౧౨. ఉరగపేతవత్థు

౮౫. ‘‘ఉరగోవ తచం జిణ్ణం, హిత్వా గచ్ఛతి సన్తనుం;

ఏవం సరీరే నిబ్భోగే, పేతే కాలఙ్కతే సతి.

౮౬. ‘‘డయ్హమానో న జానాతి, ఞాతీనం పరిదేవితం;

తస్మా ఏతం న రోదామి, గతో సో తస్స యా గతి’’.

౮౭. ‘‘అనబ్భితో [అనవ్హితో (సీ.)] తతో ఆగా, నానుఞ్ఞాతో ఇతో గతో;

యథాగతో తథా గతో, తత్థ కా [కా తత్థ (సీ.)] పరిదేవనా.

౮౮. ‘‘డయ్హమానో న జానాతి, ఞాతీనం పరిదేవితం;

తస్మా ఏతం న రోదామి, గతో సో తస్స యా గతి’’.

౮౯. ‘‘సచే రోదే కిసా అస్సం, తత్థ మే కిం ఫలం సియా;

ఞాతిమిత్తసుహజ్జానం, భియ్యో నో అరతీ సియా.

౯౦. ‘‘డయ్హమానో న జానాతి, ఞాతీనం పరిదేవితం;

తస్మా ఏతం న రోదామి, గతో సో తస్స యా గతి’’.

౯౧. ‘‘యథాపి దారకో చన్దం, గచ్ఛన్తమనురోదతి;

ఏవం సమ్పదమేవేతం, యో పేతమనుసోచతి.

౯౨. ‘‘డయ్హమానో న జానాతి, ఞాతీనం పరిదేవితం;

తస్మా ఏతం న రోదామి, గతో సో తస్స యా గతి’’.

౯౩. ‘‘యథాపి బ్రహ్మే ఉదకుమ్భో, భిన్నో అప్పటిసన్ధియో;

ఏవం సమ్పదమేవేతం, యో పేతమనుసోచతి.

౯౪. ‘‘డయ్హమానో న జానాతి, ఞాతీనం పరిదేవితం;

తస్మా ఏతం న రోదామి, గతో సో తస్స యా గతీ’’తి.

ఉరగపేతవత్థు ద్వాదసమం.

ఉరగవగ్గో పఠమో నిట్ఠితో.