౧౩. ఉదయమాణవపుచ్ఛా

౧౧౧౧. ‘‘ఝాయిం విరజమాసీనం, (ఇచ్చాయస్మా ఉదయో) కతకిచ్చం అనాసవం;

పారగుం సబ్బధమ్మానం, అత్థి పఞ్హేన ఆగమం;

అఞ్ఞావిమోక్ఖం పబ్రూహి, అవిజ్జాయ పభేదనం’’.

౧౧౧౨. ‘‘పహానం కామచ్ఛన్దానం, (ఉదయాతి భగవా) దోమనస్సాన చూభయం;

థినస్స చ పనూదనం, కుక్కుచ్చానం నివారణం.

౧౧౧౩. ‘‘ఉపేక్ఖాసతిసంసుద్ధం, ధమ్మతక్కపురేజవం;

అఞ్ఞావిమోక్ఖం పబ్రూమి, అవిజ్జాయ పభేదనం’’.

౧౧౧౪. ‘‘కింసు సంయోజనో లోకో, కింసు తస్స విచారణం;

కిస్సస్స విప్పహానేన, నిబ్బానం ఇతి వుచ్చతి’’.

౧౧౧౫. ‘‘నన్దిసంయోజనో లోకో, వితక్కస్స విచారణం;

తణ్హాయ విప్పహానేన, నిబ్బానం ఇతి వుచ్చతి’’.

౧౧౧౬. ‘‘కథం సతస్స చరతో, విఞ్ఞాణం ఉపరుజ్ఝతి;

భగవన్తం పుట్ఠుమాగమ్మ, తం సుణోమ వచో తవ’’.

౧౧౧౭. ‘‘అజ్ఝత్తఞ్చ బహిద్ధా చ, వేదనం నాభినన్దతో;

ఏవం సతస్స చరతో, విఞ్ఞాణం ఉపరుజ్ఝతీ’’తి.

ఉదయమాణవపుచ్ఛా తేరసమా నిట్ఠితా.