౬. సేరిణీపేతవత్థు

౪౬౪. ‘‘నగ్గా దుబ్బణ్ణరూపాసి, కిసా ధమనిసన్థతా;

ఉప్ఫాసులికే కిసికే, కా ను త్వం ఇధ తిట్ఠసీ’’తి.

౪౬౫. ‘‘అహం భదన్తే పేతీమ్హి, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’’తి.

౪౬౬. ‘‘కిం ను కాయేన వాచాయ, మనసా కుక్కటం కతం;

కిస్స కమ్మవిపాకేన, పేతలోకం ఇతో గతా’’తి.

౪౬౭. ‘‘అనావటేసు తిత్థేసు, విచినిం అడ్ఢమాసకం;

సన్తేసు దేయ్యధమ్మేసు, దీపం నాకాసిమత్తనో.

౪౬౮. ‘‘నదిం ఉపేమి తసితా, రిత్తకా పరివత్తతి;

ఛాయం ఉపేమి ఉణ్హేసు, ఆతపో పరివత్తతి.

౪౬౯. ‘‘అగ్గివణ్ణో చ మే వాతో, డహన్తో ఉపవాయతి;

ఏతఞ్చ భన్తే అరహామి, అఞ్ఞఞ్చ పాపకం తతో.

౪౭౦. ‘‘గన్త్వాన హత్థినిం పురం, వజ్జేసి మయ్హ మాతరం;

‘ధీతా చ తే మయా దిట్ఠా, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’.

౪౭౧. ‘‘అత్థి మే ఏత్థ నిక్ఖిత్తం, అనక్ఖాతఞ్చ తం మయా;

చత్తారిసతసహస్సాని, పల్లఙ్కస్స చ హేట్ఠతో.

౪౭౨. ‘‘తతో మే దానం దదతు, తస్సా చ హోతు జీవికా;

దానం దత్వా చ మే మాతా, దక్ఖిణం అనుదిచ్ఛతు [అనుదిస్సతు (సీ. పీ.), అన్వాదిస్సతు (స్యా.)];

తదాహం సుఖితా హేస్సం, సబ్బకామసమిద్ధినీ’’తి.

౪౭౩. ‘‘సాధూ’’తి సో పటిస్సుత్వా, గన్త్వాన హత్థినిం పురం;

అవోచ తస్సా మాతరం –

‘ధీతా చ తే మయా దిట్ఠా, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’.

౪౭౪. ‘‘సా మం తత్థ సమాదపేసి, ( ) [(గన్త్వాన హత్థినిం పురం) (స్యా. క.)] వజ్జేసి మయ్హ మాతరం;

‘ధీతా చ తే మయా దిట్ఠా, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’.

౪౭౫. ‘‘అత్థి చ మే ఏత్థ నిక్ఖిత్తం, అనక్ఖాతఞ్చ తం మయా;

చత్తారిసతసహస్సాని, పల్లఙ్కస్స చ హేట్ఠతో.

౪౭౬. ‘‘తతో మే దానం దదతు, తస్సా చ హోతు జీవికా;

దానం దత్వా చ మే మాతా, దక్ఖిణం అనుదిచ్ఛతు ( ) [(తతో తువం దానం దేహి, తస్సా దక్ఖిణమాదిసీ) (క.)];

‘తదా సా సుఖితా హేస్సం, సబ్బకామసమిద్ధినీ’’’తి.

౪౭౭. తతో హి సా దానమదా, తస్సా దక్ఖిణమాదిసీ;

పేతీ చ సుఖితా ఆసి, తస్సా చాసి సుజీవికాతి.

సేరిణీపేతవత్థు ఛట్ఠం.