౧౧. జతుకణ్ణిమాణవపుచ్ఛా

౧౧౦౨. ‘‘సుత్వానహం వీరమకామకామిం, (ఇచ్చాయస్మా జతుకణ్ణి)

ఓఘాతిగం పుట్ఠుమకామమాగమం;

సన్తిపదం బ్రూహి సహజనేత్త, యథాతచ్ఛం భగవా బ్రూహి మే తం.

౧౧౦౩. ‘‘భగవా హి కామే అభిభుయ్య ఇరియతి, ఆదిచ్చోవ పథవిం తేజీ తేజసా;

పరిత్తపఞ్ఞస్స మే భూరిపఞ్ఞ, ఆచిక్ఖ ధమ్మం యమహం విజఞ్ఞం;

జాతిజరాయ ఇధ విప్పహానం’’.

౧౧౦౪. ‘‘కామేసు వినయ గేధం, (జతుకణ్ణీతి భగవా) నేక్ఖమ్మం దట్ఠు ఖేమతో;

ఉగ్గహీతం నిరత్తం వా, మా తే విజ్జిత్థ కిఞ్చనం.

౧౧౦౫. ‘‘యం పుబ్బే తం విసోసేహి, పచ్ఛా తే మాహు కిఞ్చనం;

మజ్ఝే చే నో గహేస్ససి, ఉపసన్తో చరిస్ససి.

౧౧౦౬. ‘‘సబ్బసో నామరూపస్మిం, వీతగేధస్స బ్రాహ్మణ;

ఆసవాస్స న విజ్జన్తి, యేహి మచ్చువసం వజే’’తి.

జతుకణ్ణిమాణవపుచ్ఛా ఏకాదసమా నిట్ఠితా.