౧౨. నిగ్రోధకప్పసుత్తం
ఏవం మే సుతం – ఏకం సమయం భగవా ఆళవియం విహరతి అగ్గాళవే చేతియే. తేన ఖో పన సమయేన ఆయస్మతో వఙ్గీసస్స ఉపజ్ఝాయో నిగ్రోధకప్పో నామ థేరో అగ్గాళవే చేతియే అచిరపరినిబ్బుతో హోతి. అథ ఖో ఆయస్మతో వఙ్గీసస్స రహోగతస్స పటిసల్లీనస్స ఏవం చేతసో పరివితక్కో ఉదపాది – ‘‘పరినిబ్బుతో ను ఖో మే ఉపజ్ఝాయో ఉదాహు నో పరినిబ్బుతో’’తి? అథ ఖో ఆయస్మా వఙ్గీసో సాయన్హసమయం పటిసల్లానా వుట్ఠితో యేన భగవా తేనుపసఙ్కమి; ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో ఆయస్మా వఙ్గీసో భగవన్తం ఏతదవోచ – ‘‘ఇధ మయ్హం, భన్తే, రహోగతస్స పటిసల్లీనస్స ఏవం చేతసో పరివితక్కో ఉదపాది – ‘పరినిబ్బుతో ను ఖో మే ఉపజ్ఝాయో, ఉదాహు నో పరినబ్బుతో’’’తి. అథ ఖో ఆయస్మా వఙ్గీసో ఉట్ఠాయాసనా ఏకంసం చీవరం కత్వా యేన భగవా తేనఞ్జలిం పణామేత్వా భగవన్తం గాథాయ అజ్ఝభాసి –
౩౪౫. ‘‘పుచ్ఛామ [పుచ్ఛామి (క.)] సత్థారమనోమపఞ్ఞం, దిట్ఠేవ ధమ్మే యో విచికిచ్ఛానం ఛేత్తా;
అగ్గాళవే కాలమకాసి భిక్ఖు, ఞాతో యసస్సీ అభినిబ్బుతత్తో.
౩౪౬. ‘‘నిగ్రోధకప్పో ఇతి తస్స నామం, తయా కతం భగవా బ్రాహ్మణస్స;
సో తం నమస్సం అచరి ముత్యపేక్ఖో, ఆరద్ధవీరియో దళ్హధమ్మదస్సీ.
౩౪౭. ‘‘తం సావకం సక్య [సక్క (సీ. స్యా. పీ.)] మయమ్పి సబ్బే, అఞ్ఞాతుమిచ్ఛామ సమన్తచక్ఖు;
సమవట్ఠితా నో సవనాయ సోతా, తువం నో సత్థా త్వమనుత్తరోసి.
౩౪౮. ‘‘ఛిన్దేవ నో విచికిచ్ఛం బ్రూహి మేతం, పరినిబ్బుతం వేదయ భూరిపఞ్ఞ;
మజ్ఝేవ [మజ్ఝే చ (స్యా. క.)] నో భాస సమన్తచక్ఖు, సక్కోవ దేవాన సహస్సనేత్తో.
౩౪౯. ‘‘యే కేచి గన్థా ఇధ మోహమగ్గా, అఞ్ఞాణపక్ఖా విచికిచ్ఛఠానా;
తథాగతం పత్వా న తే భవన్తి, చక్ఖుఞ్హి ఏతం పరమం నరానం.
౩౫౦. ‘‘నో చే హి జాతు పురిసో కిలేసే, వాతో యథా అబ్భధనం విహానే;
తమోవస్స నివుతో సబ్బలోకో, న జోతిమన్తోపి నరా తపేయ్యుం.
౩౫౧. ‘‘ధీరా చ పజ్జోతకరా భవన్తి, తం తం అహం వీర [ధీర (సీ. స్యా.)] తథేవ మఞ్ఞే;
విపస్సినం జానముపాగముమ్హా [జానముపగమమ్హా (సీ. స్యా.)], పరిసాసు నో ఆవికరోహి కప్పం.
౩౫౨. ‘‘ఖిప్పం గిరం ఏరయ వగ్గు వగ్గుం, హంసోవ పగ్గయ్హ సణికం [సణిం (స్యా. పీ.)] నికూజ;
బిన్దుస్సరేన సువికప్పితేన, సబ్బేవ తే ఉజ్జుగతా సుణోమ.
౩౫౩. ‘‘పహీనజాతిమరణం అసేసం, నిగ్గయ్హ ధోనం [ధోతం (సీ.)] వదేస్సామి ధమ్మం;
న కామకారో హి పుథుజ్జనానం, సఙ్ఖేయ్యకారో చ [సఙ్ఖయ్యకారోవ (క.)] తథాగతానం.
౩౫౪. ‘‘సమ్పన్నవేయ్యాకరణం తవేదం, సముజ్జుపఞ్ఞస్స [సముజ్జపఞ్ఞస్స (స్యా. క.)] సముగ్గహీతం;
అయమఞ్జలీ పచ్ఛిమో సుప్పణామితో, మా మోహయీ జానమనోమపఞ్ఞ.
౩౫౫. ‘‘పరోవరం [వరావరం (కత్థచి)] అరియధమ్మం విదిత్వా, మా మోహయీ జానమనోమవీర;
వారిం యథా ఘమ్మని ఘమ్మతత్తో, వాచాభికఙ్ఖామి సుతం పవస్స [సుతస్స వస్స (స్యా.)].
౩౫౬. ‘‘యదత్థికం [యదత్థియం (పీ.), యదత్థితం (క.)] బ్రహ్మచరియం అచరీ, కప్పాయనో కచ్చిస్స తం అమోఘం;
నిబ్బాయి సో ఆదు సఉపాదిసేసో, యథా విముత్తో అహు తం సుణోమ’’.
౩౫౭. ‘‘అచ్ఛేచ్ఛి [అఛేజ్జి (క.)] తణ్హం ఇధ నామరూపే, (ఇతి భగవా)
కణ్హస్స [తణ్హాయ (క.)] సోతం దీఘరత్తానుసయితం;
అతారి జాతిం మరణం అసేసం,’’
ఇచ్చబ్రవీ భగవా పఞ్చసేట్ఠో.
౩౫౮. ‘‘ఏస సుత్వా పసీదామి, వచో తే ఇసిసత్తమ;
అమోఘం కిర మే పుట్ఠం, న మం వఞ్చేసి బ్రాహ్మణో.
౩౫౯. ‘‘యథావాదీ తథాకారీ, అహు బుద్ధస్స సావకో;
అచ్ఛిదా మచ్చునో జాలం, తతం మాయావినో దళ్హం.
౩౬౦. ‘‘అద్దసా భగవా ఆదిం, ఉపాదానస్స కప్పియో;
అచ్చగా వత కప్పాయనో, మచ్చుధేయ్యం సుదుత్తర’’న్తి.
నిగ్రోధకప్పసుత్తం ద్వాదసమం నిట్ఠితం.