౧౨. భద్రావుధమాణవపుచ్ఛా

౧౧౦౭. ‘‘ఓకఞ్జహం తణ్హచ్ఛిదం అనేజం, (ఇచ్చాయస్మా భద్రావుధో)

నన్దిఞ్జహం ఓఘతిణ్ణం విముత్తం;

కప్పఞ్జహం అభియాచే సుమేధం, సుత్వాన నాగస్స అపనమిస్సన్తి ఇతో.

౧౧౦౮. ‘‘నానాజనా జనపదేహి సఙ్గతా, తవ వీర వాక్యం అభికఙ్ఖమానా;

తేసం తువం సాధు వియాకరోహి, తథా హి తే విదితో ఏస ధమ్మో’’.

౧౧౦౯. ‘‘ఆదానతణ్హం వినయేథ సబ్బం, (భద్రావుధాతి భగవా)

ఉద్ధం అధో తిరియఞ్చాపి మజ్ఝే;

యం యఞ్హి లోకస్మిముపాదియన్తి, తేనేవ మారో అన్వేతి జన్తుం.

౧౧౧౦. ‘‘తస్మా పజానం న ఉపాదియేథ, భిక్ఖు సతో కిఞ్చనం సబ్బలోకే;

ఆదానసత్తే ఇతి పేక్ఖమానో, పజం ఇమం మచ్చుధేయ్యే విసత్త’’న్తి.

భద్రావుధమాణవపుచ్ఛా ద్వాదసమా నిట్ఠితా.