౧౧. కలహవివాదసుత్తం

౮౬౮. ‘‘కుతోపహూతా కలహా వివాదా, పరిదేవసోకా సహమచ్ఛరా చ;

మానాతిమానా సహపేసుణా చ, కుతోపహూతా తే తదిఙ్ఘ బ్రూహి’’.

౮౬౯. ‘‘పియప్పహూతా కలహా వివాదా,

పరిదేవసోకా సహమచ్ఛరా చ;

మానాతిమానా సహపేసుణా చ,

మచ్ఛేరయుత్తా కలహా వివాదా;

వివాదజాతేసు చ పేసుణాని’’.

౮౭౦. ‘‘పియా సు [పియాను (స్యా.), పియస్సు (క.)] లోకస్మిం కుతోనిదానా, యే చాపి [యే వాపి (సీ. స్యా. పీ.)] లోభా విచరన్తి లోకే;

ఆసా చ నిట్ఠా చ కుతోనిదానా, యే సమ్పరాయాయ నరస్స హోన్తి’’.

౮౭౧. ‘‘ఛన్దానిదానాని పియాని లోకే, యే చాపి లోభా విచరన్తి లోకే;

ఆసా చ నిట్ఠా చ ఇతోనిదానా, యే సమ్పరాయాయ నరస్స హోన్తి’’.

౮౭౨. ‘‘ఛన్దో ను లోకస్మిం కుతోనిదానో, వినిచ్ఛయా చాపి [వాపి (సీ. స్యా. పీ.)] కుతోపహూతా;

కోధో మోసవజ్జఞ్చ కథంకథా చ, యే వాపి ధమ్మా సమణేన వుత్తా’’.

౮౭౩. ‘‘సాతం అసాతన్తి యమాహు లోకే, తమూపనిస్సాయ పహోతి ఛన్దో;

రూపేసు దిస్వా విభవం భవఞ్చ, వినిచ్ఛయం కుబ్బతి [కురుతే (బహూసు)] జన్తు లోకే.

౮౭౪. ‘‘కోధో మోసవజ్జఞ్చ కథంకథా చ, ఏతేపి ధమ్మా ద్వయమేవ సన్తే;

కథంకథీ ఞాణపథాయ సిక్ఖే, ఞత్వా పవుత్తా సమణేన ధమ్మా’’.

౮౭౫. ‘‘సాతం అసాతఞ్చ కుతోనిదానా, కిస్మిం అసన్తే న భవన్తి హేతే;

విభవం భవఞ్చాపి యమేతమత్థం, ఏతం మే పబ్రూహి యతోనిదానం’’.

౮౭౬. ‘‘ఫస్సనిదానం సాతం అసాతం, ఫస్సే అసన్తే న భవన్తి హేతే;

విభవం భవఞ్చాపి యమేతమత్థం, ఏతం తే పబ్రూమి ఇతోనిదానం’’.

౮౭౭. ‘‘ఫస్సో ను లోకస్మి కుతోనిదానో, పరిగ్గహా చాపి కుతోపహూతా;

కిస్మిం అసన్తే న మమత్తమత్థి, కిస్మిం విభూతే న ఫుసన్తి ఫస్సా’’.

౮౭౮. ‘‘నామఞ్చ రూపఞ్చ పటిచ్చ ఫస్సో, ఇచ్ఛానిదానాని పరిగ్గహాని;

ఇచ్ఛాయసన్త్యా న మమత్తమత్థి, రూపే విభూతే న ఫుసన్తి ఫస్సా’’.

౮౭౯. ‘‘కథంసమేతస్స విభోతి రూపం, సుఖం దుఖఞ్చాపి [దుఖం వాపి (సీ. స్యా.)] కథం విభోతి;

ఏతం మే పబ్రూహి యథా విభోతి, తం జానియామాతి [జానిస్సామాతి (సీ. క.)] మే మనో అహు’’.

౮౮౦. ‘‘న సఞ్ఞసఞ్ఞీ న విసఞ్ఞసఞ్ఞీ, నోపి అసఞ్ఞీ న విభూతసఞ్ఞీ;

ఏవంసమేతస్స విభోతి రూపం, సఞ్ఞానిదానా హి పపఞ్చసఙ్ఖా’’.

౮౮౧. ‘‘యం తం అపుచ్ఛిమ్హ అకిత్తయీ నో,

అఞ్ఞం తం పుచ్ఛామ తదిఙ్ఘ బ్రూహి;

ఏత్తావతగ్గం ను [నో (సీ. స్యా.)] వదన్తి హేకే,

యక్ఖస్స సుద్ధిం ఇధ పణ్డితాసే;

ఉదాహు అఞ్ఞమ్పి వదన్తి ఏత్తో.

౮౮౨. ‘‘ఏత్తావతగ్గమ్పి వదన్తి హేకే, యక్ఖస్స సుద్ధిం ఇధ పణ్డితాసే;

తేసం పనేకే సమయం వదన్తి, అనుపాదిసేసే కుసలా వదానా.

౮౮౩. ‘‘ఏతే చ ఞత్వా ఉపనిస్సితాతి, ఞత్వా మునీ నిస్సయే సో విమంసీ;

ఞత్వా విముత్తో న వివాదమేతి, భవాభవాయ న సమేతి ధీరో’’తి.

కలహవివాదసుత్తం ఏకాదసమం నిట్ఠితం.