౧౩. ఉబ్బరిపేతవత్థు

౩౬౮. అహు రాజా బ్రహ్మదత్తో, పఞ్చాలానం రథేసభో;

అహోరత్తానమచ్చయా, రాజా కాలమక్రుబ్బథ [రాజా కాలఙ్కరీ తదా (సీ.)].

౩౬౯. తస్స ఆళాహనం గన్త్వా, భరియా కన్దతి ఉబ్బరీ [ఉప్పరి (క.)];

బ్రహ్మదత్తం అపస్సన్తీ, బ్రహ్మదత్తాతి కన్దతి.

౩౭౦. ఇసి చ తత్థ ఆగచ్ఛి, సమ్పన్నచరణో ముని;

సో చ తత్థ అపుచ్ఛిత్థ, యే తత్థ సుసమాగతా.

౩౭౧. ‘‘కస్స ఇదం ఆళాహనం, నానాగన్ధసమేరితం;

కస్సాయం కన్దతి భరియా, ఇతో దూరగతం పతిం;

బ్రహ్మదత్తం అపస్సన్తీ, ‘బ్రహ్మదత్తా’తి కన్దతి’’.

౩౭౨. తే చ తత్థ వియాకంసు, యే తత్థ సుసమాగతా;

‘‘బ్రహ్మదత్తస్స భదన్తే [భద్దన్తే (క.)], బ్రహ్మదత్తస్స మారిస.

౩౭౩. ‘‘తస్స ఇదం ఆళాహనం, నానాగన్ధసమేరితం;

తస్సాయం కన్దతి భరియా, ఇతో దూరగతం పతిం;

బ్రహ్మదత్తం అపస్సన్తీ, ‘బ్రహ్మదత్తా’తి కన్దతి’’.

౩౭౪. ‘‘ఛళాసీతిసహస్సాని, బ్రహ్మదత్తస్సనామకా;

ఇమస్మిం ఆళాహనే దడ్ఢా, తేసం కమనుసోచసీ’’తి.

౩౭౫. ‘‘యో రాజా చూళనీపుత్తో, పఞ్చాలానం రథేసభో;

తం భన్తే అనుసోచామి, భత్తారం సబ్బకామద’’న్తి.

౩౭౬. ‘‘సబ్బే వాహేసుం రాజానో, బ్రహ్మదత్తస్సనామకా;

సబ్బేవచూళనీపుత్తా, పఞ్చాలానం రథేసభా.

౩౭౭. ‘‘సబ్బేసం అనుపుబ్బేన, మహేసిత్తమకారయి;

కస్మా పురిమకే హిత్వా, పచ్ఛిమం అనుసోచసీ’’తి.

౩౭౮. ‘‘ఆతుమే ఇత్థిభూతాయ, దీఘరత్తాయ మారిస;

యస్సా మే ఇత్థిభూతాయ, సంసారే బహుభాససీ’’తి.

౩౭౯. ‘‘అహు ఇత్థీ అహు పురిసో, పసుయోనిమ్పి ఆగమా;

ఏవమేతం అతీతానం, పరియన్తో న దిస్సతీ’’తి.

౩౮౦. ‘‘ఆదిత్తం వత మం సన్తం, ఘతసిత్తంవ పావకం;

వారినా వియ ఓసిఞ్చం, సబ్బం నిబ్బాపయే దరం.

౩౮౧. ‘‘అబ్బహీ వత మే సల్లం, సోకం హదయనిస్సితం;

యో మే సోకపరేతాయ, పతిసోకం అపానుది.

౩౮౨. ‘‘సాహం అబ్బూళ్హసల్లాస్మి, సీతిభూతాస్మి నిబ్బుతా;

న సోచామి న రోదామి, తవ సుత్వా మహామునీ’’తి.

౩౮౩. తస్స తం వచనం సుత్వా, సమణస్స సుభాసితం;

పత్తచీవరమాదాయ, పబ్బజి అనగారియం.

౩౮౪. సా చ పబ్బజితా సన్తా, అగారస్మా అనగారియం;

మేత్తాచిత్తం అభావేసి, బ్రహ్మలోకూపపత్తియా.

౩౮౫. గామా గామం విచరన్తీ, నిగమే రాజధానియో;

ఉరువేలా నామ సో గామో, యత్థ కాలమక్రుబ్బథ.

౩౮౬. మేత్తాచిత్తం ఆభావేత్వా, బ్రహ్మలోకూపపత్తియా;

ఇత్థిచిత్తం విరాజేత్వా, బ్రహ్మలోకూపగా అహూతి.

ఉబ్బరిపేతవత్థు తేరసమం.

ఉబ్బరివగ్గో దుతియో నిట్ఠితో.