౬. కణ్హపేతవత్థు

౨౦౭. ‘‘ఉట్ఠేహి కణ్హ కిం సేసి, కో అత్థో సుపనేన తే;

యో చ తుయ్హం సకో భాతా, హదయం చక్ఖు చ [చక్ఖుంవ (అట్ఠ.)] దక్ఖిణం;

తస్స వాతా బలీయన్తి, ససం జప్పతి [ఘటో జప్పతి (క.)] కేసవా’’తి.

౨౦౮. ‘‘తస్స తం వచనం సుత్వా, రోహిణేయ్యస్స కేసవో;

తరమానరూపో వుట్ఠాసి, భాతుసోకేన అట్టితో.

౨౦౯. ‘‘కిం ను ఉమ్మత్తరూపోవ, కేవలం ద్వారకం ఇమం;

ససో ససోతి లపసి, కీదిసం ససమిచ్ఛసి.

౨౧౦. ‘‘సోవణ్ణమయం మణిమయం, లోహమయం అథ రూపియమయం;

సఙ్ఖసిలాపవాళమయం, కారయిస్సామి తే ససం.

౨౧౧. ‘‘సన్తి అఞ్ఞేపి ససకా, అరఞ్ఞవనగోచరా;

తేపి తే ఆనయిస్సామి, కీదిసం ససమిచ్ఛసీ’’తి.

౨౧౨. ‘‘నాహమేతే ససే ఇచ్ఛే, యే ససా పథవిస్సితా;

చన్దతో ససమిచ్ఛామి, తం మే ఓహర కేసవా’’తి.

౨౧౩. ‘‘సో నూన మధురం ఞాతి, జీవితం విజహిస్ససి;

అపత్థియం పత్థయసి, చన్దతో ససమిచ్ఛసీ’’తి.

౨౧౪. ‘‘ఏవం చే కణ్హ జానాసి, యథఞ్ఞమనుసాససి;

కస్మా పురే మతం పుత్తం, అజ్జాపి మనుసోచసి.

౨౧౫. ‘‘న యం లబ్భా మనుస్సేన, అమనుస్సేన వా పన;

జాతో మే మా మరి పుత్తో, కుతో లబ్భా అలబ్భియం.

౨౧౬. ‘‘న మన్తా మూలభేసజ్జా, ఓసధేహి ధనేన వా;

సక్కా ఆనయితుం కణ్హ, యం పేతమనుసోచసి.

౨౧౭. ‘‘మహద్ధనా మహాభోగా, రట్ఠవన్తోపి ఖత్తియా;

పహూతధనధఞ్ఞాసే, తేపి నో [నత్థేత్థపాఠభేదో] అజరామరా.

౨౧౮. ‘‘ఖత్తియా బ్రాహ్మణా వేస్సా, సుద్దా చణ్డాలపుక్కుసా;

ఏతే చఞ్ఞే చ జాతియా, తేపి నో అజరామరా.

౨౧౯. ‘‘యే మన్తం పరివత్తేన్తి, ఛళఙ్గం బ్రహ్మచిన్తితం;

ఏతే చఞ్ఞే చ విజ్జాయ, తేపి నో అజరామరా.

౨౨౦. ‘‘ఇసయో వాపి [ఇసయో చాపి (విమానవత్థు ౯౯)] యే సన్తా, సఞ్ఞతత్తా తపస్సినో;

సరీరం తేపి కాలేన, విజహన్తి తపస్సినో.

౨౨౧. ‘‘భావితత్తా అరహన్తో, కతకిచ్చా అనాసవా;

నిక్ఖిపన్తి ఇమం దేహం, పుఞ్ఞపాపపరిక్ఖయా’’తి.

౨౨౨. ‘‘ఆదిత్తం వత మం సన్తం, ఘతసిత్తంవ పావకం;

వారినా వియ ఓసిఞ్చం, సబ్బం నిబ్బాపయే దరం.

౨౨౩. ‘‘అబ్బహీ వత మే సల్లం, సోకం హదయనిస్సితం;

యో మే సోకపరేతస్స, పుత్తసోకం అపానుది.

౨౨౪. ‘‘స్వాహం అబ్బూళ్హసల్లోస్మి, సీతిభూతోస్మి నిబ్బుతో;

న సోచామి న రోదామి, తవ సుత్వాన భాతిక’’ [భాసితం (స్యా.)].

౨౨౫. ఏవం కరోన్తి సప్పఞ్ఞా, యే హోన్తి అనుకమ్పకా;

నివత్తయన్తి సోకమ్హా, ఘటో జేట్ఠంవ భాతరం.

౨౨౬. యస్స ఏతాదిసా హోన్తి, అమచ్చా పరిచారకా;

సుభాసితేన అన్వేన్తి, ఘటో జేట్ఠంవ భాతరన్తి.

కణ్హపేతవత్థు ఛట్ఠం.