౧౧. సుత్తపేతవత్థు

౩౪౧. ‘‘అహం పురే పబ్బజితస్స భిక్ఖునో, సుత్తం అదాసిం ఉపసఙ్కమ్మ యాచితా;

తస్స విపాకో విపులఫలూపలబ్భతి, బహుకా చ మే ఉప్పజ్జరే [బహూ చ మే ఉపపజ్జరే (సీ.)] వత్థకోటియో.

౩౪౨. ‘‘పుప్ఫాభికిణ్ణం రమితం [రమ్మమిదం (క.)] విమానం, అనేకచిత్తం నరనారిసేవితం;

సాహం భుఞ్జామి చ పారుపామి చ, పహూతవిత్తా న చ తావ ఖీయతి.

౩౪౩. ‘‘తస్సేవ కమ్మస్స విపాకమన్వయా, సుఖఞ్చ సాతఞ్చ ఇధూపలబ్భతి;

సాహం గన్త్వా పునదేవ మానుసం, కాహామి పుఞ్ఞాని నయయ్యపుత్త మ’’న్తి.

౩౪౪. ‘‘సత్త తువం వస్ససతా ఇధాగతా,

జిణ్ణా చ వుడ్ఢా చ తహిం భవిస్ససి;

సబ్బేవ తే కాలకతా చ ఞాతకా,

కిం తత్థ గన్త్వాన ఇతో కరిస్ససీ’’తి.

౩౪౫. ‘‘సత్తేవ వస్సాని ఇధాగతాయ మే, దిబ్బఞ్చ సుఖఞ్చ సమప్పితాయ;

సాహం గన్త్వాన పునదేవ మానుసం, కాహామి పుఞ్ఞాని నయయ్యపుత్త మ’’న్తి.

౩౪౬. సో తం గహేత్వాన పసయ్హ బాహాయం, పచ్చానయిత్వాన థేరిం సుదుబ్బలం;

‘‘వజ్జేసి అఞ్ఞమ్పి జనం ఇధాగతం, ‘కరోథ పుఞ్ఞాని సుఖూపలబ్భతి’’.

౩౪౭. ‘‘దిట్ఠా మయా అకతేన సాధునా, పేతా విహఞ్ఞన్తి తథేవ మనుస్సా;

కమ్మఞ్చ కత్వా సుఖవేదనీయం, దేవా మనుస్సా చ సుఖే ఠితా పజా’’తి.

సుత్తపేతవత్థు ఏకాదసమం.