౧౦. ఉత్తరమాతుపేతివత్థు

౩౩౧. దివావిహారగతం భిక్ఖుం, గఙ్గాతీరే నిసిన్నకం;

తం పేతీ ఉపసఙ్కమ్మ, దుబ్బణ్ణా భీరుదస్సనా.

౩౩౨. కేసా చస్సా అతిదీఘా [అహూ దీఘా (క.)], యావభూమావలమ్బరే [యావ భూమ్యా’వలమ్బరే (?)];

కేసేహి సా పటిచ్ఛన్నా, సమణం ఏతదబ్రవి.

౩౩౩. ‘‘పఞ్చపణ్ణాసవస్సాని, యతో కాలఙ్కతా అహం;

నాభిజానామి భుత్తం వా, పీతం వా పన పానియం;

దేహి త్వం పానియం భన్తే, తసితా పానియాయ మే’’తి.

౩౩౪. ‘‘అయం సీతోదికా గఙ్గా, హిమవన్తతో [హిమవన్తావ (క.)] సన్దతి;

పివ ఏత్తో గహేత్వాన, కిం మం యాచసి పానియ’’న్తి.

౩౩౫. ‘‘సచాహం భన్తే గఙ్గాయ, సయం గణ్హామి పానియం;

లోహితం మే పరివత్తతి, తస్మా యాచామి పానియ’’న్తి.

౩౩౬. ‘‘కిం ను కాయేన వాచాయ, మనసా దుక్కటం కతం;

కిస్స కమ్మవిపాకేన, గఙ్గా తే హోతి లోహిత’’న్తి.

౩౩౭. ‘‘పుత్తో మే ఉత్తరో నామ [పుత్తో మే భన్తే ఉత్తరో (క.)], సద్ధో ఆసి ఉపాసకో;

సో చ మయ్హం అకామాయ, సమణానం పవేచ్ఛతి.

౩౩౮. ‘‘చీవరం పిణ్డపాతఞ్చ, పచ్చయం సయనాసనం;

తమహం పరిభాసామి, మచ్ఛేరేన ఉపద్దుతా.

౩౩౯. ‘‘యం త్వం మయ్హం అకామాయ, సమణానం పవేచ్ఛసి;

చీవరం పిణ్డపాతఞ్చ, పచ్చయం సయనాసనం.

౩౪౦. ‘‘ఏతం తే పరలోకస్మిం, లోహితం హోతు ఉత్తర;

తస్స కమ్మస్స విపాకేన, గఙ్గా మే హోతి లోహిత’’న్తి.

ఉత్తరమాతుపేతివత్థు దసమం.