౧౦. పురాభేదసుత్తం

౮౫౪. ‘‘కథందస్సీ కథంసీలో, ఉపసన్తోతి వుచ్చతి;

తం మే గోతమ పబ్రూహి, పుచ్ఛితో ఉత్తమం నరం’’.

౮౫౫. ‘‘వీతతణ్హో పురా భేదా, (ఇతి భగవా) పుబ్బమన్తమనిస్సితో;

వేమజ్ఝే నుపసఙ్ఖేయ్యో, తస్స నత్థి పురక్ఖతం.

౮౫౬. ‘‘అక్కోధనో అసన్తాసీ, అవికత్థీ అకుక్కుచో;

మన్తభాణీ [మన్తాభాణీ (స్యా. పీ.)] అనుద్ధతో, స వే వాచాయతో ముని.

౮౫౭. ‘‘నిరాసత్తి అనాగతే, అతీతం నానుసోచతి;

వివేకదస్సీ ఫస్సేసు, దిట్ఠీసు చ న నీయతి [నియ్యతి (బహూసు)].

౮౫౮. ‘‘పతిలీనో అకుహకో, అపిహాలు అమచ్ఛరీ;

అప్పగబ్భో అజేగుచ్ఛో, పేసుణేయ్యే చ నో యుతో.

౮౫౯. ‘‘సాతియేసు అనస్సావీ, అతిమానే చ నో యుతో;

సణ్హో చ పటిభానవా [పటిభాణవా (స్యా. పీ.)], న సద్ధో న విరజ్జతి.

౮౬౦. ‘‘లాభకమ్యా న సిక్ఖతి, అలాభే చ న కుప్పతి;

అవిరుద్ధో చ తణ్హాయ, రసేసు నానుగిజ్ఝతి.

౮౬౧. ‘‘ఉపేక్ఖకో సదా సతో, న లోకే మఞ్ఞతే సమం;

న విసేసీ న నీచేయ్యో, తస్స నో సన్తి ఉస్సదా.

౮౬౨. ‘‘యస్స నిస్సయనా [నిస్సయతా (సీ. స్యా. పీ.)] నత్థి, ఞత్వా ధమ్మం అనిస్సితో;

భవాయ విభవాయ వా, తణ్హా యస్స న విజ్జతి.

౮౬౩. ‘‘తం బ్రూమి ఉపసన్తోతి, కామేసు అనపేక్ఖినం;

గన్థా తస్స న విజ్జన్తి, అతరీ సో విసత్తికం.

౮౬౪. ‘‘న తస్స పుత్తా పసవో, ఖేత్తం వత్థుఞ్చ విజ్జతి;

అత్తా వాపి నిరత్తా వా [అత్తం వాపి నిరత్తం వా (బహూసు)], న తస్మిం ఉపలబ్భతి.

౮౬౫. ‘‘యేన నం వజ్జుం పుథుజ్జనా, అథో సమణబ్రాహ్మణా;

తం తస్స అపురక్ఖతం, తస్మా వాదేసు నేజతి.

౮౬౬. ‘‘వీతగేధో అమచ్ఛరీ, న ఉస్సేసు వదతే ముని;

న సమేసు న ఓమేసు, కప్పం నేతి అకప్పియో.

౮౬౭. ‘‘యస్స లోకే సకం నత్థి, అసతా చ న సోచతి;

ధమ్మేసు చ న గచ్ఛతి, స వే సన్తోతి వుచ్చతీ’’తి.

పురాభేదసుత్తం దసమం నిట్ఠితం.