౭. ధనపాలసేట్ఠిపేతవత్థు

౨౨౭. ‘‘నగ్గో దుబ్బణ్ణరూపోసి, కిసో ధమనిసన్థతో;

ఉప్ఫాసులికో కిసికో, కో ను త్వమసి మారిస’’.

౨౨౮. ‘‘అహం భదన్తే పేతోమ్హి, దుగ్గతో యమలోకికో;

పాపకమ్మం కరిత్వాన, పేతలోకం ఇతో గతో’’.

౨౨౯. ‘‘కిం ను కాయేన వాచాయ, మనసా దుక్కటం కతం;

కిస్స కమ్మవిపాకేన, పేతలోకం ఇతో గతో’’.

౨౩౦. ‘‘నగరం అత్థి పణ్ణానం [దసన్నానం (సీ. స్యా. పీ.)], ఏరకచ్ఛన్తి విస్సుతం;

తత్థ సేట్ఠి పురే ఆసిం, ధనపాలోతి మం విదూ.

౨౩౧. ‘‘అసీతి సకటవాహానం, హిరఞ్ఞస్స అహోసి మే;

పహూతం మే జాతరూపం, ముత్తా వేళురియా బహూ.

౨౩౨. ‘‘తావ మహద్ధనస్సాపి, న మే దాతుం పియం అహు;

పిదహిత్వా ద్వారం భుఞ్జిం [భుఞ్జామి (సీ. స్యా.)], మా మం యాచనకాద్దసుం.

౨౩౩. ‘‘అస్సద్ధో మచ్ఛరీ చాసిం, కదరియో పరిభాసకో;

దదన్తానం కరోన్తానం, వారయిస్సం బహు జనే [బహుజ్జనం (సీ. స్యా.)].

౨౩౪. ‘‘విపాకో నత్థి దానస్స, సంయమస్స కుతో ఫలం;

పోక్ఖరఞ్ఞోదపానాని, ఆరామాని చ రోపితే;

పపాయో చ వినాసేసిం, దుగ్గే సఙ్కమనాని చ.

౨౩౫. ‘‘స్వాహం అకతకల్యాణో, కతపాపో తతో చుతో;

ఉపపన్నో పేత్తివిసయం, ఖుప్పిపాససమప్పితో.

౨౩౬. ‘‘పఞ్చపణ్ణాసవస్సాని, యతో కాలఙ్కతో అహం;

నాభిజానామి భుత్తం వా, పీతం వా పన పానియం.

౨౩౭. ‘‘యో సంయమో సో వినాసో,యో వినాసో సో సంయమో;

పేతా హి కిర జానన్తి, యో సంయమో సో వినాసో.

౨౩౮. ‘‘అహం పురే సంయమిస్సం, నాదాసిం బహుకే ధనే;

సన్తేసు దేయ్యధమ్మేసు, దీపం నాకాసిమత్తనో;

స్వాహం పచ్ఛానుతప్పామి, అత్తకమ్మఫలూపగో.

౨౩౯. [పే. వ. ౬౯] ‘‘ఉద్ధం చతూహి మాసేహి, కాలంకిరియా భవిస్సతి;

ఏకన్తకటుకం ఘోరం, నిరయం పపతిస్సహం.

౨౪౦. [పే. వ. ౭౦] ‘‘చతుక్కణ్ణం చతుద్వారం, విభత్తం భాగసో మితం;

అయోపాకారపరియన్తం, అయసా పటికుజ్జితం.

౨౪౧. [పే. వ. ౭౧] ‘‘తస్స అయోమయా భూమి, జలితా తేజసా యుతా;

సమన్తా యోజనసతం, ఫరిత్వా తిట్ఠతి సబ్బదా.

౨౪౨. [పే. వ. ౭౨] ‘‘తత్థాహం దీఘమద్ధానం, దుక్ఖం వేదిస్స వేదనం;

ఫలం పాపస్స కమ్మస్స, తస్మా సోచామహం భుసం.

౨౪౩. ‘‘తం వో వదామి భద్దం వో, యావన్తేత్థ సమాగతా;

మాకత్థ పాపకం కమ్మం, ఆవి వా యది వా రహో.

౨౪౪. ‘‘సచే తం పాపకం కమ్మం, కరిస్సథ కరోథ వా;

న వో దుక్ఖా పముత్యత్థి [పముత్తత్థి (సబ్బత్థ) ఉదా. ౪౪ పస్సితబ్బం], ఉప్పచ్చాపి [ఉపేచ్చాపి (స్యా. క.)] పలాయతం.

౨౪౫. ‘‘మత్తేయ్యా హోథ పేత్తేయ్యా, కులే జేట్ఠాపచాయికా;

సామఞ్ఞా హోథ బ్రహ్మఞ్ఞా, ఏవం సగ్గం గమిస్సథా’’తి.

ధనపాలసేట్ఠిపేతవత్థు సత్తమం.