౧౪. తువటకసుత్తం

౯౨౧. ‘‘పుచ్ఛామి తం ఆదిచ్చబన్ధు [ఆదిచ్చబన్ధుం (సీ. స్యా.)], వివేకం సన్తిపదఞ్చ మహేసి;

కథం దిస్వా నిబ్బాతి భిక్ఖు, అనుపాదియానో లోకస్మిం కిఞ్చి’’.

౯౨౨. ‘‘మూలం పపఞ్చసఙ్ఖాయ, (ఇతి భగవా)

మన్తా అస్మీతి సబ్బముపరున్ధే [సబ్బముపరుద్ధే (స్యా. పీ. క.)];

యా కాచి తణ్హా అజ్ఝత్తం,

తాసం వినయా [వినయాయ (?)] సదా సతో సిక్ఖే.

౯౨౩. ‘‘యం కిఞ్చి ధమ్మమభిజఞ్ఞా, అజ్ఝత్తం అథవాపి బహిద్ధా;

న తేన థామం [మానం (సీ. క.)] కుబ్బేథ, న హి సా నిబ్బుతి సతం వుత్తా.

౯౨౪. ‘‘సేయ్యో న తేన మఞ్ఞేయ్య, నీచేయ్యో అథవాపి సరిక్ఖో;

ఫుట్ఠో [పుట్ఠో (సీ. స్యా. క.)] అనేకరూపేహి, నాతుమానం వికప్పయం తిట్ఠే.

౯౨౫. ‘‘అజ్ఝత్తమేవుపసమే, న అఞ్ఞతో భిక్ఖు సన్తిమేసేయ్య;

అజ్ఝత్తం ఉపసన్తస్స, నత్థి అత్తా కుతో నిరత్తా వా.

౯౨౬. ‘‘మజ్ఝే యథా సముద్దస్స, ఊమి నో జాయతీ ఠితో హోతి;

ఏవం ఠితో అనేజస్స, ఉస్సదం భిక్ఖు న కరేయ్య కుహిఞ్చి’’.

౯౨౭. ‘‘అకిత్తయీ వివటచక్ఖు, సక్ఖిధమ్మం పరిస్సయవినయం;

పటిపదం వదేహి భద్దన్తే, పాతిమోక్ఖం అథవాపి సమాధిం’’.

౯౨౮. ‘‘చక్ఖూహి నేవ లోలస్స, గామకథాయ ఆవరయే సోతం;

రసే చ నానుగిజ్ఝేయ్య, న చ మమాయేథ కిఞ్చి లోకస్మిం.

౯౨౯. ‘‘ఫస్సేన యదా ఫుట్ఠస్స, పరిదేవం భిక్ఖు న కరేయ్య కుహిఞ్చి;

భవఞ్చ నాభిజప్పేయ్య, భేరవేసు చ న సమ్పవేధేయ్య.

౯౩౦. ‘‘అన్నానమథో పానానం, ఖాదనీయానం అథోపి వత్థానం;

లద్ధా న సన్నిధిం కయిరా, న చ పరిత్తసే తాని అలభమానో.

౯౩౧. ‘‘ఝాయీ న పాదలోలస్స, విరమే కుక్కుచ్చా నప్పమజ్జేయ్య;

అథాసనేసు సయనేసు, అప్పసద్దేసు భిక్ఖు విహరేయ్య.

౯౩౨. ‘‘నిద్దం న బహులీకరేయ్య, జాగరియం భజేయ్య ఆతాపీ;

తన్దిం మాయం హస్సం ఖిడ్డం, మేథునం విప్పజహే సవిభూసం.

౯౩౩. ‘‘ఆథబ్బణం సుపినం లక్ఖణం, నో విదహే అథోపి నక్ఖత్తం;

విరుతఞ్చ గబ్భకరణం, తికిచ్ఛం మామకో న సేవేయ్య.

౯౩౪. ‘‘నిన్దాయ నప్పవేధేయ్య, న ఉణ్ణమేయ్య పసంసితో భిక్ఖు;

లోభం సహ మచ్ఛరియేన, కోధం పేసుణియఞ్చ పనుదేయ్య.

౯౩౫. ‘‘కయవిక్కయే న తిట్ఠేయ్య, ఉపవాదం భిక్ఖు న కరేయ్య కుహిఞ్చి;

గామే చ నాభిసజ్జేయ్య, లాభకమ్యా జనం న లపయేయ్య.

౯౩౬. ‘‘న చ కత్థితా సియా భిక్ఖు, న చ వాచం పయుత్తం భాసేయ్య;

పాగబ్భియం న సిక్ఖేయ్య, కథం విగ్గాహికం న కథయేయ్య.

౯౩౭. ‘‘మోసవజ్జే న నీయేథ, సమ్పజానో సఠాని న కయిరా;

అథ జీవితేన పఞ్ఞాయ, సీలబ్బతేన నాఞ్ఞమతిమఞ్ఞే.

౯౩౮. ‘‘సుత్వా రుసితో బహుం వాచం, సమణానం వా పుథుజనానం [పుథువచనానం (సీ. స్యా. పీ.)];

ఫరుసేన నే న పటివజ్జా, న హి సన్తో పటిసేనికరోన్తి.

౯౩౯. ‘‘ఏతఞ్చ ధమ్మమఞ్ఞాయ, విచినం భిక్ఖు సదా సతో సిక్ఖే;

సన్తీతి నిబ్బుతిం ఞత్వా, సాసనే గోతమస్స న పమజ్జేయ్య.

౯౪౦. ‘‘అభిభూ హి సో అనభిభూతో, సక్ఖిధమ్మమనీతిహమదస్సీ;

తస్మా హి తస్స భగవతో సాసనే, అప్పమత్తో సదా నమస్సమనుసిక్ఖే’’తి.

తువటకసుత్తం చుద్దసమం నిట్ఠితం.