౨. ఉబ్బరివగ్గో

౧. సంసారమోచకపేతివత్థు

౯౫. ‘‘నగ్గా దుబ్బణ్ణరూపాసి, కిసా ధమనిసన్థతా;

ఉప్ఫాసులికే [ఉప్పాసుళికే (క.)] కిసికే, కా ను త్వం ఇధ తిట్ఠసీ’’తి.

౯౬. ‘‘అహం భదన్తే పేతీమ్హి, దుగ్గతా యమలోకికా;

పాపకమ్మం కరిత్వాన, పేతలోకం ఇతో గతా’’తి.

౯౭. ‘‘కిం ను కాయేన వాచాయ, మనసా దుక్కటం కతం;

కిస్స కమ్మవిపాకేన, పేతలోకం ఇతో గతా’’తి.

౯౮. ‘‘అనుకమ్పకా మయ్హం నాహేసుం భన్తే, పితా చ మాతా అథవాపి ఞాతకా;

యే మం నియోజేయ్యుం దదాహి దానం, పసన్నచిత్తా సమణబ్రాహ్మణానం.

౯౯. ‘‘ఇతో అహం వస్ససతాని పఞ్చ, యం ఏవరూపా విచరామి నగ్గా;

ఖుదాయ తణ్హాయ చ ఖజ్జమానా, పాపస్స కమ్మస్స ఫలం మమేదం.

౧౦౦. ‘‘వన్దామి తం అయ్య పసన్నచిత్తా, అనుకమ్ప మం వీర మహానుభావ;

దత్వా చ మే ఆదిస యం హి కిఞ్చి, మోచేహి మం దుగ్గతియా భదన్తే’’తి.

౧౦౧. సాధూతి సో పటిస్సుత్వా, సారిపుత్తోనుకమ్పకో;

భిక్ఖూనం ఆలోపం దత్వా, పాణిమత్తఞ్చ చోళకం;

థాలకస్స చ పానీయం, తస్సా దక్ఖిణమాదిసి.

౧౦౨. సమనన్తరానుద్దిట్ఠే, విపాకో ఉదపజ్జథ;

భోజనచ్ఛాదనపానీయం, దక్ఖిణాయ ఇదం ఫలం.

౧౦౩. తతో సుద్ధా సుచివసనా, కాసికుత్తమధారినీ;

విచిత్తవత్థాభరణా, సారిపుత్తం ఉపసఙ్కమి.

౧౦౪. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౧౦౫. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౦౬. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౦౭. ‘‘ఉప్పణ్డుకిం కిసం ఛాతం, నగ్గం సమ్పతితచ్ఛవిం [ఆపతితచ్ఛవిం (సీ.)];

ముని కారుణికో లోకే, తం మం అద్దక్ఖి దుగ్గతం.

౧౦౮. ‘‘భిక్ఖూనం ఆలోపం దత్వా, పాణిమత్తఞ్చ చోళకం;

థాలకస్స చ పానీయం, మమ దక్ఖిణమాదిసి.

౧౦౯. ‘‘ఆలోపస్స ఫలం పస్స, భత్తం వస్ససతం దస;

భుఞ్జామి కామకామినీ, అనేకరసబ్యఞ్జనం.

౧౧౦. ‘‘పాణిమత్తస్స చోళస్స, విపాకం పస్స యాదిసం;

యావతా నన్దరాజస్స, విజితస్మిం పటిచ్ఛదా.

౧౧౧. ‘‘తతో బహుతరా భన్తే, వత్థానచ్ఛాదనాని మే;

కోసేయ్యకమ్బలీయాని, ఖోమకప్పాసికాని చ.

౧౧౨. ‘‘విపులా చ మహగ్ఘా చ, తేపాకాసేవలమ్బరే;

సాహం తం పరిదహామి, యం యం హి మనసో పియం.

౧౧౩. ‘‘థాలకస్స చ పానీయం, విపాకం పస్స యాదిసం;

గమ్భీరా చతురస్సా చ, పోక్ఖరఞ్ఞో సునిమ్మితా.

౧౧౪. ‘‘సేతోదకా సుప్పతిత్థా, సీతా అప్పటిగన్ధియా;

పదుముప్పలసఞ్ఛన్నా, వారికిఞ్జక్ఖపూరితా.

౧౧౫. ‘‘సాహం రమామి కీళామి, మోదామి అకుతోభయా;

మునిం కారుణికం లోకే, భన్తే వన్దితుమాగతా’’తి.

సంసారమోచకపేతివత్థు పఠమం.

౨. సారిపుత్తత్థేరమాతుపేతివత్థు

౧౧౬. ‘‘నగ్గా దుబ్బణ్ణరూపాసి, కిసా ధమనిసన్థతా;

ఉప్ఫాసులికే కిసికే, కా ను త్వం ఇధ తిట్ఠసి’’.

౧౧౭. ‘‘అహం తే సకియా మాతా, పుబ్బే అఞ్ఞాసు జాతీసు;

ఉపపన్నా పేత్తివిసయం, ఖుప్పిపాససమప్పితా.

౧౧౮. ‘‘ఛడ్డితం ఖిపితం ఖేళం, సిఙ్ఘాణికం సిలేసుమం;

వసఞ్చ డయ్హమానానం, విజాతానఞ్చ లోహితం.

౧౧౯. ‘‘వణికానఞ్చ యం ఘాన-సీసచ్ఛిన్నాన లోహితం;

ఖుదాపరేతా భుఞ్జామి, ఇత్థిపురిసనిస్సితం.

౧౨౦. ‘‘పుబ్బలోహితం భక్ఖామి [పుబ్బలోహితభక్ఖాస్మి (సీ.)], పసూనం మానుసాన చ;

అలేణా అనగారా చ, నీలమఞ్చపరాయణా.

౧౨౧. ‘‘దేహి పుత్తక మే దానం, దత్వా అన్వాదిసాహి మే;

అప్పేవ నామ ముచ్చేయ్యం, పుబ్బలోహితభోజనా’’తి.

౧౨౨. మాతుయా వచనం సుత్వా, ఉపతిస్సోనుకమ్పకో;

ఆమన్తయి మోగ్గల్లానం, అనురుద్ధఞ్చ కప్పినం.

౧౨౩. చతస్సో కుటియో కత్వా, సఙ్ఘే చాతుద్దిసే అదా;

కుటియో అన్నపానఞ్చ, మాతు దక్ఖిణమాదిసీ.

౧౨౪. సమనన్తరానుద్దిట్ఠే, విపాకో ఉదపజ్జథ;

భోజనం పానీయం వత్థం, దక్ఖిణాయ ఇదం ఫలం.

౧౨౫. తతో సుద్ధా సుచివసనా, కాసికుత్తమధారినీ;

విచిత్తవత్థాభరణా, కోలితం ఉపసఙ్కమి.

౧౨౬. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౧౨౭. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౨౮. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.

౧౨౯. ‘‘సారిపుత్తస్సాహం మాతా, పుబ్బే అఞ్ఞాసు జాతీసు;

ఉపపన్నా పేత్తివిసయం, ఖుప్పిపాససమప్పితా.

౧౩౦. ‘‘ఛడ్డితం ఖిపితం ఖేళం, సిఙ్ఘాణికం సిలేసుమం;

వసఞ్చ డయ్హమానానం, విజాతానఞ్చ లోహితం.

౧౩౧. ‘‘వణికానఞ్చ యం ఘాన-సీసచ్ఛిన్నాన లోహితం;

ఖుదాపరేతా భుఞ్జామి, ఇత్థిపురిసనిస్సితం.

౧౩౨. ‘‘పుబ్బలోహితం భక్ఖిస్సం, పసూనం మానుసాన చ;

అలేణా అనగారా చ, నీలమఞ్చపరాయణా.

౧౩౩. ‘‘సారిపుత్తస్స దానేన, మోదామి అకుతోభయా;

మునిం కారుణికం లోకే, భన్తే వన్దితుమాగతా’’తి.

సారిపుత్తత్థేరస్స మాతుపేతివత్థు దుతియం.

౩. మత్తాపేతివత్థు

౧౩౪. ‘‘నగ్గా దుబ్బణ్ణరూపాసి, కిసా ధమనిసన్థతా;

ఉప్ఫాసులికే కిసికే, కా ను త్వం ఇధ తిట్ఠసీ’’తి.

౧౩౫. ‘‘అహం మత్తా తువం తిస్సా, సపత్తీ తే పురే అహుం;

పాపకమ్మం కరిత్వాన, పేతలోకం ఇతో గతా’’తి.

౧౩౬. ‘‘కిం ను కాయేన వాచాయ, మనసా దుక్కటం కతం;

కిస్స కమ్మవిపాకేన, పేతలోకం ఇతో గతా’’తి.

౧౩౭. ‘‘చణ్డీ చ ఫరుసా చాసిం, ఇస్సుకీ మచ్ఛరీ సఠా [సఠీ (సీ.)];

తాహం దురుత్తం వత్వాన, పేతలోకం ఇతో గతా’’తి.

౧౩౮. సబ్బం [సచ్చం (క.)] అహమ్పి జానామి, యథా త్వం చణ్డికా అహు;

అఞ్ఞఞ్చ ఖో తం పుచ్ఛామి, కేనాసి పంసుకున్థితా’’తి.

౧౩౯. ‘‘సీసంన్హాతా తువం ఆసి, సుచివత్థా అలఙ్కతా;

అహఞ్చ ఖో [ఖో తం (సీ. క.)] అధిమత్తం, సమలఙ్కతతరా తయా.

౧౪౦. ‘‘తస్సా మే పేక్ఖమానాయ, సామికేన సమన్తయి;

తతో మే ఇస్సా విపులా, కోధో మే సమజాయథ.

౧౪౧. ‘‘తతో పంసుం గహేత్వాన, పంసునా తం హి ఓకిరిం [తం వికీరిహం (స్యా. క.)];

తస్స కమ్మవిపాకేన, తేనమ్హి పంసుకున్థితా’’తి.

౧౪౨. ‘‘సచ్చం అహమ్పి జానామి, పంసునా మం త్వమోకిరి;

అఞ్ఞఞ్చ ఖో తం పుచ్ఛామి, కేన ఖజ్జసి కచ్ఛుయా’’తి.

౧౪౩. ‘‘భేసజ్జహారీ ఉభయో, వనన్తం అగమిమ్హసే;

త్వఞ్చ భేసజ్జమాహరి, అహఞ్చ కపికచ్ఛునో.

౧౪౪. ‘‘తస్సా త్యాజానమానాయ, సేయ్యం త్యాహం సమోకిరిం;

తస్స కమ్మవిపాకేన, తేన ఖజ్జామి కచ్ఛుయా’’తి.

౧౪౫. ‘‘సచ్చం అహమ్పి జానామి, సేయ్యం మే త్వం సమోకిరి;

అఞ్ఞఞ్చ ఖో తం పుచ్ఛామి, కేనాసి నగ్గియా తువ’’న్తి.

౧౪౬. ‘‘సహాయానం సమయో ఆసి, ఞాతీనం సమితీ అహు;

త్వఞ్చ ఆమన్తితా ఆసి, ససామినీ నో చ ఖో అహం.

౧౪౭. ‘‘తస్సా త్యాజానమానాయ, దుస్సం త్యాహం అపానుదిం;

తస్స కమ్మవిపాకేన, తేనమ్హి నగ్గియా అహ’’న్తి.

౧౪౮. ‘‘సచ్చం అహమ్పి జానామి, దుస్సం మే త్వం అపానుది;

అఞ్ఞఞ్చ ఖో తం పుచ్ఛామి, కేనాసి గూథగన్ధినీ’’తి.

౧౪౯. ‘‘తవ గన్ధఞ్చ మాలఞ్చ, పచ్చగ్ఘఞ్చ విలేపనం;

గూథకూపే అధారేసిం [అధారేసిం (క.)], తం పాపం పకతం మయా;

తస్స కమ్మవిపాకేన, తేనమ్హి గూథగన్ధినీ’’తి.

౧౫౦. ‘‘సచ్చం అహమ్పి జానామి, తం పాపం పకతం తయా;

అఞ్ఞఞ్చ ఖో తం పుచ్ఛామి, కేనాసి దుగ్గతా తువ’’న్తి.

౧౫౧. ‘‘ఉభిన్నం సమకం ఆసి, యం గేహే విజ్జతే ధనం;

సన్తేసు దేయ్యధమ్మేసు, దీపం నాకాసిమత్తనో;

తస్స కమ్మవిపాకేన, తేనమ్హి దుగ్గతా అహం.

౧౫౨. ‘‘తదేవ మం త్వం అవచ, ‘పాపకమ్మం నిసేవసి;

న హి పాపేహి కమ్మేహి, సులభా హోతి సుగ్గతీ’’’తి.

౧౫౩. ‘‘వామతో మం త్వం పచ్చేసి, అథోపి మం ఉసూయసి;

పస్స పాపానం కమ్మానం, విపాకో హోతి యాదిసో.

౧౫౪. ‘‘తే ఘరా తా చ దాసియో [తే ఘరదాసియో ఆసుం (సీ. స్యా.), తే ఘరే దాసియో చేవ (క.)], తానేవాభరణానిమే;

తే అఞ్ఞే పరిచారేన్తి, న భోగా హోన్తి సస్సతా.

౧౫౫. ‘‘ఇదాని భూతస్స పితా, ఆపణా గేహమేహితి;

అప్పేవ తే దదే కిఞ్చి, మా సు తావ ఇతో అగా’’తి.

౧౫౬. ‘‘నగ్గా దుబ్బణ్ణరూపామ్హి, కిసా ధమనిసన్థతా;

కోపీనమేతం ఇత్థీనం, మా మం భూతపితాద్దసా’’తి.

౧౫౭. ‘‘హన్ద కిం వా త్యాహం [కిం త్యాహం (సీ. స్యా.), కిం వతాహం (క.)] దమ్మి, కిం వా తేధ [కిం వా చ తే (సీ. స్యా.), కిం విధ తే (క.)] కరోమహం;

యేన త్వం సుఖితా అస్స, సబ్బకామసమిద్ధినీ’’తి.

౧౫౮. ‘‘చత్తారో భిక్ఖూ సఙ్ఘతో, చత్తారో పన పుగ్గలా;

అట్ఠ భిక్ఖూ భోజయిత్వా, మమ దక్ఖిణమాదిస;

తదాహం సుఖితా హేస్సం, సబ్బకామసమిద్ధినీ’’తి.

౧౫౯. సాధూతి సా పటిస్సుత్వా, భోజయిత్వాట్ఠ భిక్ఖవో;

వత్థేహచ్ఛాదయిత్వాన, తస్సా దక్ఖిణమాదిసీ.

౧౬౦. సమనన్తరానుద్దిట్ఠే, విపాకో ఉదపజ్జథ;

భోజనచ్ఛాదనపానీయం, దక్ఖిణాయ ఇదం ఫలం.

౧౬౧. తతో సుద్ధా సుచివసనా, కాసికుత్తమధారినీ;

విచిత్తవత్థాభరణా, సపత్తిం ఉపసఙ్కమి.

౧౬౨. ‘‘అభిక్కన్తేన వణ్ణేన, యా త్వం తిట్ఠసి దేవతే;

ఓభాసేన్తీ దిసా సబ్బా, ఓసధీ వియ తారకా.

౧౬౩. ‘‘కేన తేతాదిసో వణ్ణో, కేన తే ఇధ మిజ్ఝతి;

ఉప్పజ్జన్తి చ తే భోగా, యే కేచి మనసో పియా.

౧౬౪. ‘‘పుచ్ఛామి తం దేవి మహానుభావే, మనుస్సభూతా కిమకాసి పుఞ్ఞం;

కేనాసి ఏవం జలితానుభావా, వణ్ణో చ తే సబ్బదిసా పభాసతీ’’తి.