౬. ధమ్మచరియసుత్తం

౨౭౬. ధమ్మచరియం బ్రహ్మచరియం, ఏతదాహు వసుత్తమం;

పబ్బజితోపి చే హోతి, అగారా అనగారియం.

౨౭౭. సో చే ముఖరజాతికో, విహేసాభిరతో మగో;

జీవితం తస్స పాపియో, రజం వడ్ఢేతి అత్తనో.

౨౭౮. కలహాభిరతో భిక్ఖు, మోహధమ్మేన ఆవుతో;

అక్ఖాతమ్పి న జానాతి, ధమ్మం బుద్ధేన దేసితం.

౨౭౯. విహేసం భావితత్తానం, అవిజ్జాయ పురక్ఖతో;

సంకిలేసం న జానాతి, మగ్గం నిరయగామినం.

౨౮౦. వినిపాతం సమాపన్నో, గబ్భా గబ్భం తమా తమం;

స వే తాదిసకో భిక్ఖు, పేచ్చ దుక్ఖం నిగచ్ఛతి.

౨౮౧. గూథకూపో యథా అస్స, సమ్పుణ్ణో గణవస్సికో;

యో చ ఏవరూపో అస్స, దుబ్బిసోధో హి సాఙ్గణో.

౨౮౨. యం ఏవరూపం జానాథ, భిక్ఖవో గేహనిస్సితం;

పాపిచ్ఛం పాపసఙ్కప్పం, పాపఆచారగోచరం.

౨౮౩. సబ్బే సమగ్గా హుత్వాన, అభినిబ్బజ్జియాథ [అభినిబ్బజ్జయాథ (సీ. పీ. అ. ని. ౮.౧౦)] నం;

కారణ్డవం [కారణ్డం వ (స్యా. క.) అ. ని. ౮.౧౦] నిద్ధమథ, కసమ్బుం అపకస్సథ [అవకస్సథ (సీ. స్యా. క.)].

౨౮౪. తతో పలాపే [పలాసే (క.)] వాహేథ, అస్సమణే సమణమానినే;

నిద్ధమిత్వాన పాపిచ్ఛే, పాపఆచారగోచరే.

౨౮౫. సుద్ధా సుద్ధేహి సంవాసం, కప్పయవ్హో పతిస్సతా;

తతో సమగ్గా నిపకా, దుక్ఖస్సన్తం కరిస్సథాతి.

ధమ్మచరియసుత్తం [కపిలసుత్తం (అట్ఠ.)] ఛట్ఠం నిట్ఠితం.