౧౩. మహాబ్యూహసుత్తం
౯౦౧. యే కేచిమే దిట్ఠిపరిబ్బసానా, ఇదమేవ సచ్చన్తి వివాదయన్తి [వివాదియన్తి (సీ. పీ.)];
సబ్బేవ తే నిన్దమన్వానయన్తి, అథో పసంసమ్పి లభన్తి తత్థ.
౯౦౨. అప్పఞ్హి ఏతం న అలం సమాయ, దువే వివాదస్స ఫలాని బ్రూమి;
ఏతమ్పి దిస్వా న వివాదయేథ, ఖేమాభిపస్సం అవివాదభూమిం.
౯౦౩. యా కాచిమా సమ్ముతియో పుథుజ్జా, సబ్బావ ఏతా న ఉపేతి విద్వా;
అనూపయో సో ఉపయం కిమేయ్య, దిట్ఠే సుతే ఖన్తిమకుబ్బమానో.
౯౦౪. సీలుత్తమా సఞ్ఞమేనాహు సుద్ధిం, వతం సమాదాయ ఉపట్ఠితాసే;
ఇధేవ సిక్ఖేమ అథస్స సుద్ధిం, భవూపనీతా కుసలా వదానా.
౯౦౫. సచే చుతో సీలవతతో హోతి, పవేధతీ [స వేధతి (సీ. పీ.)] కమ్మ విరాధయిత్వా;
పజప్పతీ పత్థయతీ చ సుద్ధిం, సత్థావ హీనో పవసం ఘరమ్హా.
౯౦౬. సీలబ్బతం వాపి పహాయ సబ్బం, కమ్మఞ్చ సావజ్జనవజ్జమేతం;
సుద్ధిం అసుద్ధిన్తి అపత్థయానో, విరతో చరే సన్తిమనుగ్గహాయ.
౯౦౭. తమూపనిస్సాయ జిగుచ్ఛితం వా, అథవాపి దిట్ఠం వ సుతం ముతం వా;
ఉద్ధంసరా సుద్ధిమనుత్థునన్తి, అవీతతణ్హాసే భవాభవేసు.
౯౦౮. పత్థయమానస్స హి జప్పితాని, పవేధితం వాపి పకప్పితేసు;
చుతూపపాతో ఇధ యస్స నత్థి, స కేన వేధేయ్య కుహింవ జప్పే [కుహిఞ్చి జప్పే (సీ. స్యా. క.), కుహిం పజప్పే (పీ.) నిద్దేసో పస్సితబ్బో].
౯౦౯. యమాహు ధమ్మం పరమన్తి ఏకే, తమేవ హీనన్తి పనాహు అఞ్ఞే;
సచ్చో ను వాదో కతమో ఇమేసం, సబ్బేవ హీమే కుసలా వదానా.
౯౧౦. సకఞ్హి ధమ్మం పరిపుణ్ణమాహు, అఞ్ఞస్స ధమ్మం పన హీనమాహు;
ఏవమ్పి విగ్గయ్హ వివాదయన్తి, సకం సకం సమ్ముతిమాహు సచ్చం.
౯౧౧. పరస్స చే వమ్భయితేన హీనో, న కోచి ధమ్మేసు విసేసి అస్స;
పుథూ హి అఞ్ఞస్స వదన్తి ధమ్మం, నిహీనతో సమ్హి దళ్హం వదానా.
౯౧౨. సద్ధమ్మపూజాపి నేసం తథేవ, యథా పసంసన్తి సకాయనాని;
సబ్బేవ వాదా [సబ్బే పవాదా (స్యా.)] తథియా [తథివా (సబ్బత్థ)] భవేయ్యుం, సుద్ధీ హి నేసం పచ్చత్తమేవ.
౯౧౩. న బ్రాహ్మణస్స పరనేయ్యమత్థి, ధమ్మేసు నిచ్ఛేయ్య సముగ్గహీతం;
తస్మా వివాదాని ఉపాతివత్తో, న హి సేట్ఠతో పస్సతి ధమ్మమఞ్ఞం.
౯౧౪. జానామి పస్సామి తథేవ ఏతం, దిట్ఠియా ఏకే పచ్చేన్తి సుద్ధిం;
అద్దక్ఖి చే కిఞ్హి తుమస్స తేన, అతిసిత్వా అఞ్ఞేన వదన్తి సుద్ధిం.
౯౧౫. పస్సం నరో దక్ఖతి [దక్ఖితి (సీ.)] నామరూపం, దిస్వాన వా ఞస్సతి తానిమేవ;
కామం బహుం పస్సతు అప్పకం వా, న హి తేన సుద్ధిం కుసలా వదన్తి.
౯౧౬. నివిస్సవాదీ న హి సుబ్బినాయో, పకప్పితం దిట్ఠి పురేక్ఖరానో;
యం నిస్సితో తత్థ సుభం వదానో, సుద్ధింవదో తత్థ తథద్దసా సో.
౯౧౭. న బ్రాహ్మణో కప్పముపేతి సఙ్ఖా [సఙ్ఖం (సీ. స్యా. పీ.)], న దిట్ఠిసారీ నపి ఞాణబన్ధు;
ఞత్వా చ సో సమ్ముతియో [సమ్మతియో (స్యా.)] పుథుజ్జా, ఉపేక్ఖతీ ఉగ్గహణన్తి మఞ్ఞే.
౯౧౮. విస్సజ్జ గన్థాని మునీధ లోకే, వివాదజాతేసు న వగ్గసారీ;
సన్తో అసన్తేసు ఉపేక్ఖకో సో, అనుగ్గహో ఉగ్గహణన్తి మఞ్ఞే.
౯౧౯. పుబ్బాసవే హిత్వా నవే అకుబ్బం, న ఛన్దగూ నోపి నివిస్సవాదీ;
స విప్పముత్తో దిట్ఠిగతేహి ధీరో, న లిమ్పతి [న లిప్పతి (సీ. పీ.)] లోకే అనత్తగరహీ.
౯౨౦. స సబ్బధమ్మేసు విసేనిభూతో, యం కిఞ్చి దిట్ఠం వ సుతం ముతం వా;
స పన్నభారో ముని విప్పముత్తో, న కప్పియో నూపరతో న పత్థియోతి.
మహాబ్యూహసుత్తం తేరసమం నిట్ఠితం.