౧౩. సమ్మాపరిబ్బాజనీయసుత్తం

౩౬౧. ‘‘పుచ్ఛామి మునిం పహూతపఞ్ఞం,

తిణ్ణం పారఙ్గతం పరినిబ్బుతం ఠితత్తం;

నిక్ఖమ్మ ఘరా పనుజ్జ కామే, కథం భిక్ఖు

సమ్మా సో లోకే పరిబ్బజేయ్య’’.

౩౬౨. ‘‘యస్స మఙ్గలా సమూహతా, (ఇతి భగవా)

ఉప్పాతా సుపినా చ లక్ఖణా చ;

సో మఙ్గలదోసవిప్పహీనో,

సమ్మా సో లోకే పరిబ్బజేయ్య.

౩౬౩. ‘‘రాగం వినయేథ మానుసేసు, దిబ్బేసు కామేసు చాపి భిక్ఖు;

అతిక్కమ్మ భవం సమేచ్చ ధమ్మం, సమ్మా సో లోకే పరిబ్బజేయ్య.

౩౬౪. ‘‘విపిట్ఠికత్వాన పేసుణాని, కోధం కదరియం జహేయ్య భిక్ఖు;

అనురోధవిరోధవిప్పహీనో, సమ్మా సో లోకే పరిబ్బజేయ్య.

౩౬౫. ‘‘హిత్వాన పియఞ్చ అప్పియఞ్చ, అనుపాదాయ అనిస్సితో కుహిఞ్చి;

సంయోజనియేహి విప్పముత్తో, సమ్మా సో లోకే పరిబ్బజేయ్య.

౩౬౬. ‘‘న సో ఉపధీసు సారమేతి, ఆదానేసు వినేయ్య ఛన్దరాగం;

సో అనిస్సితో అనఞ్ఞనేయ్యో, సమ్మా సో లోకే పరిబ్బజేయ్య.

౩౬౭. ‘‘వచసా మనసా చ కమ్మునా చ, అవిరుద్ధో సమ్మా విదిత్వా ధమ్మం;

నిబ్బానపదాభిపత్థయానో, సమ్మా సో లోకే పరిబ్బజేయ్య.

౩౬౮. ‘‘యో వన్దతి మన్తి నుణ్ణమేయ్య [నున్నమేయ్య (?)], అక్కుట్ఠోపి న సన్ధియేథ భిక్ఖు;

లద్ధా పరభోజనం న మజ్జే, సమ్మా సో లోకే పరిబ్బజేయ్య.

౩౬౯. ‘‘లోభఞ్చ భవఞ్చ విప్పహాయ, విరతో ఛేదనబన్ధనా చ [ఛేదనబన్ధనతో (సీ. స్యా.)] భిక్ఖు;

సో తిణ్ణకథంకథో విసల్లో, సమ్మా సో లోకే పరిబ్బజేయ్య.

౩౭౦. ‘‘సారుప్పం అత్తనో విదిత్వా, నో చ భిక్ఖు హింసేయ్య కఞ్చి లోకే;

యథా తథియం విదిత్వా ధమ్మం, సమ్మా సో లోకే పరిబ్బజేయ్య.

౩౭౧. ‘‘యస్సానుసయా న సన్తి కేచి, మూలా చ [మూలా (సీ. స్యా.)] అకుసలా సమూహతాసే;

సో నిరాసో [నిరాసయో (సీ.), నిరాససో (స్యా.)] అనాసిసానో [అనాసయానో (సీ. పీ.), అనాససానో (స్యా.)], సమ్మా సో లోకే పరిబ్బజేయ్య.

౩౭౨. ‘‘ఆసవఖీణో పహీనమానో, సబ్బం రాగపథం ఉపాతివత్తో;

దన్తో పరినిబ్బుతో ఠితత్తో, సమ్మా సో లోకే పరిబ్బజేయ్య.

౩౭౩. ‘‘సద్ధో సుతవా నియామదస్సీ, వగ్గగతేసు న వగ్గసారి ధీరో;

లోభం దోసం వినేయ్య పటిఘం, సమ్మా సో లోకే పరిబ్బజేయ్య.

౩౭౪. ‘‘సంసుద్ధజినో వివట్టచ్ఛదో, ధమ్మేసు వసీ పారగూ అనేజో;

సఙ్ఖారనిరోధఞాణకుసలో, సమ్మా సో లోకే పరిబ్బజేయ్య.

౩౭౫. ‘‘అతీతేసు అనాగతేసు చాపి, కప్పాతీతో అతిచ్చసుద్ధిపఞ్ఞో;

సబ్బాయతనేహి విప్పముత్తో, సమ్మా సో లోకే పరిబ్బజేయ్య.

౩౭౬. ‘‘అఞ్ఞాయ పదం సమేచ్చ ధమ్మం, వివటం దిస్వాన పహానమాసవానం;

సబ్బుపధీనం పరిక్ఖయానో [పరిక్ఖయా (పీ.)], సమ్మా సో లోకే పరిబ్బజేయ్య’’.

౩౭౭. ‘‘అద్ధా హి భగవా తథేవ ఏతం, యో సో ఏవంవిహారీ దన్తో భిక్ఖు;

సబ్బసంయోజనయోగవీతివత్తో [సబ్బసంయోజనియే చ వీతివత్తో (సీ. స్యా. పీ.)], సమ్మా సో లోకే పరిబ్బజేయ్యా’’తి.

సమ్మాపరిబ్బాజనీయసుత్తం తేరసమం నిట్ఠితం.