౮. సల్లసుత్తం

౫౭౯. అనిమిత్తమనఞ్ఞాతం, మచ్చానం ఇధ జీవితం;

కసిరఞ్చ పరిత్తఞ్చ, తఞ్చ దుక్ఖేన సంయుతం.

౫౮౦. న హి సో ఉపక్కమో అత్థి, యేన జాతా న మియ్యరే;

జరమ్పి పత్వా మరణం, ఏవంధమ్మా హి పాణినో.

౫౮౧. ఫలానమివ పక్కానం, పాతో పతనతో [పపతతో (సీ. పీ. అట్ఠ.)] భయం;

ఏవం జాతాన మచ్చానం, నిచ్చం మరణతో భయం.

౫౮౨. యథాపి కుమ్భకారస్స, కతా మత్తికభాజనా;

సబ్బే భేదనపరియన్తా [భేదపరియన్తా (స్యా.)], ఏవం మచ్చాన జీవితం.

౫౮౩. దహరా చ మహన్తా చ, యే బాలా యే చ పణ్డితా;

సబ్బే మచ్చువసం యన్తి, సబ్బే మచ్చుపరాయణా.

౫౮౪. తేసం మచ్చుపరేతానం, గచ్ఛతం పరలోకతో;

న పితా తాయతే పుత్తం, ఞాతీ వా పన ఞాతకే.

౫౮౫. పేక్ఖతం యేవ ఞాతీనం, పస్స లాలపతం పుథు;

ఏకమేకోవ మచ్చానం, గోవజ్ఝో వియ నీయతి [నియ్యతి (బహూసు)].

౫౮౬. ఏవమబ్భాహతో లోకో, మచ్చునా చ జరాయ చ;

తస్మా ధీరా న సోచన్తి, విదిత్వా లోకపరియాయం.

౫౮౭. యస్స మగ్గం న జానాసి, ఆగతస్స గతస్స వా;

ఉభో అన్తే అసమ్పస్సం, నిరత్థం పరిదేవసి.

౫౮౮. పరిదేవయమానో చే, కిఞ్చిదత్థం ఉదబ్బహే;

సమ్మూళ్హో హింసమత్తానం, కయిరా చే నం విచక్ఖణో.

౫౮౯. న హి రుణ్ణేన సోకేన, సన్తిం పప్పోతి చేతసో;

భియ్యస్సుప్పజ్జతే దుక్ఖం, సరీరం చుపహఞ్ఞతి.

౫౯౦. కిసో వివణ్ణో భవతి, హింసమత్తానమత్తనా;

న తేన పేతా పాలేన్తి, నిరత్థా పరిదేవనా.

౫౯౧. సోకమప్పజహం జన్తు, భియ్యో దుక్ఖం నిగచ్ఛతి;

అనుత్థునన్తో కాలఙ్కతం [కాలకతం (సీ. స్యా.)], సోకస్స వసమన్వగూ.

౫౯౨. అఞ్ఞేపి పస్స గమినే, యథాకమ్మూపగే నరే;

మచ్చునో వసమాగమ్మ, ఫన్దన్తేవిధ పాణినో.

౫౯౩. యేన యేన హి మఞ్ఞన్తి, తతో తం హోతి అఞ్ఞథా;

ఏతాదిసో వినాభావో, పస్స లోకస్స పరియాయం.

౫౯౪. అపి వస్ససతం జీవే, భియ్యో వా పన మాణవో;

ఞాతిసఙ్ఘా వినా హోతి, జహాతి ఇధ జీవితం.

౫౯౫. తస్మా అరహతో సుత్వా, వినేయ్య పరిదేవితం;

పేతం కాలఙ్కతం దిస్వా, నేసో లబ్భా మయా ఇతి.

౫౯౬. యథా సరణమాదిత్తం, వారినా పరినిబ్బయే [పరినిబ్బుతో (సీ. క.)];

ఏవమ్పి ధీరో సపఞ్ఞో, పణ్డితో కుసలో నరో;

ఖిప్పముప్పతితం సోకం, వాతో తూలంవ ధంసయే.

౫౯౭. పరిదేవం పజప్పఞ్చ, దోమనస్సఞ్చ అత్తనో;

అత్తనో సుఖమేసానో, అబ్బహే సల్లమత్తనో.

౫౯౮. అబ్బుళ్హసల్లో అసితో, సన్తిం పప్పుయ్య చేతసో;

సబ్బసోకం అతిక్కన్తో, అసోకో హోతి నిబ్బుతోతి.

సల్లసుత్తం అట్ఠమం నిట్ఠితం.