౧౫. అత్తదణ్డసుత్తం

౯౪౧. ‘‘అత్తదణ్డా భయం జాతం, జనం పస్సథ మేధగం;

సంవేగం కిత్తయిస్సామి, యథా సంవిజితం మయా.

౯౪౨. ‘‘ఫన్దమానం పజం దిస్వా, మచ్ఛే అప్పోదకే యథా;

అఞ్ఞమఞ్ఞేహి బ్యారుద్ధే, దిస్వా మం భయమావిసి.

౯౪౩. ‘‘సమన్తమసారో లోకో, దిసా సబ్బా సమేరితా;

ఇచ్ఛం భవనమత్తనో, నాద్దసాసిం అనోసితం.

౯౪౪. ‘‘ఓసానేత్వేవ బ్యారుద్ధే, దిస్వా మే అరతీ అహు;

అథేత్థ సల్లమద్దక్ఖిం, దుద్దసం హదయనిస్సితం.

౯౪౫. ‘‘యేన సల్లేన ఓతిణ్ణో, దిసా సబ్బా విధావతి;

తమేవ సల్లమబ్బుయ్హ, న ధావతి న సీదతి.

౯౪౬. ‘‘తత్థ సిక్ఖానుగీయన్తి [సిక్ఖానుకిరియన్తి (క.)], యాని లోకే గధితాని;

న తేసు పసుతో సియా, నిబ్బిజ్ఝ సబ్బసో కామే;

సిక్ఖే నిబ్బానమత్తనో.

౯౪౭. ‘‘సచ్చో సియా అప్పగబ్భో, అమాయో రిత్తపేసుణో;

అక్కోధనో లోభపాపం, వేవిచ్ఛం వితరే ముని.

౯౪౮. ‘‘నిద్దం తన్దిం సహే థీనం, పమాదేన న సంవసే;

అతిమానే న తిట్ఠేయ్య, నిబ్బానమనసో నరో.

౯౪౯. ‘‘మోసవజ్జే న నీయేథ, రూపే స్నేహం న కుబ్బయే;

మానఞ్చ పరిజానేయ్య, సాహసా విరతో చరే.

౯౫౦. ‘‘పురాణం నాభినన్దేయ్య, నవే ఖన్తిం న కుబ్బయే;

హియ్యమానే న సోచేయ్య, ఆకాసం న సితో సియా.

౯౫౧. ‘‘గేధం బ్రూమి మహోఘోతి, ఆజవం బ్రూమి జప్పనం;

ఆరమ్మణం పకప్పనం, కామపఙ్కో దురచ్చయో.

౯౫౨. ‘‘సచ్చా అవోక్కమ్మ [అవోక్కమం (నిద్దేస)] ముని, థలే తిట్ఠతి బ్రాహ్మణో;

సబ్బం సో [సబ్బసో (స్యా. క.)] పటినిస్సజ్జ, స వే సన్తోతి వుచ్చతి.

౯౫౩. ‘‘స వే విద్వా స వేదగూ, ఞత్వా ధమ్మం అనిస్సితో;

సమ్మా సో లోకే ఇరియానో, న పిహేతీధ కస్సచి.

౯౫౪. ‘‘యోధ కామే అచ్చతరి, సఙ్గం లోకే దురచ్చయం;

న సో సోచతి నాజ్ఝేతి, ఛిన్నసోతో అబన్ధనో.

౯౫౫. ‘‘యం పుబ్బే తం విసోసేహి, పచ్ఛా తే మాహు కిఞ్చనం;

మజ్ఝే చే నో గహేస్ససి, ఉపసన్తో చరిస్ససి.

౯౫౬. ‘‘సబ్బసో నామరూపస్మిం, యస్స నత్థి మమాయితం;

అసతా చ న సోచతి, స వే లోకే న జీయతి.

౯౫౭. ‘‘యస్స నత్థి ఇదం మేతి, పరేసం వాపి కిఞ్చనం;

మమత్తం సో అసంవిన్దం, నత్థి మేతి న సోచతి.

౯౫౮. ‘‘అనిట్ఠురీ అననుగిద్ధో, అనేజో సబ్బధీ సమో;

తమానిసంసం పబ్రూమి, పుచ్ఛితో అవికమ్పినం.

౯౫౯. ‘‘అనేజస్స విజానతో, నత్థి కాచి నిసఙ్ఖతి [నిసఙ్ఖితి (సీ. పీ.)].

విరతో సో వియారబ్భా, ఖేమం పస్సతి సబ్బధి.

౯౬౦. ‘‘న సమేసు న ఓమేసు, న ఉస్సేసు వదతే ముని;

సన్తో సో వీతమచ్ఛరో, నాదేతి న నిరస్సతీ’’తి.

అత్తదణ్డసుత్తం పన్నరసమం నిట్ఠితం.