౧౦. కప్పమాణవపుచ్ఛా

౧౦౯౮. ‘‘మజ్ఝే సరస్మిం తిట్ఠతం, (ఇచ్చాయస్మా కప్పో)

ఓఘే జాతే మహబ్భయే;

జరామచ్చుపరేతానం, దీపం పబ్రూహి మారిస;

త్వఞ్చ మే దీపమక్ఖాహి, యథాయిదం నాపరం సియా’’.

౧౦౯౯. ‘‘మజ్ఝే సరస్మిం తిట్ఠతం, (కప్పాతి భగవా)

ఓఘే జాతే మహబ్భయే;

జరామచ్చుపరేతానం, దీపం పబ్రూమి కప్ప తే.

౧౧౦౦. ‘‘అకిఞ్చనం అనాదానం, ఏతం దీపం అనాపరం;

నిబ్బానం ఇతి [నిబ్బానమీతి (సీ.)] నం బ్రూమి, జరామచ్చుపరిక్ఖయం.

౧౧౦౧. ‘‘ఏతదఞ్ఞాయ యే సతా, దిట్ఠధమ్మాభినిబ్బుతా;

న తే మారవసానుగా, న తే మారస్స పద్ధగూ’’తి [పట్ఠగూతి (స్యా. క.)].

కప్పమాణవపుచ్ఛా దసమా నిట్ఠితా.