి తుయ్హం;

తవ సుత్వాన నిగ్ఘోసం, సిక్ఖే నిబ్బానమత్తనో’’.

౧౦౬౮. ‘‘తేనహాతప్పం కరోహి, (ధోతకాతి భగవా) ఇధేవ నిపకో సతో;

ఇతో సుత్వాన నిగ్ఘోసం, సిక్ఖే నిబ్బానమత్తనో’’.

౧౦౬౯. ‘‘పస్సామహం దేవమనుస్సలోకే, అకిఞ్చనం బ్రాహ్మణమిరియమానం;

తం తం నమస్సామి సమన్తచక్ఖు, పముఞ్చ మం సక్క కథంకథాహి’’.

౧౦౭౦. ‘‘నాహం సహిస్సామి [సమిస్సామి (స్యా.), గమిస్సామి (సీ.), సమీహామి (పీ.)] పమోచనాయ, కథంకథిం ధోతక కఞ్చి లోకే;

ధమ్మఞ్చ సేట్ఠం అభిజానమానో [ఆజానమానో (సీ. స్యా. పీ.)], ఏవం తువం ఓఘమిమం తరేసి’’.

౧౦౭౧. ‘‘అనుసాస బ్రహ్మే కరుణాయమానో, వివేకధమ్మం యమహం విజఞ్ఞం;

యథాహం ఆకాసోవ అబ్యాపజ్జమానో, ఇధేవ సన్తో అసితో చరేయ్యం’’.

౧౦౭౨. ‘‘కిత్తయిస్సామి తే సన్తిం, (ధోతకాతి భగవా) దిట్ఠే ధమ్మే అనీతిహం;

యం విదిత్వా సతో చరం, తరే లోకే విసత్తికం’’.

౧౦౭౩. ‘‘తఞ్చాహం అభినన్దామి, మహేసి సన్తిముత్తమం;

యం విదిత్వా సతో చరం, తరే లోకే విసత్తికం’’.

౧౦౭౪. ‘‘యం కిఞ్చి సమ్పజానాసి, (ధోతకాతి భగవా)

ఉద్ధం అధో తిరియఞ్చాపి మజ్ఝే;

ఏతం విదిత్వా సఙ్గోతి లోకే, భవాభవాయ మాకాసి తణ్హ’’న్తి.

ధోతకమాణవపుచ్ఛా పఞ్చమీ నిట్ఠితా.